3Joh. 1 - BUKO SIPUNENAN

Salam

¹ Sibara kaku paneinei paamian, masiailiake si Gayus kilibet baga, bulat kanuntuat bagaku.

² Ale kilibet baga, panindogatku bule ai le ekeu maririuriu tubu samba maron ka bagat sangamberinia, kele riuriunia ketsatnu.

³ Aipoi bulat maangka bagaku, kele araoi sasaraina samba ramunengake puririmanuam ka bagat pubulanan, kirenangan poi mariuriu le ekeu ka bagat pubulanan.

⁴ Ta anai sisaliu angkat bagaku ke kuarep puririmanuanda tatogaku ka bagat pubulanan.

Topit Gayus tuumun

⁵ Ale kilibet baga, bulat maeru sigalaiakenennu ka tubuda saalei tai Kristen kenanen sasareu le sia.

⁶ Aramunengakean ka matat paamian se pagalaiat nuntut bagam. Samba tuppai minca erunia sigalainu ke nuromake sia rariuriuake puenungananda siripot simateu ka matat Taikamanua.

⁷ Aipoi kalulut onin Tuhan le araei, ta anai arasilo apa pa sibara ka sipuarat sabulungan.

⁸ Oto mateu le tasilo sirimanua kele nene, bule ibailiu sita aleira ka bagat pubulanan.

Diotrepes samba Demeterius

⁹ Akukauan goiso surat ka paamian, tapoi si Diotrepes sioba muute ka talagada ta aisilo kai.

¹⁰ Oto amoian geti aku, tiboikungan sangamberi sigalainia, ia te sangamberi tiboiet sikatai sikuania pagalaiat kai. Tapei sesege bagania nenda, ta sarat tubunia ta ioba masisilo saalei siooi, ikera pei le sabagei sioba masisilo sia samba ibelaake sia ka paamian.

¹¹ Sarainangku kilibet baga, bui nuului sikatai, simaeru le ului. Sipasigagalai simaeru, sibara ka Taikamanua le nia, tapoi sipasigagalai sikatai, ta iitco Taikamanua.

¹² Si Demeterius geti sangamberi le masimunengake simaeru pagalaiat nia, beri pubulanan leu masimunengake kisedda. Kai leu masimunengake simaeru pagalaiat nia, samba nuagai, sibulatnia le pasimunenganmai.

Pasilepa

¹³ Maigi pei leu kuanenku kekeu, tapoi taan leu kususuratnake nia tinta samba pena.

¹⁴ Kukaroni maruei tapaaili samba tapatibo sipatutuggut mata.

¹⁵ Aban le masipaalei ekeu! Salam kekeu sibara ka saaleinu. Segeake salamku ka saalei senenda.