3Mos. 13 - BUKO SIPUNENAN

Lubbe' simasappo

¹ Kuanangan si Tuhan katubut Mose samba kai Aron:

² “Ke ai ka kulit sara sirimanua sipugogo eleu simatiet ele belua, ele momoi ibailiunia besik bokbong simasappo ka kulitnia, buita tuambitnia kai imam Aron, ele ka sara katalagatda tatogania, tai imam nenda.

³ Si imam bui taiitco besik ka kulit nenda, samba ke bulu ka kudduat besik nenda aibailiuan simabulau, samba besik nenda makeru peilenia ka kulit, oto nenda iate besik bokbong simasappo; ke iitco si imam pagalaiat nenda, buita ipoiliat sirimanua nenda iate kasitsitakenen.

⁴ Tapoi ke sibabara ka kulitnia nenda sarat belua simabulau le samba ta makope kerunia ka kulit, samba bulunia ta ibailiu mabulau, buita iluplupakenia si imam sirimanua nenda pitungagogoi burunia.

⁵ Ka gogoi sikapitu, bui taiitconia si imam, ke siripot siitconia besik nenda aipeile samba ta malilionia ka kulit, buita iluplupakenia si imam pitungagogoi minca ka ruangamincania.

⁶ Iageti ka gogoi sikapitunia bui taiitconia si imam ka ruangamincania, ke amakamungan besik nenda samba ta malilio ka kulit, buita ipoiliat si imam kalilinania; nenda simaguigui le. Buita itaptap leppeinia sirimanua samba bailiunangannia simalina.

⁷ Tapoi ke bulat malilio le simaguigui nenda ka kulit, ka lepat aiitconia si imam bule ipatoila pulilinania, buita itiddou ituitconia ka ruangamincania.

⁸ Ke siripot siitcot imam malilio le simaguigui nenda ka kulit, buita ipoiliat si imam katusitsitnan sirimanua; nenda iate besik bokbong simasappo.

⁹ Ke iorak sara sirimanua besik bokbong simasappo, bui ta tuambitnia kai imam.

¹⁰ Ke siripot siitcot imam ka kulitnia ai simago' simabulau, sibailiuake bulunia mabulau, samba ai akkula bagei situotou ka simago nenda,

¹¹ oto besik bokbong siburu le ka kulit nenda. Buita ipoiliat si imam katusitsinannia samba ta iluluplupakenia, kalulut sirimanua nenda kirenangan aibailiuannia katusitsinan.

¹² Ke besik bokbong nenda bara ka sangaliot kulit, bailiu tabbonangan sangaliot kulit sirimanua nenda, barania ka ute pat aili ka rerenia, piga pa siitcokat imam,

¹³ samba ke siripot siitconia besik simasappo nenda masitabbo sangaliot tubu sirimanua nenda, oto buita ipoiliat si imam pulilinania; ka sangamberi tubunia aibailuan simabulau, oto malina le nia.

¹⁴ Tapoi ke bara simatotoila akkula situottou katubunia, kasitsitakenen le nia.

¹⁵ Ke iitco si imam akkula situottou nenda, buita ipoiliat sirimanua nenda kasitsitakenen, kalulut akkula bagei situottou nenda kasitsitakenen, samba nenda besik bokbong.

¹⁶ Ele ke ikurut samba ibailiu mabulau akkula bagei situottou nenda, buita ta mei sirimanua nenda katubut imam.

¹⁷ Ke siripot siitconia besiknia nenda aibailiuan simabulau, buita ipoiliat si imam sirimanua nenda simalina; kirenangan malinania.

¹⁸ Ke ai sara appu ka kulit sara sirimanau simamale,

¹⁹ tapoi ka kudduat appu nenda bara simago simabulau ele belua simabulau simakabonan, buita itiddou sirimanua nenda kai imam bule iitconia si imam.

²⁰ Ke siripot siitcokatnia belua nenda bulat makolou makeru peilenia ka kulit samba bulunia aibailiuan simabulau, oto imam nenda buita ipoiliat katusitsinan sirimanua nenda, kalulut besik bokbong le amutu'tu ka appu nenda.

