3Mos. 11 - BUKO SIPUNENAN

Tarimeu keikeiet samba ta keikeiet

¹ Kuanangan si Tuhan katubut Mose samba kai Aron, kuanangannia katubutda:

² “Kua ka tai Israel, kise: Nene te sangamberi tarimeu sioi nukom kam ka sangamberi tarimeu siepat rere sibabara ka polak:

³ senen tarimeu sipusulet sibekka, iate sipusulet simananta bekka, samba sikom minca kannia momoi nukom kamnia.

⁴ Tapoi nene te tamomoi nukom kam sibara ka sioleake simeme kannia ele sibara ka sipusulet sibekka: Onta, kalulut kirenangan ioleake ikom kannia minca, tapoi ta mabekka suletnia, takeikei nenda kakam.

⁵ Kisedda leuet pelanduk, kalulut kirenangan ioleake minca ikom kannia, tapoi ta mabekka suletnia; takeikei nenda kakam.

⁶ Kisedda leuet kelinci, kalulut kirenangan ioleake imeme kannia minca, tapoi ta mabekka suletnia, takeikei nenda kakam.

⁷ Kisedda leuet sakkoilot leleu, kalulut kirenangan mabekka suletnia, iate sipusulet simananta bekka, tapoi ta ioleake imeme kannia sibebela; takeikei nenda kakam.

⁸ Akkulat sangamberi tarimeu nenda bui nukom kamnia samba tubunia simamatei bui nurape kamnia; takeikei nenda sangamberinia kakam.

⁹ Nene le momoi nukom kam ka senengamata sipuririmanua ka oinan: sangamberi sibara leilei samba sibara susru kabagat oinan, kabagat koat samba kabagat oinan, nenda te sangamberinia momoi nukom kam.

¹⁰ Tapoi sangamberi sitaleilei ele sibara susru kabagat koat samba kabagat oinan, sibara ka sangamberi sipuleleituk kabagat oinan samba sibara ka sangamberi sipuririmanua sibabara kabagat oinan, sangamberinia nenda kasitsikenenmui.

¹¹ Bulatnia te sangamberinia nenda bulat kasitsitakenen kakam; akkulania bui nukom kamnia, samba tubunia simamatei buita nukasitsiake kam.

¹² Sangamberi sitasirip samba sitasusru kabagat oinan, iate kasitsitakenenmui.

¹³ Nene te bulat kasitsitakenenmui sibara ka sangamberi uma' bui itukom, kalulut sangamberinia nenda iate kasitsitnakenen: uma' manyang, silabbai samba manyang koat;

¹⁴ manyang simabonan samba manyang simapusu siripot ngamataatnia,

¹⁵ senen uma' mangkakak siripot ngamataatnia;

¹⁶ uma' unta, popo, pisaksak samba piligi siripot ngamataatnia;

¹⁷ uma' kaileak, liddai samba popo sabeu;

¹⁸ uma' popo simabulau, undan, uma' piligi,

¹⁹ uma' kailaba, seggu siripot ngamataatnia, liplip samba leituak.

²⁰ Sangamberi tarimeu sipugugurui samba sibara kappo' samba sipuenung kaepat rere iate kasitsitakenenmui.

²¹ Tapoi nene te momoi nukom kam sibara ka sangamberi tarimeu sipugugurui samba sibara kappo samba sipuenung ka epat rerenia, iate sibara bakkapat ka isit kapatat rerenia bule ipuattat ka uddut polak.

²² Nene te momoi nukom kam, iate sit siripot ngamataatnia, iate takkourarak siripot ngamataatnia, sit simakiniu siripot ngamataatnia, samba sit, siripot ngamataatnia.

²³ Sangamberi tarimeu bagei sipugugurui samba sibara kappo' samba sipurere epat iate kasitsinakenenmui.

²⁴ Sangamberinia nene masipalolit kam – senen sirimanua siorak tubunia simamatei, ibailiu kasitsitnakenen teret bele sulu,

²⁵ samba senen sirimanua sipasiambit tubunia simamatei buita itaptap leppeinia, samba malolitnia pat bele sulu –,

²⁶ iate sangamberi tarimeu sipusulet sibekka, tapoi ta mananta paoggangannia, samba sitaioleake masikom kannia; takeikei sangamberi nenda kakam samba senen sirimanua siorak katubunia, ibailiu kasitsitnakenen.

²⁷ Kisedda leuet sangamberi sipuenung pasamba bagat rerenia katalagat sangamberi tarimeu sipuenung pasamba kaepat rerenia, sangamberinia nenda takeikei kakam; senen sirimanua siorak tubunia simamatei, ibailiu kasitsitnakenen teret ibele sulu.

