2Tes. 3 - BUKO SIPUNENAN

Manindou samba mugalai

¹ Kalepakatnia ale sasaraina, tiddouake kam kai, bule imararat tiboiet Tuhan samba itulatsatnake, kele ka kam leu,

² bule kubela kai ka kabeira sibaraake pulamagat samba sirimanua sikatai, aipoi ta sangamberi sirimanua ioba mutonem baga.

³ Tapoi simatopit le si Tuhan; iparoron le paatuatmui samba ipasisikeli kam ka sikatai.

⁴ Samba matonem bagamai ka bagat Tuhan, pagalaiat sitoneakenenmai ka kam ainugagalaiake kam samba nugagalaiake kam simariuriu.

⁵ Bule si Tuhan masiipoake paatuatmui masiagai simakolou nuntut bagat Taikamanua samba puoman bagat Kristus.

Nganturat mugalai simariuriu

⁶ Tapoi kupatone kai kam ale sasaraina, ka onin Tuhan Jesus Kristus, bule nuareuake kam tubumui ka senen saraina sitaigalai galajetna samba sitaireddet nganturat sinilomui sibara ka kai.

⁷ Aipoi anuagaian kam, kipa nuului kam kai, aipoi ta akuoreake kai mugalai ka talagamui,

⁸ samba leu ta akukom kai katda kasei pa taisasakiet; tapoi kugaba le kai samba kumomoake kai tubumai sinago sinoibo, bui ibailiu kai pugejaat bagada kasei pa ka talagamui.

⁹ Ta te lulut tatat gegemai masitiddou paromanmui, tapoi kukau le kai tubumai uluietmui, bule nutut kam nia.

¹⁰ Aipoi ai pei le kai ka talagamui, akupatonean kai nene ka kam: Kasei sitaioba mugalai, buian ipukom.

¹¹ Akuarep poi kai ai piga pa ka talagamui sitaimakolou puririmanua samba sitaipugagalai, sarat si ta galai le ratuturi.

¹² Sirimanua kele nene kunganturu samba kujigi kai sia ka bagat Tuhan Jesus Kristus, bule rapugalai simemengmeng samba rakom katda sigabada sarada.

¹³ Kam geti sasaraina, bui ingau kam mugalai simaeru.

¹⁴ Ke ai kasei pa sitaireddet siniboimai ka surat nene, toggaiji kam nia, samba ba alei kam nia, bule imaila.

¹⁵ Tapoi bui nuaddeake kam nia kele saggak, nganturu le kam nia kele saraina.

Tiboiet pasilepa samba salam

¹⁶ Samba nia le, Tuhan sipaaban sita, masipanguruatnake ka kam aban simariuriu ka bagat sangamberinia. Si Tuhan le masipaalei kam sangamberimui.

¹⁷ Salam sibara kaku, Paulus. Salam nene sinurat kabeiku. Ia te toggaiat ka senen surat: kise te suratku.

¹⁸ Kiliu bagat Tuhanta Jesus Kristus, masipaalei kam sangamberimui!