²¹ Tapoi ke siripokat siitcot imam bulu karubeiat nenda ta amabulau, samba ta makope kerunia ka kulit, tapoi makamung le, buita iluplupake sirimanua nenda si imam pitungagogoi burunia.

²² Samba ke malilio le belua nenda ka kulit, buita ipoiliat si imam sirimanua nenda kasitsitakenen; nenda besik bokbong.

²³ Tapoi ke belua nenda ta isisili samba ta malilio, oto nenda balak appu le, samba si imam buita ipoiliat katulilinania sirimanua nenda.

²⁴ Ele ke ai simalebbuk ka sara kulit sirimanua kalulut obengan samba akkula sipuottou ka simalebbuk nenda ibailiu belua simabulau bonan ele mabulau,

²⁵ bui taiitco belua nenda si imam; ke sibulatnia bulu ka belua nenda aibailiuan simabulau samba ituitconia belua nenda makeru peilenia ka kulit, oto sipuottou kabagat simalebbuk nenda iate besik bokbong samba buita ipoiliat si imam sirimanua nenda kasitsitakenen; nenda besik bokbong.

²⁶ Tapoi ke siripot siitconia taanai ka belua nenda bulu simabulau samba belua nenda ta makope kerunia ka kulit, tapoi makakamung le, buita iluplupake sirimanua nenda si imam pitumgagogoi burunia.

²⁷ Ka gogoi sikapitu si imam bui taiitconia minca, ke belua nenda irarat le ka kulit, buita ipoiliat si imam nia kasitsitakenen, nenda besik bokbong.

²⁸ Tapoi ke belua nenda taisili samba tatusalu ka kulit, tapoi makakamung le, oto nenda goo simalebbuk samba imam buita ipoiliat sirimanua nenda malinania, kalulut nenda balak simalebbuk le.

²⁹ Ke sara simanteu ele sinanalep bara besik ka ute ele ka bulut bakklania,

³⁰ si imam bui taiitco besi nenda, ke besik nenda ituitconia makeru peilenia ka kulit, samba ai alai simaalit simakiniu, buita ipoiliat si imam sirimanua nenda kasitsitakenen, kalulut nenda guigui ka ute, iate besik bokbong ka ute ele besik bokbong ka bulut bakkla.

³¹ Samba ke siripot siitconia besik guigui nenda ta makope kerunia ka kulit, samba taanai katubunia alai simapusu, oto si imam buita iluplupake sirimanua siorak besik guigui nenda pitu ngagogoi burunia.

³² Ka gogoi sikapitu, si imam bui taiitco minca besik nenda, ke'besi nenda ta malilio samba taanai alai simakiniu karubeiat nenda, samba guigui nenda ta makope kerunia ka kulit,

³³ oto sirimanua nenda buita isapu alainia, sarat kudduat guigui nenda bui isapunia. Lepa si imam buita iluplupake sirimanua siorak guigui nenda ka ruangamincania pitungagogoi.

³⁴ Iageti ka gogoi sikapitunia bui taiitconia minca guigui nenda si imam, ke makolou, guigui nenda ta malilio ka kulit, samba makoinong ta makope kerunia ka kulit, buita ipoiliat si imam sirimanua nenda malina, samba buita itaptap leppeinia samba bailiunangannia simalina.

³⁵ Tapoi ke guigui nenda bulat malilio ka kulit, kalepat aitupoiliat malina le nia,

³⁶ samba siripot siitcokat imam guigui nenda, malilio le ka kulit, oto imam taan igagaba minca alai simakiniu, kirenangan sirimanua nenda kasitsitakenen.

³⁷ Tapoi ke siripokat siitcokat imam guigui nenda nia leuet nia, samba ai alai simapusu mututu ka guigui nenda, oto guigui nenda amalengan samba sirimanua nenda malina, samba imam buta ipoiliat amalinaannia.

³⁸ Ke'bai sara simanteu ele sinanalep ai senengamata belua, iate belua simabulau,

³⁹ buita iitco si imam, ke makolou ka kulitnia ai maigi belua simakamung samba simabulau, oto sarat guluk le amuontou ka kulitnia samba sirimanua nenda malina.

