2Tim. 3 - BUKO SIPUNENAN

Sibabara ka gogoi sikateitei

¹ Agaietnu leu et ia te ka gogoi sikateitei, babara te tetere pugejaat baga.

² Aipoi sirimanua sarat mununtu baga ka tubudangan le, maalau baga ka bulagat, musosot titiboat samba mubuak paatuat, bailiu simaasa, ta masireddet eppu, taiagai musura baga, taipuuku arat,

³ taiagai mununtu baga, taioba paaban, raoba masipakatai nganga, taiagai masiatuake, maoddoi, ta raoba simaeru,

⁴ raoba masipajo, ta mananta rapaatu, masipaumun siagai, masitutnake pubotbonan tubu pei le raoba bele pei masitutnake Taikamanua.

⁵ Ka uddut tuitco sia kele simasuru arat, tapoi pulelengannia geti, geget puaranan raputata le. Areuake tubum ka tubuda!

⁶ Ka talagada poi ai sia sisenei lalep sirimanua samba masikau paalakat bagada tainanalep simagulai tubu, sisun jo, samba pinaambit sene ngamata pubotbonan,

⁷ kenanen mariuriu rapasigelai, tapoi beri pei raagai pubulanan.

⁸ Makere kele si Jannes samba si Jambres masilawan si Mose, kisedda te sia masilawan pubulanan. Sirimanua nene amakataian paatuatda, ta matom tonem bagada.

⁹ Taan leu momoi ramariuriu, aipoi taiagaira paatuat, matotoila le ka matada sangamberi sirimanua, kele kai Jannes samba Jambres.

Ka bagat paoreat samba pasibabasa Surat Sipunenan muurau tonem baga

¹⁰ Tapoi ekeu geti anututnakean ngantomanku, paraboatku, isiatku, tonem bagaku, om bagaku, nuntut bagaku samba ron paatuatku.

¹¹ Anututnakean masiorik pangukurat samba paoreat kele siorikku ka Antiokia, ka Ikonium samba Listra. Sangamberi pangukurat akuorikngan, tapoi aibelaakean aku si Tuhan ka sangamberinia.

¹² Kirenangan sangamberi sioba muarat ka bagat Kristus Jesus raoorik pangukurat.

¹³ Tapoi sirimanua sikatai samba sipatataju itutuppai pei le kataira, masipepeake samba mapepe.

¹⁴ Ekeu geti kau le numariuriu ka bagat pubulanan sigelainu samba sikatonemim, nuagai poi kasei sigelaiake ekeu.

¹⁵ Repdep leu ka sulenu pei le anuagaian Surat Sipunenan sipasoppit samba sipalulu ekeu ka puaragat kalulut tonem baga ka Kristus Jesus.

¹⁶ Sangamberi surat ka Surat Sipunenan sibara ka engan Taikamanua le, samba pakeiet pasinganturu, pasiase simasele, pasipaeru paraboat samba pasipalulu ka puroipoat;

¹⁷ bule imamuine sirimanuan Taikamanua, simatarek ka senen galajet simaeru.