3Mos. 21 - BUKO SIPUNENAN

Pusisipunenanda tai imam

¹ Kuanangan si Tuhan katubut Mose: “Panibo katubutda tai imam, tatogat Aron samba kua katubutda: Sara imam tamomoi ikasitsiake tubunia ka sara sirimanua simamatei katalagat sangamberi sirimanua ka bangsamia,

² tapoi ke simamatei nenda iate saeppunia bulat simalegre katubunia, iate inania, ukkuinia, tatogania taimanteu,

³ ele maniunia, siokko peile samba malegre katubunia kalulut tapei amusimanteunia, ka sia nenda momoi ikatsitsitake tubunia.

⁴ Sibailiu sara simanteu bui ikasitsitake tubunia katalagat sangamberi sirimanua sabangsania samba kabagat nenda masipasabau pusisipunenannia.

⁵ Bui raguluk sangasila utera, samba bui rakirit bebet bulut bakklatda, samba bui rapajajaki kulit tubutda.

⁶ Sia nenda buita masipunenan ka Taikamanuanda samba bui rapasabau pusisipunenan onin Taikamanuanda, kalulut sia te masipangunguruatake sangamberi buluakenen sirarak katubut Tuhan, komen Taikamanuanda, samba kalulut nenda buita masipunenan sia.

⁷ Bui ratalimouake sara sinanalep simaolop tubu ele sinanalep silepa tupakatai pusiokkonia ele sara sirimanua sisaraakenen simanteunia, kalulut imam nenda masipunenan ka Taikamanua.

⁸ Samba buita nuaddeake kamnia simapunenan, karena nia te masipangunguruatake komen ka Taikamanuamui. Buita masipunenannia katubumui, kalulut Aku, Tuhan, sipunenanake kam iate sipunenan.

⁹ Ke sara togat imam sinanalep iobaake imakatai pusiookkonia igalaiake puoloman tubu, oto nia masipasabau pusisipunenan ukkuinia, samba nia buita tulaboake ka obengan.

¹⁰ Imam siabeu katalagat sasarainania, silepa tutulaiji pasamba tula pasisukat ka utenia samba sisukatakenen pasamba tupakeiake katubunia senengamata leppei sipunenan, bui iobaake ipujai alainia samba bui ibiritake leppeinia.

¹¹ Bui' imalegre ka sangamberi tubu simamatei, samba tamomoi ipalolit tubunia katubut ukkuinia simamatei ele inania.

¹² Bui' ibela ka kudduat sipunenan, bule bui ipasabau pusisipunenan kudduat sipunenan Taikamanuania, kalulut tula pasisukat Taikamanuania, sibailiu toggaiat aitukkokoiakenia ai ka utenia; Aku te Tuhan.

¹³ Imam nenda buita italimouake sara siokko simalina.

¹⁴ Sara silumang ele sinanalep sisaraakenen ele silepa tupakatai pusiookkonia ele sinanalep sipuolop tubu, bui italimouakenia, tapoi buita sara siokko simalina katalagat sangamberi sirimanua sabangsania,

¹⁵ bule bui ipasabau pusisipunenan muntogatnia katalagat sangamberi bangsania, kalulut Aku te Tuhan, amasipunenanakenia.”

¹⁶ Kuanangan si Tuhan katubut Mose:

¹⁷ “Kua katubut Aron, kise: Senen sangamberi muntogatmui sipupaninikat sibara katai tubu, bui ioi imalegre ipanguruatake komen Taikamanuania,

¹⁸ kalulut senen sirimanua sibara katai tubu tamomoi imalegre: simapeset, sijegeu, sikatai pumaatnia, ele simakope nanta laddou katubunia,

¹⁹ simababakbak rere ele kabeinia,

²⁰ sirimanua simasikku teitei ele sigoiso tubu ele simabesik mata, sibara belua, sibara guluk ele simakatai keikeietnia.

²¹ Senen sirimanua sibara ka muntogat imam Aron sibara katai tubu, bui ioi masipanguruatake senengamata buluakenen sirarak katubut Tuhan; kalulut tubunia ai simakakatai bui ioi imalegre ipanguruatake komen Taikamanuania.

²² Pagalaiat komen Taikamanuania, ele panguruat bulat sipunenan ele panguruat sipunenan momoi ikomnia.

²³ Sarat bui ioi teret ka komak kekre samba bui ioi ka kudduat pasibuluat, kalulut ai sikatai katubunia, bule bui ipasabau pusisipunenan sangaliot kudduat sipunenanKu, kalulut Aku te Tuhan, sipunenanake sia.”

²⁴ Kise te aisegeake si Mose tiboiet nenda katubut Aron samba leu ka tatogannia samba ka sangamberi tai Israel.