2Tim. 1 - BUKO SIPUNENAN

Salam

¹ Sibara kai Paulus, apostel Kristus Jesus kalulut teu bagat Taikamanua masipaarep palelengan pagalaiat purimanuaiat ka bagat Kristus Jesus,

² masiailiake Timoteus, togaku kilibet baga: Kiliu baga, nuntut baga samba aban sibara ka Taikamanua Ukkui samba Kristus Jesus, Tuhanta, masipaalei ekeu.

Pusurakat samba nganturat muom baga

³ Sura le kukua ka Taikamanua, reddenenku ka paatuat simalina, kele sigalaiakenenda taikebbukatku. Aipoi ta muaari kurepdep ekeu ka bagat panindogatku sinago samba sinoibo.

⁴ Mangelei bagaku masiitco ekeu, kurepdep elum, bule isege angkat bagaku.

⁵ Kalulut kurepdep tonem bagam simalina, kele tonem bagat sibubuam siburu si Lois samba inam si Eunike samba matonem bagaku, kisedda leu tonem bagam kekeu.

⁶ Ia te lulunia kuparepdep ekeu bule nujuluuake panguruat siaket Taikamanua kekeu ka pasitotonem kabeiku ka tubum.

⁷ Aipoi ta ketsat sikau sita muloto aiake Taikamanua ka sita, ketsat sikau muron, nuntut baga samba lelek tubu le.

⁸ Oto bui numaila masimuneng pagalaiat Tuhanta, samba bui numaila kalulut aku situukum kalulut nia, tapoi tut le masiorik kalulut Katuareman Simaeru siripot ron Taikamanua.

⁹ Nia le sipasiaarauake sita samba sipasisosogai sita pasogaiat sipunenan, ta kalulut sigalaita, sibara ka teu baga samba kiliu bagania le, sipanguruatnakenennia ka sita ka bagat Kristus Jesus enan tapei abara tetere,

¹⁰ samba kineneiget atutoilaakean kalulut kaooi Sipaarau sita Kristus Jesus, sipasitatataake geget kamateiat samba siottouake purimanuaiat sitaimasusuet kalulut Katuareman Simaeru.

¹¹ Sibailiu sipaarep Katuareman Simaeru nene te samba apostel samba guru aiturioake aku.

¹² Ia te lulunia akuorik sangamberinia nene, tapoi ta mamaila aku; aipoi kuagai nia katonemietku samba matonem bagaku sangamberi sinegeakenennia kaku momoi ipasikeli nia teret ka gogoi sialu.

¹³ Ukkaake nganturat simaeru uluietnu siarepnu sibara kaku samba galaiake ka bagat tonem baga samba nuntut baga ka bagat Kristus Jesus.

¹⁴ Pasikeli bibilet simalainge sinegeakenen kekeu, ka paroman Ketsat Sipunenan sikuddu ka bagata.

¹⁵ Anuagaian sia sangamberi sikuddu ka Asia arakaddiuakean aku; ka talagada ia te si Pigelus samba si Hermogenes.

¹⁶ Bule ipanguruatnake si Tuhan katet baga ka lalep Onesiporus, aipoi mareirei ikulaake bagaku samba ta ikailaake masibalou aku ka penjara.

¹⁷ Kele aioi ka Roma, besiakenangan igaba aku, gaba gaba sesenangan aku.

¹⁸ Bule ipangurutanake si Tuhan katet bagania ka tubunia ka gogoi sialu. Kipa igit sigalainia ka tubuku ka Epesus, ekeu pei le iagai nia.