3Mos. 14 - BUKO SIPUNENAN

¹ Kuanangan si Tuhan kai Mose,

² nene te buita ibailiu surukat pagalaiat sirimanua sibara besik bokbong ka gogoi pasilinakatnia: buita tuambitnia kai imam,

³ samba si imam buita mei nia ka ujat pusapougat; ke siripot siitcokat imam besik nenda amalengan katubunia,

⁴ oto si imam buita iparentaake, bule sirimanua linaakenen nenda tuala rua ngamuneng uma' sipuririmanua samba uma' ta keikeiet, samba leu loina pinilok, komak laka samba hisop.

⁵ Buita iparentaake si imam bule uma' sangamuneng tujaja ka uddut koali polak sibara kabagania oinan sipuguguruk.

⁶ Tapoi uma' sipuririmanua buita iala pasamba loinat pinilok, komak samba hisop, lepa pasamba uma' nenda sangamberinia buita tusopsopake kabagat logau uma' silepa ja'ja' ka uddut oinan sipuguguruk nenda.

⁷ Lepa geti soksokakenangan logau uma' nenda pitungaminca katubut sirimanua aleakenen geti sibara besik bokbong, kisedda te itupalinannia, lepa uma' sipuririmanua nenda buita tubelaake ka polak simalio.

⁸ Sirimanua aleakenen nenda buita itaptap leppeinia, isapu sangamberi alainia samba ibui tubunia pasamba oinan, oto malinanangan. Lepa nenda momoi ituguru kabagat pusapougat, tapoi buita mukuddu ka ujat sapounia pitungagogoi burunia.

⁹ Oto ka gogoi sikapitu buita isapu sangamberi alainia, alai ute, bulut bakkla, arepet, beringan leu sangamberi bulunia buita isapu, leppeinia tutaptap, samba tubunia tubui pasamba oinan; oto bailiunangannia simalina.

¹⁰ Ka gogoi sikabalu buita iala ruangamuneng biribiri simanteu simaeru tubu samba sangamuneng biribiri sinanalep si sangarura, simaeru tubu samba telupersepulu efa tapung bulat simaeru sigalai pasamba tula sibailiu buluakenen sinantatakenen, samba leu sara log tula.

¹¹ Si imam sigalaiake pasilinakat nenda, buita igalakake sirimanua linaakenen geti pasamba panguruatnia kamatat Tuhan kamatat matatbalou Sapou Paailiat.

¹² Samba buita iala biribiri simanteu sisangamuneng samba panguruatakenangannia sibailiu panebui sele pasamba tula sisara log nenda, samba buita ipanguruatake sibailiu panguruat sitotoiakenen kamatat Tuhan.

¹³ Biribiri simanteu nenda buita ija'ja ka kudduat pasija'ja'katda buluakenen pasiappet jo samba buluakenen silabo ka kudduat sipunenan, kalulut buluakenen panebui sele kisedda leu buluakenen pasiappet jo, iate rubeiat imam, iate rubeiat simakope sipunenan.

¹⁴ Buita iala si imam goiso logau panebui sele nenda, samba buita ilokotake ka buluk piu sikattotet sirimanua linaakenen nenda samba ka sikebbut singongai kabei sikattoet samba ka sikebbukat singongai rere sikattoet.

¹⁵ Buita iala goiso tula si imam sibara ka sara log nenda samba uruakenangannia ka takep kabei sikatciu imam;

¹⁶ buita isopake singongai kabeinia ka tula sikuddu kabagat takep kabeinia sikatciu nenda samba buita isoksokake goiso tula nenda pasamba singongainia pitungaminca kamatat Tuhan.

¹⁷ Sibara ka legei tula nenda, buita ilokotake goiso si imam ka piu sikattoet sirimanua nenda, ka sikebbut singongai kabeinia sikatoet samba ka sikebbut singongai rerenia sikattoet, ka kudduat aitulokotake logau pasibuluat panebui sele.

