3Mos. 15 - BUKO SIPUNENAN

Taipulilinat taimanteu samba tainanalep

¹ Kuanangan si Tuhan kai Mose samba kai Aron:

² “Panibo kam ka tai samba kua kam: Ke kailaakenen ka sara simateu bela suat tubu, oto kasitsitakenen le nia kalulut tubu nenda.

³ Kise te katusitsinannia sipaorak ka tubunia nenda: ke kailaakenennia iobaake ipuguruk suat tubu nenda ele ikeraake kailaakenenia bailiu ta bela suat tubu, oto nenda katusitsinannia.

⁴ Senen pereman, siperemin sirimanua sibelaake suat tubu nenda bailiu kasitsitakenen, samba senen bibilet sikudduijinia ibailiu leuet kasitsitakenen.

⁵ Senen sirimanua siorak peremannia buita itaptap leppeinia, ibui tubunia pasamba oinan samba ibailiu le nia kasitsitakenen teret bele sulu.

⁶ Kasei pa sikuddu ka uddut bibilet sikudduijit sirimanua kele kisedda buita itaptap leppeinia, ibui tubunia pasamba oinan, samba nia ibailiu kasitsitakenen teret bele sulu.

⁷ Kasei pa siorak ka tubut sirimanua kele nenda, buita itaptap leppeinia, ibui tubunia pasamba oinan samba bailiunangannia kasitsitakenen teret bele sulu.

⁸ Ke sirimanua kele nenda masiluji sirimanua simalina, buita itaptap leppeinia sirimanua siorak luji nenda, ibui tubunia pasamba oinan samba ibailiu le nia kasitsitakenen teret ibele sulu.

⁹ Samba senen apot kudduat sikudduijiet sirimanua kele nenda ibailiu kasitsitnakenen.

¹⁰ Senen sirimanua siorak ka sara sikudduijit sirimanua nenda silelepa, bailiu kasitsitakenen teret ibele sulu. Kasei pa masiakkatakenia, buita itaptap leppeinia, ibui tubunia pasamba oinan samba nia bailiu kasitsitakenen teret ibele sulu.

¹¹ Samba senen sirimanua siorak ka sirimanua kele nenda, tapoi ta aibui boiki kabeinia pasamba oinan, buita itaptap leppeinia, ibui tubunia pasamba oinan bailiu nia kasitsitakenen teret ibele sulu.

¹² Ke iorak sara sirimanua koali polak, koali polak nenda buita turagatnake, samba sangamberi pugalai sibara ka loina buita tubui pasamba oinan.

¹³ Ke amalinaan bai sirimanua kele nenda sibara ka suat tubunia, buita iadde pitungagogoi minca bule ioi tupoiliat pulilinania, lepa taptapnangan leppeinia, buinangan tubunia pasamba oinan sipuguguruk oto bailiu nia malina.

¹⁴ Ka gogoi sikabalunia buita iala ruangamuneng uma' limendeu ele ruangamuneng togat marpati, samba mei kamatat Tuhan, kamatat matatbaliu Sapou Paailiat, samba masikau sangamberi uma' nenda katubut imam.

¹⁵ Iageti buita ipanguruatnake si imam sisangamuneng sibailiu buluakenen pasiappet jo, samba sangamuneng minca sibailiu buluakenen silabo. Kise te ibarake si imam paabanan ka sirimanua nenda kamatat Tuhan, kalulut suat tubunia.

¹⁶ Ke mapili bai suat tubunia sara simanteu, buita ibui sangaliot tubunia pasamba oinan samba nia ibailiu kasitsitakenen teret bele sulu.

¹⁷ Senen leppei ele samba kulit, siorak suat tubu simapipili nenda, buita tutaptap pasamba oinan samba bailiu kasitsitakenen teret bele sulu.

¹⁸ Kisedda leuet sara sinanalep, ke sara simanteu ipaperepakenia samba ke ai suat tubunia simapipili, oto karuatda buita rabui tubutda pasamba oinan samba sia bailiu kasitsitakenen teret bele sulu.

¹⁹ Ke sara sinanalep bela suat tubunia, samba suat tubu nenda iate logau sibara ka kailaakenennia, buita pitungagogoi burunia kabagat pulololit komaknia, samba senen sirimanua siorak katubunia, bailiu kasitsitakenen teret bele sulu.

²⁰ Sangamberi sipereminia ka burut aipeile nia kabagat pulolinan komak ibailiu kasitsitakenen, samba sangamberi sikudduijinia ibailiu leuet kasitsitakenen.

²¹ Senen sirimanua siorak pereman sinanalep nenda bui taitaptap le leppeinia, ibui tubunia pasamba oinan samba ibailiu le nia kasitsitnakenen teret ibela sulu.

²² Senen sirimanua siorak sara bibilet sikudduiji sinanalep nenda bui taitaptap le leppeinia, ibui tubunia pasamba oinan samba ibailiu le nia kasitsitnakenen teret ibele sulu.

²³ Kisedda leuet kateteret ioraknia apa pa' sibabara ka pereman ele ka uddut bibilet sikudduijiet sinanalep nenda, ibailiu le nia kasitsitnakenen teret ibele sulu.

²⁴ Ke sara simanteu paloplop ka sinanalep nenda samba ioraknia suat tubu simalilit nenda, oto ibailiu le nia kasitsitnakenen pitu ngagogoi burunia, samba senen pereman sipereminia leu ibailiu kasitsitnakenen.

²⁵ Ke sara sinanalep masibelaake sipugogoi burunia suat tubu, iate suat tubu logau ta kateteret pulolinan komaknia, ele ibelaake suat tubu makope buru kateteret pulolinan komaknia, oto kaburut suat tubunia kasitsitakenen nenda, sinanalep nenda iate kele ka gogoi pulolinan komaknia, iate kasitsitakenen le nia.

²⁶ Senen pereman siperemiennia, ka burunia ibela suat tubunia, peremannia buita kele kateteret pulolinan komaknia samba senen bibilet sikuddujietnia ibailiu le kasitsitakenen makere kele kasitsitnakenen pulolin komaknia.

²⁷ Senen sirimanua siorak sangamberi bibilet nenda ibailiu le' kasitsitakenen, samba buita itaptap komaknia, masibui tubunia pasamba oinan, samba ibailiu le nia kasitsitakenen teret ibele sulu.

²⁸ Tapoi ke amalengan sinanalep nenda ka suat tubunia nenda, buita iadde pitungagogoi minca, lepa nenda iapei malinangan.

²⁹ Ka gogoi sikabalu buita iambit ruangamuneng uma' limendeu ele ruangamuneng togat ngorut samba kaunangannia katubut imam kamatat matatbaliu Sapou Paailiat.

³⁰ Si imam buita ipanguruatake sisangamuneng sibailiu buluakenen pasiappet jo, samba sangamuneng minca buluakenen silabo. Oto kisedda te si imam ibaraake paabanan ka sirimanua nenda kamatat Tuhan, kalulut suat tubu kasitsitakenen nenda.

³¹ Kisedda te nuareuake kam tai Israel ka kasitsinakenia, bule bui ramatei kabagat kasitsinanda, ke rakasitsitake Sapou SipunenanKu siturere katalagatda nenda.”

³² Nenda te surukat pagalaiat sara simanteu sibelaake suat sinaugat ele simapipili suat tubunia sibailiuakenia kasitsitakenen,

³³ samba pagalaiat sara sinanalep sipuoinan tubu samba pagalaiat sara sirimanua simanteu ele sinanalep sibelaake suat tubu, samba pagalaiat simanteu sipaperepake sinanalep kasitsitakenen.