3Mos. 18 - BUKO SIPUNENAN

Pusisipunenannia putalimougat

¹ Kuanangan si Tuhan katubut Mose:

² “Panibo katubutda tai Israel samba kua katubutda: Akute Tuhan Taikamanuamui.

³ Bui nugalaiake kam kele sigalaiakenen sirimanua ka Misir, ka kudduatmui siburu; samba leu bui nugalaiake kam kele sigalaiakenen sirimanua ka Kanaan, ka siambitKu kam; bui nupurimanua kam siripot katukelatda.

⁴ Buita nugalaiake kam surukatKu samba masiukkaake ka siteuakenenKu kabagat puririmnua siripot sangamberinia nenda; Aku te Tuhan Taikamanuamui.

⁵ Bulatnia te buita nuukkaake kam siteuakenenKu samba surukatKu. Sirimanua sigalaiakenia, murimanua le nia kabagania; Aku te Tuhan.”

⁶ Kenanen kasei pa katalagamui bui ilegeri saepppunia simalegre bule ibukaake kailaakenennia; Aku te Tuhan.

⁷ Bui' nukulaake kailaakenen sinanalep ukkuinu, kalulutnia bakat ukkuinu; nia inam, oto bui nukulaake kailaakenennia.

⁸ Bui' nukulaake kailaakenen sara katalagat sinanalep ukkuinu, kalulut nia bakkat ukkuinu.

⁹ Pagalaiat kailaakenen maniunu sinanalep, togat ukkuinu ele togat inam, ele siputu'tumata ka lalep ukkuinu ele siputu'tumata ka bagei, bui nukulaake kailaakenennia.

¹⁰ Pagalaiat kailaakenen toga sinanalep sibara ka togam simanteu ele togam sinanalep, bui nukulaake kailaakenennia, kalulut kisedda nupalolit le muntogatnu.

¹¹ Pagalaiat kailaakenen toga sinanalep sibara katalagat sara sinanalep ukkuinu, sipututu'tumata ka ukkuinu, bui nukulaake kailaakenennia, kalulut nia maniunu sinanalep.

¹² Bui nukulaake kailaakenen maniu ukkuinu sinanalep, kalulut nia epput ukkuinu.

¹³ Bui nukulaake kailaakenen sarainan inam sinanalep, kalulut nia epput inam.

¹⁴ Bui nukulaake kailaakenen sinanalep sarainan ukkuinu simanteu, bui nupaperepake sinanalepnia, kalulut nia sinanalep sarainan ukkuinu.

¹⁵ Bui nukulaake kailaakenen talikum sinanalep, kalulut nia sinanalep togam simanteu, oto bui nukulaake kailaakenennia.

¹⁶ Bui nukulaake kailaakenen sinanalep sarainam simanteu, kalulut nenda bakkat sarainam simanteu.

¹⁷ Bui nukulaake kailaakenen sara sinanalep samba togania sinanalep. Bui nuala toga sinanalep sibara ka togania simanteu ele sibara ka togania sinanalep bule nukulaake kailaakenennia, kalulut sia iate saeppum; nenda te galajet paelenan.

¹⁸ Bui' nuala sara sinanalep sibailiu sinanalepnu bagit sinanalepnu bule nukulaake kailaakenennia kabebet kebbunia kaburut aipelenia muririmanua.

¹⁹ Bui' nupaperepake sara sinanalep kateteret pulolinan komaknia kasitsitakenen bule nukulaake kailaakenennia.

²⁰ Samba bui' nupaperepake sinanalep sapunualeinu, bailiunangan ekeu kasitsitakenen pasambania.

²¹ Bui' nukau kam sara tatogamui bule itupanguruatake katubut Molokh, bule bui nupasabau kam pusisipunenan onin Taikamanuamui; Aku te Tuhan.

²² Bui' nupaperepake sara simanteu kele ipaperepake sinanalep, kalulut nenda katusitsinan.

²³ Bui nugalai paelenan ka senengamata tarimeu, bailiunangan ekeu kasitsitakenen pasamba tarimeu nenda. Sara sinanalep bui ipurio kamatat sara tarimeu ipaelet, kalulut nenda sara galajet katusitsinan.

²⁴ Bui' nukasitsitake tubum ka sangamberinia nenda, kalulut ka sangamberinia nenda sangamberi bangsa kekeletKu geti kamatamui aibailiuan katusitsinan.

²⁵ Laggai nenda aibailiuannia kasitsitnakenen samba Akulumunakean puseleatnia katubunia, bailiu laggai nenda masigelekake sikudduijinia.

²⁶ Tapoi kam nene buita mariuri nuukaake kam siteuakenenKu samba surukatKu samba bui' nugalaiake kam berisara ka sangamberi kasitsitnakenen nenda, ele tai Israel siturerere ele siooiake sipukukuddu katalagamui,

²⁷ – kalulut sangamberi kasitsitnakenen nenda aragalaiakean sipuboboiki sikudduiji laggai kepei kam, bailiu laggai nenda aibailiuan kasitsitnakenen

²⁸ bule bui igelekake kam laggai nenda, ke nusitsitake kamnia, kele bangsa sigelekakenennia kepei kam.

²⁹ Kalulut senen sirimanua sigalaiake sara ka sengamberi kasitsitakenen nenda, sirimanua nenda buita tutataake katalagat bangsania.

³⁰ Oto kabagat nene buita mariuriu nuukkaake kam galaiakenenmui katubukKu, samba bui nugalaiake sara katukelat sitsitakenen nenda, sigalaiakenen kepei kam, samba bui nukasitsitake kam tubumui ka sangamberinia nenda; Aku te Tuhan, Taikamanuamui.”