3Mos. 10 - BUKO SIPUNENAN

Kamateiat Nadab samba Abihu

¹ Iageti tatogat Aron, si Nadab samba si Abihu, senenda masiala kudduat obengannia, samba kaurangan kabagania obengan samba kaurangan pusinginan ka uddut obengan nenda. Oto kisedda te rapanguruatake katubut Tuhan obengan bagei sitaiparentaakenenNia katubutda.

² Iageti bela obengan sibara kamatat Tuhan, lepa labonangan sia ruatda, bailiu matei sia kamatat Tuhan.

³ Lepa kuanangan si Mose kai Aron, “Nene te sikuat Tuhan: Katubut sirimanua simalegere katubukKu Kupatoila le pusisipunenanKu, samba kamatatda sangamberi bangsa nenda Kupatoila le geti pulatsananKu.” Tapoi si Aron itangeu le tubunia.

⁴ Lepa geti si Mose sogainangan si Misael samba si Elsafan, tatogat Uziel, kamman Aron. Kuanangan katubutda, “Konan kam sene, akkatake kam sasarainamui nene kamatat kudduat sipunenan itubelaake ka ujat pusapougat.”

⁵ Oi sia samba akkatakerangan karua simamatei nenda sipuleleppei ka ujat pusapougat, kele sikuat Mose.

⁶ Lepa kuangan si Mose kai Aron samba kai Eleazar samba kai Itamar, tatogat Aron: “Bui nupureureu kam baga samba imasou bagamui, bule bui' numatei kam samba bui' igolu sangamberi paamian nene si Tuhan, tapoi sasarainamui iate sangamberi bangsa Israel, sia te bulat musosou kalulut obengan siobekakenen Tuhan nenda.

⁷ Bui nukaddiuake kam Sapou Paailiat, bule bui numatei kam, aipoi tula pasisukat Tuhan ai katubumui.” Galaiakerangan kele sikuat Mose.

Keraet pagalaiat lo simapuinengen ka tai imam sigalaiake panindogat

⁸ Kuanangan si Tuhan kai Aron,

⁹ “Ke tuguru ekeu kabagat Sapou Paailiat, bui' nulo anggur ele lo simapuinengen, ekeu samba tatogam, bule bui' numatei. Nenda te sara siteuakenen teret buruburu kekeu teret mupaninikat.

¹⁰ Buita moi nupabaggei simapunenan pasamba sitaimapunenan, kasitsitnakenen samba ta kasitsitnakenen,

¹¹ samba kau ioi nugelaiake tai Israel sangamberi siteuakenen sikuat Tuhan katubutda kapaneteiat kai Mose.”

Rubeiat imam ka buluakenen

¹² Iageti kuanangan si Mose kai Aron samba katubut Eleazar samba Itamar, tatogat Aron, sipulelegei nenda: “Ala kam buluakenen sinantatakenen sipulelegei ka sangamberi sibuluakenen sirarak katubut Tuhan, samba kom kam nenda sibailiu roti sitasioman kabebet kudduat pasibuluat, kalulut nenda te rubeiat bulat sipunenan.

¹³ Buita nukom kamnia ka sara kudduat sipunenan, kalulut nenda te siteuakenen kekeu samba ka tatogam sibara ka sangamberi buluakenen sirarak kai Tuhan, aipoi kise te aiparentaake katubukku.

¹⁴ Ukduk panguruat sitotoiakenen samba bakkapat panguruat sikokoiakenen nenda buita nukom kam ka sara kudduat simalina, ekeu samba tatogam taimanteu samba tainanalep, kalulut sangamberi nene tuake sibailiu siteuakenen kekeu samba tatogam sibara ka sangamberi buluakenen puaraugatda tai Israel.

¹⁵ Bakkapat panguruat sikokoiakenen samba ukduk panguruat sitotoiakenen nenda bui tatuambit ka kudduat sangamberi buluakenen sirarak sibara ka tabe nenda bule tupanguruatake sibailu panguruat sitotoiakenen katubut Tuhan. Nenda te sara siteuakenen teret buruburu kekeu samba ka tatogam siripot siparentaakenen Tuhan.”

¹⁶ Lepa geti gabanangan simakolou si Mose kambing simanteu buluakenen pasiappet jo. Tapoi kambing nenda asapprungan aitulabo. Kalulut nenda golunangan si Eleazar samba Itamar, tatogat Aron sipulelegei nenda, kuanangan:

¹⁷ “Angoi ta nukom kam buluakenen pasiappet jo nenda ka kudduat simasipunenan? Ta pa nenda sara rubeiat bulat sipunenan samba Tuhan masiake katubumui, bule nuambit kam puseleat paamian nenda samba nubaraake kam paabanan ka sia kamatat Tuhan?

¹⁸ Itco pei ta anuambit kam logaunia kabagat ka kudduat sipunenan; ta pa simateunia nukom kamnia ka kudduat sipunenan, siripot siparentaakenenku?”

¹⁹ Lepa kuanangan si Aron katubut Mose: “Kirenangan sineseat, ka gogoi nene arapanguruatakean buluakenen pasiappet jo samba buluakenenda silabo kamatat Tuhan, tapoi kele ka pagalaiat siboiki le aiorak aku. Ke ka gogoi nene kukom leuet buluakenen pasiappet jo nenda, ioba pa bagania ka pagalaiat nenda si Tuhan?”

²⁰ Kateteret aiarep nenda si Mose, obanangannia.