⁴⁰ Ke ipagolongi alai ka ute' sara sirimanua simanteu, samba bailunangannia siguluk, malina le nia.

⁴¹ Ke ipagolongi alainia ka isit kamatania, samba bailiunangannia maguluk karubeiat isit kamata, malina le nia.

⁴² Tapoi ke ka ute simaguluk nenda, ka ipot kapata ele ka ipot kamata, ai besik simabulau bonan, oto besik bokbong le amuontou ka rubeiat ute siguluk nenda.

⁴³ Buita iitconia si imam; ke makolou simago ka rubeiat ute simaguluk nenda mabulau bonan, samba ituitconia kele besik bokbong ka kulit,

⁴⁴ oto sirimanua nenda sibara besik bokbong, samba kasitsitakenen le nia, samba si imam buita ipoiliat kasitsitakenen le nia, kalulut besik ka utenia nenda.

⁴⁵ Sirimanua sibara besik bokbong buita muleppei simabibirit, alainia mujai samba leu minca buita itabbo matania sialei musoga: “Kasitsinakenen! Kasitsitnakenen!”

⁴⁶ Ka ujut aioraknia besik nenda, mariuriu le nia kasitsitakenen, kirenangan kasitsitakenen le nia, buita tusaraake le kudduatnia, ka ujat pusapougat nenda te kudduat pukudduanannia.

⁴⁷ Ke ai toggaiat ka leppei besik bokbong, ka leppei bulut biribiri ele leppei simaalit baga,

⁴⁸ ele banang siputotoak ele banang sipulilittenga, ele ka kulit ele ka sara bibilet kulit,

⁴⁹ – ke toggaiat ka bibilet nenda makabonan tubunia, oto besik bokbong te nenda – pagalaiat nenda buita ipaitcoakenia kai imam.

⁵⁰ Ke aiitcoan toggaiat nenda si imam, buita isaraake bibilet sibara toggaiat nenda pitu ngagogoi burunia.

⁵¹ Ka gogoi sikapitu bui taiitco minca toggaiat nenda, ke toggaiat nenda malilio le ka leppei ele ka banang siputotoak ele banang sipulilittenga ele ka kulit, ele ka aponia pa tupakei kulit nenda, oto nenda iate besik bokbong bulat simakope katai, samba bibilet nenda kasitsitakenen.

⁵² Sangamberi bibilet sibara toggaiat nenda buita ilaboake, kalulut nenda iate besik bokbong bulat simakope katai; sangamberi bibilet nenda buita tulaboake isappru.

⁵³ Tapoi ke siripokat siitcot imam toggaiat nenda ta malilio ka bibilet nenda,

⁵⁴ oto imam buita iparentaake sirimanua masitaptap bibilet sibara toggaiat nenda, lepa buita isaraakenia pitu ngogogoi minca ka sikaruania.

⁵⁵ Iageti ke alepaan tutaptap bibilet nenda, buita taiitco minca si imam toggaiat nenda, ke makolou tubut toggaiat nenda ta isisili, kenanen ta malilio, oto bibilet nenda kasitsitakenen, samba buita nulaboake itata, kalulut toggaiat nenda makokope le keru ka isit ka teitei ele ka isit kamata.

⁵⁶ Samba ke siripot pasiitcokat imam toggaiat nenda ibailiu le makamung lepat aitutaptap, oto buita ibiritake ka sangamberi bibilet nenda.

⁵⁷ Tapoi ke makoinong peile toggaiat ka bibilet nenda, oto nenda besik bokbong aitatatdaake ipuottou; bibilet sibara toggaiat nenda, buita sappru nulaboakenia.

⁵⁸ Tapoi sangamberi bibilet silepa nutaptap, bailiu togggaiat nenda sappru katubunia, buita tutaptap sikaruania, iapei bailiu malina.

⁵⁹ Nenda te surukat pagalaiat besik bokbong sibabara ka leppei bulut biribiri ele komak simaalit baga ele banang siputotoak ele ka banang sipulilittenga ele ka senen bibilet kulit, bule tupoiliat malina ele kasitsitakenen.