2Tes. 2 - BUKO SIPUNENAN

Pagalaiat Sirimanua Sikatai kei moi Tuhan Jesus

¹ Pagalaiat kaoijanan Tuhanta Jesus Kristus samba parururuta ka matania, kutiddou kai ka kam sasaraina,

² bui imaruei ipaingo samba nutugege kam, ele kalulut pamoilianan ketsat, ele kalulut katuareman ele ka surat sikuada sibara ka kai, masikua: aiailingan te gogoi Tuhan.

³ Bui rapataju kam kasei pa, kenanen kipa pa! Aipoi ke pei moi gogoi Tuhan, buita ibara boiki: Maigi sipasikakaddiuake arat samba buita tupatoila boiki Sirimanua Sikatai, togat pulangokat,

⁴ ia te lawan sibuakngake tubuna ka sangamberi oniakenen Taikamanua samba panindogiet. Pukuddunangan pei ka Uman Taikamanua, iputaikamanua tubunia.

⁵ Ta nurerepdep kam ka teteret ai pei le aku ka talagamui mareireian kukua pagalaiat nene?

⁶ Samba nuagai kam apa sikeraake nia kineneiget, bailiu teret ka tetere sinetereakenen ka sia le geti ipatoila tubunia.

⁷ Aipoi ka bagat pinakele pukataikat aian mugagalai, tapoi kineneiget ai pei le sipasikekera. Ke atuareuakean bai sipasikekera nia,

⁸ seddangan te teterenia ipatoila tubunia Sirimanua Sikatai; tapoi imamateiake le nia Tuhan Jesus ka engan ngungunia, samba isubuake nia ka kaoijanannia minca.

⁹ Kaoijanan Sirimanua Sikatai nenda ia te galajet Sanitu, samba sialei sene ngamata kerek, toggaiat samba kiseiet pabokoat,

¹⁰ samba sene ngamata patajuat sikatai ka sia sieei ka pulangokat kalulut taisisilora samba taimanuntut bagada ka pubulanan sikau sia tuarau.

¹¹ Ia te lulunia aibaraake Taikamanua ka sia pupepeat sikau sia masikatonemi boko,

¹² bule ituukum sangamberi sitaikatonemi pubulanan, sioba ka sikatai.

Tupili bule tuarauake

¹³ Tapoi kai buita mariuriu kusuraki kai Taikamanua kalulut kam, sasaraina kilibet bagat Tuhan, kalulut aipilingan kam Taikamanua barania ka panandaatnia bule nutuarau kam ia te kalulut Ketsat Taikamanua sipuneni kam samba kalulut tonem bagamui ka pubulanan.

¹⁴ Masipuuktungi nenda te aisogai kam Taikamanua kalulut Katuareman Simaeru sipaarepmai, bule nubakkati kam pulatsanan Tuhanta Jesus Kristus.

¹⁵ Oto sasaraina, purio kam simaron samba ometnake kam nganturat sigelaiakenenmai ka kam, ele ka tiboiet ele ka suratmai.

¹⁶ Bule tubut Tuhanta Jesus Kristus samba Taikamanua Ukkuita, sipununtuki sita baga samba siake ka sita pusuibiat simatom samba pukakaronan simaeru, kalulut kiliu bagania,

¹⁷ masipusuibi samba masiparon paatuatmui ka sangamberi galajet samba tiboiet simaeru.