2Tim. 2 - BUKO SIPUNENAN

Masiomake masiorik ka pasitutut Kristus

¹ Oto ale togaku, kau numaron kalulut kiliu baga sibara ka Kristus Jesus.

² Apa siarepnu kaku ka matada maigi sipasimumuneng, ia te nusesegeake ka sia siooi tukatonemi, simaagai leu masipangantoman sabagei.

³ Tutnake masiorik gejat baga siripot saladdut Kristus Jesus simatopit.

⁴ Ta anai kasei pa saladdu sipasasaggak sipabikbing paatuatnia ka pagalaiat purimanuaiatnia, bule ioba nia siuteake nia.

⁵ Sipatatakai, kenanen apatakaian nia, ta te tukikirini nia, ke ta siripot aturan patatakainia.

⁶ Sipumomone, simamomomo tubu mugalai, buita nia le boiki masinananam buat siuremannia.

⁷ Paatu sikuaku nene; aipoi iaake kekeu Taikamanua puaagai ka bagat sangamberinia.

⁸ Repdep Jesus Kristus, sitususuru ka simamatei, sibara ka punuteteu David, ia te sipaarepku ka Katuareman Simaeru.

⁹ Kalulut pasipaarep Katuareman Simaeru nene te akupasiorik, pat tukabe, kele sirimanua sipananae; tapoi tiboiet Taikamanua ta tukakabe.

¹⁰ Ia te kuoomake masiorik sangamberinia puuktunganda sia sipilit Taikamanua, bule rasilo leu puaragat ka bagat Kristus Jesus samba pulatsanan sitaitatata.

¹¹ Bulat sibulatnia le tiboiet nene, “Ke amateian sita pasamba nia, muririmanua leu sita pasamba nia.

¹² Ke maom bagata, puparentatangan leu pasamba nia. Ke tapakele nia, pakelenangan leu sita.

¹³ Ke ta matopit sita, nia geti riuriu le matopit, aipoi ta momoi ipakele tubunia.”

Masiareuake tubu ka nganturat pasipepe

¹⁴ Parepdep samba toneake sangamberinia nene ka sia ka matat Taikamanua, buian ragalai paukele tiboiet, si ta galai le poi, masipaingo sia sipasiaarep le.

¹⁵ Besiake numateu ka matat Taikamanua, kele sara sipugagalai sitaimaila ka pagalaiat galajetnia, simakolou masipaarep tiboiet pubulanan.

¹⁶ Tapoi tiboiet si ta baga samba simalolit, katsiliake le, aipoi sikau sirimanua memei makatai le.

¹⁷ Samba tiboietda mararat le kele bogbong. Ka talagada ia te si Himeneus samba si Piletus,

¹⁸ sia nene amapepengan sia ka pubulanan, arakua poi katusuruatta amuriuriuan; oto paguilaknangan tonem bagada sabagei.

¹⁹ Tapoi bongen simaron sigalakngakenen Taikamanua nyung le, toggaiatnia ia te, “Iagai si Tuhan sia bakkatnia” samba “Senen sipasikukua onin Tuhan, kau iariake tubunia ka sikatai.”

²⁰ Ka bagat lalep sabeu ta sarat bibilet sigalai ka mas samba perak, tapoi samba sibara ka loina samba polak leu; siboiki nenda tupakei ka simalatsat samba bagei tupakei ka sitaimalatsat.

²¹ Ke kasei pa masipalina tubunia ka sikatai, bailiu nia bibilet lalep pakeiet ka simalatsat, tupalina, tuaddeake nia mateu pakeiet tuannia samba tutarekngake ka senen galajet simalatsat.

²² Kalulut nene areuake tubum ka pubotbonanda sibau tubu, kukuruake puroipoat, tonem baga, nuntut baga samba aban sambamui sia sipusosoga kai Tuhan sibara ka paatuat simalina.

²³ Katsiliake paukelatda taiagai paatuat samba sitaimateu, nuagai poi sibaraake pajoggolat le nenda.

²⁴ Pagugulet Tuhan geti ta momoi pajoggolo, simaeru baga le ka sangamberi sirimanua, iagai masinganturu, maom baga,

²⁵ maleppe baga masinganturu simalawan, baleu ipanguruatnake Taikamanua ka sia katubaugat paatuat sikau sia masiagai pubulanan,

²⁶ bule raseseake nia rabela ka seseret Sanitu siappara sia masitutnake nia.