2Tim. 4 - BUKO SIPUNENAN

¹ Ka matat Taikamanua samba Kristus Jesus sipasiuukumake geti sipuririmanua samba simamatei, samba kalulut momoi nia masipatoila Puririmatania, kupatone simaron kekeu:

² Paarep tiboiet Taikamanua, tugguruake ka tetere simaeru ele sitaimaeru, ase, tekaake simasele samba nganturu ka bagat om baga samba panganturat.

³ Babara poi teterenia taan raoba sirimanua masisilo nganturat simaeru, tapoi raruruake le saguru siobat bagada masigelaiake sia siobat talinganda.

⁴ Pisikngakerangan talinganda ka pubulanan, ka pumumuan siburuan le ratongiake talinganda.

⁵ Kekeu geti kau numasikeli ka bagat sangamberinia, omake masiorik, galaiake galajet masipaarep Katuareman Simaeru, lettuake galajet pasikelatnu.

⁶ Pagalaiat tubuku kaku geti, amatarekngan tubuluake, samba tetere katatakatku aiailingan.

⁷ Akupatakaiakean patakaiat simaeru, akukappuluakean ailiakenen, akupasikelingan tonem baga.

⁸ Kineneiget, amatarekngan kaku kirit puroipoat akenen Tuhan Sipasiukum simaroipo kaku ka gogoi sialu; ta sarat kaku, tapoi samba leu ka sangamberi sipungeleiji katutoilakatnia.

Patonekat sikateitei

⁹ Besiake imaola nuoi masibalou aku;

¹⁰ aipoi si Demas aikaddiuakean aku, lulut masipununtuki baga polak nene. Ameian nia ka Tesalonika. Si Kreskes ameian ka Galatia samba si Titus ka Dalmatia.

¹¹ Sarat si Lukas-an le amulegei aleiku. Ala si Markus ambit nia aleinu; aipoi bulat karonanku le nia ka galajet.

¹² Si Tikhikus akukoiniakean nia ka Epesus.

¹³ Ke moi ekeu ambit mantel sigalakku ka Troas ka lalep Karpus samba leu pabukobukoku, sara pei nenda buko kulit.

¹⁴ Si Aleksander, tukang tembaga nenda, amaigingan sikatai aigalai ka tubuku; ai leu isiliake nia si Tuhan siripot sigalainia.

¹⁵ Jago leu tubum ka tubunia, aipoi makope ilawan nganturatta.

¹⁶ Ka teteret pasialegiatku siboiki, beri sara siromake aku, sangamberida masikaddiuake aku (kepei ta iaddeake Taikamanua ka tubuda pagalaiat nene).

¹⁷ Tapoi aipaaleian aku si Tuhan samba aiparonan aku, bule ioi kupaarep simasun Katuareman Simaeru samba sangamberi sipuarat sabulungan masiarep. Ia te akubela ka ngungun singa.

¹⁸ Samba ibebelaake aku si Tuhan ka senen galajet sikatai, iaarauake aku tuguru ka Purimataatnia ka sorga. Ka tubunia le pulatsanan teret buruburu. Amen.

Salam pasilepa

¹⁹ Salamku kai Priska samba Akwila samba ka sia ka lalep Onesiporus.

²⁰ Si Erastus ai nia ka Korintus samba si Tropimus kukaddiuake aimubebesi ka Miletus.

²¹ Besiake nuoi se enan ta babara tetere simaleppet. Salam kekeu sibara kai Ebulus, Pudes, Linus, Klaudia samba sibara ka sangamberi sarainanta.

²² Si Tuhan le masipaalei ketsatnu. Kiliu bagania masipaalei kam!