¹⁸ Samba aponia sipulelelegei ka tula nenda buita ilokotake ka utet sirimanua linaakenen geti. Oto kisedda te ibaraake paabanan ka sirimanua nenda kamatat Tuhan.

¹⁹ Lepa geti buita ipanguruatake si imam buluakenen pasiappet jo samba kisedda te ibaraake paabanan ka sirimanua linaakenen geti ka pulolinannia, samba ka lepat nenda buita ija'ja buluakenen silabo.

²⁰ Samba buita ipanguruatake si imam buluakenen silabo samba buluakenen sinantatakenen ka uddut kudduat pasibuluat. Oto kiseda te si imam masibaraake paabanan ka sirimanua nenda, oto bailiu malina.

²¹ Ke sirimanua nenda simageba samba taanai sibabara, bui ta iambit sangamuneng le biribiri simanteu sibailiu panebui sele kaunen panguruat sitotoiakenen bule ibara paabanan ka sirimanua nenda, samba leu sepersepuluh efa tapung simaeru tugalai pasamba tula kaunen buluakenen sinantatakenen, samba sara log tula.

²² Samba leu minca rua ngamuneng uma' limendeu ele rua ngamuneng ngorut siripot sioi ibaraake, sisangamuneng buita ibailiu buluakenen pasiappet jo samba sisangamuneng minca ibailiu buluakenen silabo.

²³ Ka gogoi sikabalu buita iambit sangamberinia nenda kai imam pakeiet pasilinakatnia, kamatat matatbaliu Sapou Paailiat ka matat Tuhan.

²⁴ Iageti si imam buita iala biribiri panebui sele samba tula sisara log, lepa si imam buita ipanguruatake sangamberinia nenda sibailiu panguruat sitotoiakenen kamatat Tuhan.

²⁵ Buita ija'ja togat biribiri panebui sele nenda si imam samba buita iala goiso si imam logau panebui sele nenda samba lokotnakenangannia ka buluk piu sikattoet sirimanua nenda samba ka sikebbut singongai kabei sikattoet samba sikebbut singongai rerenia sikattoet.

²⁶ Samba buita iuruake goiso tula si imam ka takep kabei imam sikatciunia,

²⁷ iageti tula goiso nenda buita isoksokake si imam pasamba singongainia sikattoet pitungaminca kamatat Tuhan.

²⁸ Iageti si imam buita ilokotnake goiso tula nenda ka buluk piu sikattoet sirimanua linaakenen, ka sikebbut singongai kabeinia sikattoet samba sikebbuat singongai rerenia sikattoet, ka kudduat aitulokotake logau ka panebui sele nenda.

²⁹ Samba aponia sipulelelegei ka tula nenda buita ilokotake ka utet sirimanua linaakenen geti. Oto kisedda te ibaraake paabanan ka sirimanua nenda kamatat Tuhan.

³⁰ Lepa buita ipanguruatake sangamuneng sibara ka rua uma' limendeu ele togat uma' ngorut siambitda sirimanua nenda teret sioi itarekake,

³¹ sangamuneng sibailiu buluakenen pasiappet jo, samba sangamuneng minca sibailiu buluakenen silabo, pasamba sinantatakenen. Oto kisedda te si imam ibaraake paabanan ka sirimanua linaakenen geti kamatat Tuhan.

³² Nenda te surukat pagalaiat pasilinakat sara sirimanua siorak besit bokbong ka simageba.

³³ Kuanangan si Tuhan kai Mose samba kai Aron

³⁴ “Ke atuguruan kam ka polak Kanaan akenenKu geti katubumui ibailiu bakkatmui samba Kubabaraake te toggaiat besit bokbong ka sara lalep ka laggai bakkatmui nenda,

³⁵ oto sibakkat lalep nenda buita moi ipaagaiakenia katubut imam: Ai makoinong kele toggaiat besit bokbong ka lalepku.

³⁶ Oto parentaakenangan si imam bule tukaddiuake lalep nenda, kepei moi si imam masiitco toggaiat besik bokbong nenda, bule ta ibailiu kasitsitakenen sangamberi sibabara ka lalep nenda, samba lepa nenda si imam mei masiitconia.

