3Mos. 1 - BUKO SIPUNENAN

Buluakenen silabo

¹ Tuhan masisogai si Mose samba panibonangan si Tuhan katubunia ka Sapou Paailiat:

² “Panibo ka tai Israel samba kua katubutda: Ke ai sara sirimanua katalagamui sioba masipanguruatake panguruat katubut Tuhan, buita panguruatakenenmui nenda iate tarimeu, iate jaui ele biribiri.

³ Ke panguruatnakenennia nenda sibailiu buluakenen iate jaui, buita ipanguruatake sangamuneng simanteu simaeru tubu. Buita iambit ka matatbaliu Sapou Paailiat, bule ioba bagania si Tuhan katubut sirimanua nenda.

⁴ Lepa buita igalakake kabeinia ka utet buluakenen silabo nenda, bailiu panguruatnia nenda tusilo masibarake paabanan katubunia.

⁵ Lepa geti buita ijaja jaui nenda ka matat Tuhan samba leu kamatatda tatogat Aron, tai imam nenda, buita rapanguruatake logau jaui nenda samba rasubuiakenia ka sangaliot bebet kudduat pasibuluat ka matat matatbaliu Sapou Paailiat.

⁶ Iageti buita ibirit kulit buluakenen silabo nenda samba patippunangania siripot rubeiat sikokoiakenen.

⁷ Buita ta rakau obengan tatogat imam Aron ka uddut kudduat pasibuluat samba rapagalak loina ka uddut obengan nenda.

⁸ Buita rapagalak simakolou buluakenen sipatippu nenda samba utenia, kisedda leu et tabenia ka uddut loina sipuoobek ka uddut kudduat pasibuluat.

⁹ Tapoi tinanai samba bitinia buita ibui pasamba oinan samba sangamberinia buita ilabo si imam ka uddut kudduat pasibuluat sibailiu buluakenen silabo, iate buluakenen sirarak singinnia nenda masiangkaake bagat Tuhan.

¹⁰ Ke panguruatakenennia nenda iate biribiri, ele kambing, buita ipanguruatake sangamuneng simanteu simaeru tubu.

¹¹ Buita ijaja tarimeu nenda ka bebet kudduat pasibuluat isit ka bare ka matat Tuhan, lepa geti tatogat Aron, tai imam nenda, buita rasubuiake logau tarimeu nenda ka sangaliot kudduat pasibuluat.

¹² Iageti buita ipatippu siripot rubeiat sikokoiakenen, kisedda leu et utenia samba tabenia buita ipagalak simakolou imam nenda ka uddut loina sipuoobek ka uddut kudduat pasibuluat.

¹³ Tinanai samba bitinia buita ibui pasamba oinan, samba sangamberinia nenda buita ipanguruatake si imam samba tulabo ka uddut kudduat pasibuluat: iate buluakenen silabo, singin buluakenen panguruat nenda masiangkaake bagat Tuhan.

¹⁴ Ke panguruatakenennia katubut Tuhan sangamuneng uma' sibailiu buluakenen si silabo, buita ipanguruatake buluakenen uma limendeu ele togat ngorut.

¹⁵ Buita iambit nenda si Imam ka kudduat pasibuluat, lepa pilekakenangan utenia samba labonangannia ka uddut kudduat pasibuluat. Logaunia buita tuneinei ka uja ka rupit kudduat pasibuluat.

¹⁶ Bolokboknia pasamba bulunia buita tusaraake samba turibbaiake ka bebet kudduat pasibuluat ka isit sikalaut, ka kudduat abu.

¹⁷ Iageti buita ibiritake uma' nenda ka bakkat kapponia, tapoi bui itakki; lepa nenda si imam buita ilabo uma' nenda ka uddut kuddduat pasibuluat, ka uddut loina sipuoobek; nenda te buluakenen silabo, sibailiu buluakenen sirarak singin buluakenen panguruat nenda masiangkaake bagat Tuhan.”