2Tes. 1 - BUKO SIPUNENAN

Salam

¹ Sibara kai Paulus, Silwanus samba Timoteus, masiailiake paamian Tesalonika sikuddu ka bagat Taikamanua Ukkuita samba Tuhan Jesus Kristus.

² Kiliu baga samba aban le ka kam sibara ka Taikamanua Ukkui samba Tuhan Jesus Kristus.

Ukuman ka teteret kaoijanan Kristus

³ Bulat mateu le kusuraki kai simariuriu Taikamanua kalulut kam, sasaraina. Imateteu ia te kalulut tonem bagamui memei iuurau samba nuntut bagamui ka pasasambamui memei itutuppai,

⁴ bailiu tubumai leu masiumunake kam ka paamian Taikamanua kalulut om bagamui samba tonem bagamui ka bagat sangamberi katukukuratmui samba paoreat siorikmui.

⁵ Ia te toggaiat roiponia ukuman Taikamanua, masipatoila mateuan kam bailiu tatogat Purimataat Taikamanua, kalulunia poi anupasiorik kam.

⁶ Aipoi maroipo le Taikamanua masisiliake paoreat ka sia sipaoreji kam

⁷ samba masiake puaroiat ka kam pinaoreda samba leu kai, ka teteret ipatoila tubunia Tuhan Jesus barania ka sorga sambada samalaika ka bagat gegenia, ka bagat api sipujujuluu,

⁸ samba masiukumake sia sitaioba masiagai Taikamanua samba sitaireddet Katuareman Simaeru sibara kai Tuhan Jesus.

⁹ Orikrangan leu ukuman pulangokat sitaitatata, tuareu ka matat Tuhan samba tuareu ka pulatsanan pubeunanannia,

¹⁰ ke moi nia ka gogoi nenda ralatsatnake nia sia sipunenannia samba rakiseiake nia sangamberi simatonem baga, aipoi simunengakenenmai ka kam anukatonemingan kam.

¹¹ Ia te imaririuriu kutiddouake kai kam, bule iaddeake kam Taikamanuanta mateu ka pasogaiatnia samba ka gegenia isutnake puoobamui masigalai galajet simaeru samba galajet tonem bagamui,

¹² bule itulatsatnake onin Tuhanta Jesus ka bagamui, samba kam ka bagania, siripot kiliu bagat Taikamanuanta samba Tuhan Jesus Kristus.