³⁷ Ke siripot siitconia toggaiat ka rupit lalep nenda iate sibaranan simakalimun ele simakabonan makeru peile nia ka uddut rupi nenda,

³⁸ buita bela ka lalep nenda si imam, lepa purionangan kamatat matabaliu lalep, samba patpatakenangan lalep nenda pitu ngagogoi burunia.

³⁹ Ka gogoi sikapitu si imam buita meinia minca; ke siripot pasiitcokatnia toggaiat besit bokbong nenda malilio le ka rupit lalep,

⁴⁰ oto si imam buita iparentaake bule rasukkai sirimanua sangamberi bukku siorak toggaiat nenda samba ribbaiakerangannia ka ujat laggai ka sara kudduat kasitsitakenen.

⁴¹ Samba buita ikirit lalep nenda ka isit kabaga sangalionia, samba sikirinan nenda buita turugutake ka ujat laggai ka sara kudduat kasitsitakenen.

⁴² Samba sirimanua buita raala bukku bagei, lepa ottotakerangannia sibailiu silit sangamberi bukku sisukkai nenda, samba buita raala lepo bagei samba lepoakerangannia ka lalep nenda.

⁴³ Tapoi ke muottou minca toggaiat kabagat lalep nenda, kalepat aitusukkai sangamberi bukkunia samba kalepat aitukirit lalep nenda, samba leu kalepat aitulepo minca,

⁴⁴ samba ke moi si imam samba siripot siitcokatnia malilio le toggaiat nenda kabagat lalep, oto besik bokbong simakope katai le kabagat lalep nenda, samba lalep nenda kasitsitakenen.

⁴⁵ Lalep nenda buita turagat, iate bukkunia, loinania samba sangamberi lepot lalep nenda, lepa geti sangamberinia nenda tuambit ka ujat laggai ka sara kudduat kasitsitakenen.

⁴⁶ Samba sirimanua situguguru kabagat lalep nenda kaburut aitupatpatake lalep nenda, ibailiu le kasitsitakenen teret bele sulu.

⁴⁷ Samba sirimanua sipeperep kabagat lalep nenda buita itaptap leppeinia; kisedda leu sirimanua sipukokom kabagat lalep nenda buita itaptap leppeinia.

⁴⁸ Tapoi ke moi si imam samba siripot siitcokatnia ta malilio toggaiat nenda kabagat lalep, ka lepat itulepo, oto buita ipoiliat lalep nenda malina, kalulut toggaiat nenda amapepengan.

⁴⁹ Iageti, kabagat masipalina lalep nenda, buita iala ruangamuneng uma', loinat pinilok, komak laka samba hisop.

⁵⁰ Uma' sisangamuneng bui ija'ja ka uddut koali polak sibara oinan sipuguguruk.

⁵¹ Lepa buita iala loinat pinilok, samba hisop, komak laka samba uma' sipuririmanua nenda, samba sopmakenangan sangamberinia ka logau uma' silepa'ja'ja samba kabagat oinan sipuguguruk nenda, lepa buita isoksokake ka lalep nenda pitungaminca.

⁵² Kisedda te bulat ipalina lalep nenda pasamba logau uma', oinan sipuguguruk, uma' sipuririmanua, loinat pinilok, hisop samba komak laka.

⁵³ Samba uma' sipuririmanua nenda buita tubelaake ka ujat laggai, ka polak simalio. Kisedda te aibaraake paabanan ka lalep nenda, oto lalep nenda bailiu malina.

⁵⁴ Nenda te surukat pagalaiat senen besik bokbong, guigui ka ute,

⁵⁵ pagalaiat bokbong ka leppei samba ka lalep,

⁵⁶ pagalaiat simago, simaguigui samba belua,

⁵⁷ bule masiake pasiaagai ka pagalaiat kasitsitakenen ele kapagalaiat kalilina; iate surukat pagalat besit bokbong.”