3Mos. 19 - BUKO SIPUNENAN

Pusisipunenannia purimanuaiat

¹ Kuanangan si Tuhan katubut Mose:

² “Panibo ka sangamberi paamian Israel samba kua katubutda: “Kau le numasipunenan kam, kalulut Aku, Tuhan, Taikamanuamui, sipunenan.

³ Senen sirimanua katalagamui buita isuru' inania samba ukkuinia samba masipuneni sangamberi gogoi SabatKu; Aku te Tuhan Taikamanuamui.

⁴ Bui' nupanindogi kam sabulungan samba bui nugalai kam tularat siuruakenen panindogietmui; Aku te Tuhan Taikamanuamui.

⁵ Ke nupanguruatnake kam buluakenen puaraugat, katubut Tuhan, buita nupanguruatake kam kele kisene, pat obanangan kam si Tuhan.

⁶ Samba buita nukom kam nenda ka gogoi nupanguruatake kamnnia ele momoi leuet ka mansepnia, tapoi aponia sipulelegei teret ka gogoi sikatelu buita nulaboake kam isappru.

⁷ Ke nukom kam ka gogoi sikatelu, oto nenda ibailiu le sara kasitsitakenen samba sirimanua nenda ta iobania si Tuhan.

⁸ Kasei pa masikom nenda, ibairat le geti puseselenia, kalulut aipasabauan pusisipunenan panguruat sipunenan katubut Tuhan. Engan sirimanua nenda buita tutataake katalagat bangsania.

⁹ Kateteret numonei buat monemui, bui itata numonei kam moneietmui pat aili ka ebbeinia, samba bui nuambut aponia pa sipulelegei ka moneietmui.

¹⁰ Kisedda leuet buat anggurmui sipulelegei buian nuappek kam nia karuangamincania samba buania sibebele ka monen anggurmui bui nuambut kamnia, tapoi sangamberinia nenda buita nukaddiuake kam ka sirimanua simageba samba ka sirimanua siooiake; Aku te Tuhan, Taikamanuamui.

¹¹ Bui' nupananggkou kam, bui nupaboko samba bui nupataju kam ka pasasambamui.

¹² Bui' nupusuppa kam kapabokoat kabagat oiningKu, bule bui nupasabau kam pusisipunenan onin Taikamanuamui; Aku te Tuhan.

¹³ Bui' nupajo saaleinu sirimanua samba bui nuraurau; bui nukeraake upa sara sirimanua sipugagalai senen gogoi pat aili ka mansepnia.

¹⁴ Bui' nutelei sitaimaarep piu samba kamatatda simapeset bui nukau bukku tuluiet, tapoi kau le numaloto ka Taikamanuamui; Aku te Tuhan.

¹⁵ Bui nugalaiake patajuat kabagat pasiukuman; bui nuropake sirimanua sitaiaddeakenen ka enungan ta siripokatnia samba bui numare're' ka sirimanua siabeu tiboi tubu, tapoi kau nupasiukum saaleinu sirimanua kabagat pubulanan.

¹⁶ Bui' nuei kaipapa masipararat paloloiat katalagat sangamberi sirimanua sabangsamui; bui nupalotoki purimanuaiat saaleinu sirimanua; Aku te Tuhan.

¹⁷ Bui' imalaga bagam katubut saaleinu kapatuatnu, tapoi kau nukua kamatania paasekatnu ka saaleinu samba bui nubaraake jo katubum kalulut nia.

¹⁸ Bui' nuala lumun, samba nukoiriake lagat bagam ka sangamberi sirimanua sabangsam, tapoi kau imanuntu bagam katubut saaleinnu kele nuntut bagam katubum; Aku te Tuhan.

¹⁹ Kau nuukkaake kam siteuakenenKu. Bui nutalimouake rua ngamata tarimeu samba bui nukarapake ka monem rua ngamata uremen, samba bui nupakei leppei bibilet sigalai sibara ka rua ngamata galajetnia.

²⁰ Ke sara simanteu masipaperepake sara sinanalep, iate sara pagugulet sinanalep ainia kabagat kupkumen simanteu bagei, tapoi sitapei atutebui samba leu tukau surat toggaiat kabebelania, oto sigalaiakenen nenda buita tuukumake; tapoi ta karuania tuukumake simateiakenen, kalulut sinanalep nenda tapei atubelaake.

²¹ Simanteu nenda bui ta iambit panebui selenia katubut Tuhan kamatatbaliu Sapou Paailiat, iate sangamuneng biribiri simanteu sibailiu buluakenen pasitebui selenia.

²² Buita ibaraake si imam pasiabanan ka sirimanua nenda iate biribiri simanteu buluakenen panebui sele kamatat Tuhan, kalulut jo sigalaiakenennia, bailiu silonangan katuappekat ka jonia nenda.

²³ Ke atuguruan kam ka laggai nenda samba masiurepake sengamata loina buat kaju, bui nuappek kam buania telungarura burunia samba bui nukom kamnia.

²⁴ Tapoi ka rura sikaepat, sangamberi buania buita ibailiunia panguruat sipunenan sibailiu pasiumunan katubut Tuhan.

²⁵ Ka rura sikalima geti momoian nukom kam buania, bule ituppai buania kakam; Aku te Tuhan, Taikamanuamui.

²⁶ Bui' nukom aponia pa ke aipeile logaunia. Bui nugalaiake pukekerei.

²⁷ Bui' nusapu bebet alai utenu sangalionia samba bui nupakatai bebet bulut bakklam

²⁸ Bui' nupagoroni tubum kalulut sirimanua simamatei samba bui nupatiktiki sangamberi toggaiat ka kulitnu; Aku te Tuhan.

²⁹ Bui' nupakatai pusiokkot togam sinanalep, kabagat nubailiuakenia sinanalep simaolop tubu, bule laggai nenda bui igalaiake puoloman tubu, bailiu laggai nenda sun kapasigagalaiake puailaat.

³⁰ Kau nupuneni kam sangamberi gogoi SabatKu samba masisuru kudduat sipunenanKu; Aku te Tuhan.

³¹ Bui' nuei kam ka ketsat sirimanua simamatei ele ka sangamberi ketsatda sipatutuptup; bui nugaba kam sia samba kalulut nenda ibailiu le ekeu kasitsitakenen kalulut sia; Aku te Tuhan, Taikamanuamui.

³² Kau nutusuru murio kamatatda sirimanua simaubat samba buita nukau tabi' ka saukkui samba kau numaloto ka Taikamanuam; Aku te Tuhan.

³³ Ke mukuddu sara sirimanua siooiake katubum ka laggainu, bui nupaoreijinia.

³⁴ Sirimanua siooiake sikuddu katubum buita makerenia kekeu kele tai Israel siturerere katalagamui, pununtukinia baga kele nupununtuki baga tubum, kalulut siburu ekeu leuet sirimanua siooiake ka laggai Misir; Aku te Tuhan, Taikamanuamui.

³⁵ Bui' nugalaiake pajoat kabagat pasiukuman, pagalaiat kirekat, pasikilo samba tekong.

³⁶ Pasikilo sigoiso simaeru, bukku pasikilo simaeru, efa simaeru samba hin simaeru buita nupakei; Aku te Tuhan Taikamanuamui, siambit kam bela ka laggai Misir.

³⁷ Oto kisedda te buita nuukkaake kam sangamberi siteuakenenKu samba sangamberi surukatKu samba masigalaiake sangamberinia nenda; Aku te Tuhan.”