3Mos. 20 - BUKO SIPUNENAN

Pusisipunenannia paamian Tuhan

¹ Kuanangan si Tuhan katubut Mose:

² “Buita nukua ka tai Israel: Senen sirimanua, ele sibara ka Israel ele sibara ka siooiake sikuddu katalagatda tai Israel, sikau sara katalagat tatogania katubut Molokh, bulat tuukumake le nia, iate siberikabaga ka laggai buita rapabaijunginia bukku.

³ Aku le geti masipatakaiake sirimanua nenda samba masitataake nia katalagat bangsania, kalulut aikau sara katalagat tatogania katubut Molokh, bule ikasitsitake kudduat sipunenanKu samba masipasabau pusisipunenan oningKu sipunenan.

⁴ Tapoi ke rapetpet le matadda siberikabaga ka laggai ka sirimanua nenda, kateteret aikau sara katalagat sangamberi tatogania katubut Molokh, samba ta tuukumakenia,

⁵ oto Aku le geti masipatakai sirimanua nenda samba muntogatnia samba masitataake nia geti katalagat bangsania samba sangamberi sirimanua situtake paelenen pasambania, iate paelenan masipanindogi Molokh.

⁶ Sirimanua siei ka ketsatda simamatei ele ka ketsatda sipukekerei, iate sipaelet kabagat pasirereake ka ketsat nenda, Aku le geti masiukumake samba masitataake nia katalagat bangsania.

⁷ Oto buita masipunenan kam, samba pusipunenan kam, kalulut Aku le Tuhan Taikamanuamui.

⁸ Kisedda te buita nuukkaake samba nugalaiake kam siteuakenenKu; Aku te Tuhan sipunenanake kam.

⁹ Ke ai sara sirimanua sipasitelei ukkuinia ele inania buita tuukum matei le nia; aipateleijingan ukkui ele inania, oto logaunia tuorakake katubunia.

¹⁰ Ke paelet sara simanteu ka sinanalepda sirimanua sabagei, iate paelet ka sinanalep saaleinia sirimanua, karuatda buita tuukumake simateiakenen, ele simanteu ele sinanalep sipaelet nenda.

¹¹ Ke sara simanteu merep pasamba sara sinanalep ukkuinia, oto aipasabauan bakkat ukkuinia, karuatda nenda buita tuukum simateiakenen, samba logaura tuorakake katubutda.

¹² Ke sara simanteu merep pasamba talikunia sinanalep, karuatda nenda buita tuukumake simateiakenen; aragalaian poi sara pukkatai, oto logaura tuorakake katubutda.

¹³ Ke sara simanteu merep pasamba simanteu kele ipaperepake sinanalep, oto karuatda masigalaiake sara pukaka ai, buita tuukumake sia simateiakenen samba logaura tuorakake katubutda.

¹⁴ Ke sara simanteu masiala sara sinanalep samba inania, nenda galajet katuailaat; nia samba karua sinanalep nenda buita tulabo, bule bui ibara galajet puailaat katalagamui.

¹⁵ Ke sara simanteu paelet ka sangamuneng tarimeu, buita tuukumnia simateiakenen samba tarimeu nenda bui ta tumateiake le.

¹⁶ Ke sara sinanalep masipaperepake sangamuneng tarimeu apa pa, buita ta numateiake sinanalep samba tarimeu nenda; sia nene buita tuukumake simateiakenen samba logaura tuorakake katubutda.

¹⁷ Ke sara simanteu masiala maniunia, togat ukkuinia ele togat inania, samba papereprangan, oto nenda sara galajet sitaimateu samba buita tutataake sia kamatat sangamberi sirimanua sabangsania sirimanua nenda aikulaakean kailaakenen maniunia, oto buita ibairat puseleatnia.

¹⁸ Ke sara simanteu merep pasamba sara sinanalep sipulololit komak, oto ikulaake le kailaakenen sinanalep nenda samba masibuka tabbot suat tubunia samba sinanalep nenda aiobaake tabbot suat tubu logaunia itukulaake, buita tutataake sia ruatda katalagat bangsania.

¹⁹ Bui nukulaake kailaakenen sarainan inam sinanalep ele maniu ukkuinu, kalulut kailaakenen sara eppunia le aikulaake, samba sia buita rabairat siripot puseleatda.

²⁰ Ke sara simanteu merep pasamba sinanalep sarainan ukkuinia, oto nia ipasabau le bakkat sarainan ukkuinia, rabaraake le jo katubutda, samba matei le sia sitatoga.

²¹ Ke sara simanteu masiala sinanalep sarainania, nenda sara katuailaat, kalulut aipasabauan bakkat sarainannia simanteu, samba ta babara togatda.

²² Kisedda te buita nuukaake samba nugalaiake kam sangamberi siteuakenenKu samba surukatKu, bule bui igelekake kam laggai ka siambitKu kam anukuddu kam sedda.

²³ Bui' nupurimanua kam siripot katukelat bangsa kekeletKu kamatamui: kalulut sangamberinia nenda aragalaiakean bailiu maasa bagakKu masiitco sia.

²⁴ Tapoi amanibongan Aku katubum: Kam le geti masikukudduiji polakra samba Aku le geti masiake katubumui ibailiu bakkatietmui, sara laggai sipususukkra susu samba suat mani; Aku te Tuhan, Taikamanuamui, sisaraake kam ka sangamberi bangsa bagei.

²⁵ Buita nupabaggei kam tarimeu ta keikeit samba keikeiet, samba uma' keikeiet sibara ka sitakeikeiet, bule bui nubailiuake tububumui kasitsitakenen kalulut terimeu siepat rere samba sangamberi uma' samba sangamberi sipugugurui ka polak, sisaraakenenKu bule nukeikeiake kamnia.

²⁶ Pusipunenan kam katubukKu, kalulut Aku nene, Tuhan, sipunenan samba akusaraakean kam ka sangamberi bangsa bagei, bule ibailiu kam bakkatKu.

²⁷ Ke sara simanteu samba sinanalep iguruki ketsat ele ketsat sipukekerei, buita tuukum sia simateiakenen, iate tupabaijungi sia bukku samba logaura tuorakake katubutda.”