3Mos. 17 - BUKO SIPUNENAN

Kudduat pasijajakat samba masipanguruatake buluakenen

¹ Kuanangan si Tuhan katubut Mose:

² “Panibo katubut Aron samba ka tatogania samba ka sangamberi tai Israel, samba kua katubutda: Nene te tiboiet siparentaakenen Tuhan:

³ Senen sirimanua sibara ka muntogat Israel sipasijaja'ja jaui ele biribiri ele kambing kabagat pusapougat ele ka ujania,

⁴ tapoi ta aiambit ka matatbaliu Sapou Paailiat, bule itupanguruatnake sibailiu panguruat katubut Tuhan kamatat Sapou Sipunenan Tuhan, pagalaiat nenda bui tatuaddeake ka sirimanua nenda sibailiu utak logau, kalulut aipiliakean poi logau, samba sirimanua nenda bui ta tutataake le nia katalagat bangsania.

⁵ Katukolobatnia bule tai Israel masiambit buluakenenda jajaket, simatukle rapanguruatake ka polak simalio, katubut Tuhan ka matatbaliu Sapou Paailiat pasamba masikau katubut imam, bule itupanguruatake katubut Tuhan sibailiu buluakenen katuaraugat.

⁶ Buita isubuiake si imam logau tarimeu nenda ka kudduat pasibuluat katubut Tuhan kamatat matatbaliu Sapou Paailiat samba labonangan tabenia ibailiu singinnia siangkaake bagat Tuhan.

⁷ Buian rapanguruatake minca buluakenenda ka sangamberi sikameinan, kalulut masipanindogi sikameinan nenda iate paelenan. Nenda te bulat ibailiu siteuakenen ka sia teret buruburu samba mupaninikat.

⁸ Samba buita nukua katubutda: Senen sirimanua sibara ka muntogat Israel ele siooiake sipukukuddu katalagatda, sipanguruatake buluakenen silabo ele buluakenen ja'jaket,

⁹ tapoi ta aiambit ka matatbaliu Sapou Paailiat bule tupanguruatake katubut Tuhan, oto sirimanua nenda buita tutataakenia katalagat sangamberi sirimanua sabangsania.”

Keraet pagalaiat mukom logau ele tubu simamatei

¹⁰ “Senen sirimanua sibara ka muntogat Israel ele siooiake sipukukuddu katalagatda, sipasikom logau aponia pa Aku le masigogolunia samba masitatataakenia katalagat bangsania.

¹¹ Kalulut engan senen sipungongoingoi ai kabagat logaunia samba Akuakean logau nenda katubumui ka uddut kudduat pasibuluat bule itubaraake pasiabanan ka engamui, kalulut logau ibaraake pasiabanan ka paneteiat enga.

¹² Nenda te lulunia Akupanibo ka tai Israel: Bui ibara sara katalagamui bui ikom logau. Kisedda leuet siooiake sikuddu katalagamui tamomoi ikom logau.

¹³ Senen sirimanua sibara ka tai Israel samba sirimanua siooiake sipukukuddu katalagamui, sipasilalaba kabagat pasikukurat sangamuneng tarimeu ele uma' sioi itukom, buita ipiliake logaunia, lepa labbunangannia pasamba polak.

¹⁴ Kalulut logau nenda te engan sangamberi sipungongoingoi. Kalulut nenda Akukuangan katubutda tai Israel: Bui nukom kam logau aponia pa sipungongoingoi, kalulut logau nenda te engan sangambari sipungongoingoi: senen sirimanua sikomnia buita tutataakenia.

¹⁵ Samba senen sirimanua sipasikokom simamatei ele legei sisabbangan tarimeu simasabbak, ele nia tai Israel siturerere ele siooiake, buita itapatap leppeinia, ibui tubunia pasamba oinan samba nia ibailiu le kasitsitakenen teret bele sulu, iapeite ibailiunia malina.

¹⁶ Tapoi ke ta itaptap leppeinia samba ta ibui tubunia, ibairat le geti siripot puseleatnia.”