²⁸ Samba kasei sipasiambit tubunia simamatei, buita itaptap bibiletnia samba ibailiu le nia kasitsitnakenen teret ibele sulu. Sangamberinia nenda takeikei kakam.

²⁹ Nene te takeikei kakam katalagat sangamberi tarimeu sipugugurui samba sipuleleituk ka uddut polak: iate birut simapeset, birut polak, birut, samba kuret siripot ngamataatnia

³⁰ samba landak, bate', pikko, lipsop samba bunglon.

³¹ Nenda te sangamberi simakeikei kakam katalagat sangamberi tarimeu sipugugurui. Senen sirimanua siorak sangamberi tarimeu nenda lepat aimatei tarimeu nenda, bailiu kasitsitakenen teret ibele sulu.

³² Samba sangamberinia ibailiu kasitsitakenen, ke matei sangamuneng katalagat tarimeu nenda ka uddutnia: pugalai loina ele leppei, kulit, goni, senen bibilet pakeiet ka senengamata galajet, buita tukau ka oinan samba ibailiu kasitsitakenen pat bele sulu, iageti malinanangan leu et.

³³ Ke bele katalagat sangamuneng tarimeu nenda kabagat koali polak, oto sangamberi sibabara kabagania bailiu kasitsitakenen samba koali nenda buita nuragatake kam.

³⁴ Ka pagalaiat nenda, sangamberi komen sioi tukom, ke iorak oinan kabagat koali nenda, ibailiu kasitsitakenen, samba sangamberi lo sioi tulo kabagat koali kele nenda, ibailiu kasitsitakenen.

³⁵ Ke bele sangamuneng tubut tarimeu simamatei sibara katalagat sangamberi tarimeu ka uddut aponi pa, nenda ibailiu kasitsitakenen; pasirarangan roti samba purakaat buita tupetsleake, kalulut sangamberinia nenda samba ibailiu leu kasitsitakenen kakam,

³⁶ tapoi bubuakat ele uggungan sibara oinan, mariuriu le malina, tapoi kasei pa iorak tubut tarimeu simamatei nenda ibailiu le kasitsitakenen.

³⁷ Ke bele sangamuneng tubut tarimeu simamatei nenda ka karamen karapakenen, oto uremen nenda malina le.

³⁸ Tapoi ke atukauan oinan ka uremen nenda, lepa bele sangamuneng tubut tarimeu simamatei ka uddutnia, oto uremen nenda ibailiu le kasitsitakenen kakam.

³⁹ Ke matei sara katalagat tarimeu nenda sibailiu komenmui, oto kasei siorak tubut tarimeu simamatei nenda ibailiu le nia kasitsitakenen teret bele sulu,

⁴⁰ samba kasei pa sikom tubunia simamatei nenda, buita itaptap leppeini, samba nia ibailiu kasitsitakenen teret bele sulu; kisedda leu kasei masiambit tarimeu simamatei nenda buita itaptap leppeinia, samba nia ibailiu kasitsitakenen teret bele sulu.

⁴¹ Sangamberi tarimeu sipugugurui samba sipuleleituk ka uddut polak, iate kasitsitakenen, bui' nukom kamnia.

⁴² Sangamberi sipugugurui samba sangamberi sipuenung si epat rere, ele simigi rere, sangamberi tarimeu sipugugurui ka uddut polak, bui' nukom kamnia, kalulut sangamberinia nenda kasitsitakenen.

⁴³ Bui' nubailiuake kam tubumui kasitsitakenen kalulut sangamberi tarimeu sipugugurui samba sipuleleituk bui' nukasitsitake kam tubumui ka sangamberinia nenda, kalulut nenda bailiunangan kam kasitsitakenen.

⁴⁴ Kalulut Aku te Tuhan, Taikamanuamui, oto buita nupusipunenaake kam tubumui samba buita mapunen kam, kalulut Aku nene sipunenan, samba bui nukasitsitake kam tubumui ka senen tarimeu sipugugurui samba sipuleleituk ka uddut polak.

⁴⁵ Kalulut Aku te Tuhan, sipalulu kam bela ka laggai Misir, bule ibailiu Taikamanuamui, kau numapunen kam, kalulut Aku sipunenan.

⁴⁶ Nenda te surukat pagalaiat tarimeu siepat rere, sangamberi uma samba sangamberi sipungongoingoi kabagat oinan samba sangamberi sipugugurui ka polak,

⁴⁷ iate masibabageiake kasitsitakenen samba simalina, tarimeu sioi tukom samba sitaioi tukom.”