2Taw. 9 - BUKO SIPUNENAN

Pabalougat rimata sinanalep laggai Syeba

¹ Rimata sinanalep laggai Syeba masiarep pagalaiat pubebeunan Salomo. Iageti oinia ka Jerusalem masisibo si Salomo ka panounougat pasikat. Oinia pasamba sipaaleinia samba unta simigi masiambit pusinginan, bukku simakirisau samba mas simakope igi. Kele arapaaili si Salomo, rimata sinanalep nenda masisegeake senengamata panounougat sioi ipaatu.

² Sangamberi panounougat nenda, amoi aialeginia si Salomo, taanai berisara simabesi' aialeginia.

³ Rimata sinanalep nenda masiitco kopet sikut patuatnia si Salomo samba itconangan leu uma purimataat sigalai Salomo,

⁴ komennia sitattatakenen, pagalaiat pukukuddutda siabeu tiboi tubu ka purimataatnia, enung pugagalaira sapaguguletnia samba puleleppeira, sipasikeli lonia samba leu pulelepeira, samba sangamberi buluakenen simatukkle ipanguruatake ka uman Tuhan, iageti makiseinangan kabagania si rimata sinanalep nenda.

⁵ Iageti kuanangan rimata sinanalep nenda kai Salomo, “Sangamberi siarepku ka laggaiku pagalaiat ekeu samba pusikuat patuatnu, bulat aisesengan.

⁶ Siboiki ta matonem bagakku, tapoi kele akuoi kuitco sangamberinia, iapeite matonemnangan bagakku. Bulat sangamberi siarepku nenda tapei iletalaga ka siitcoku kineneiget. Amatoilaat pusikuat patuat samba pukayoatnu abeu peile ka siarepku nenda.

⁷ Bulat mauktuk sia sapaguguletnu sipasikeli ekeu samba simariuriu masiitco pusikuat patuatnu!

⁸ Tuumun le si Tuhan, Taikamanuam! Siuddetake ekeu ibailiu rimata masipaneinei kabagat oniNia, ipakoinong bulat kilibet bagaNia katubum. Kalulut manuntu bagaNia paamian Israel samba ioba rabara simariuriu, iate lulunia iuddetake ekeu sibailiu rimatatda bule nugalaiake puroipoat samba pubulanan.”

⁹ Iageti rimata sinanalep laggai Syeba nenda masikau katubut Salomo panguruat siambitnia, iate epat ngaribu ngakilo mas samba simigi pulaingean bukku simakirisau samba leu pusinginan. Taan aisilo minca si Salomo pusinginan bulat simaeru kele sikau rimata sinanalep laggai Syeba katubunia.

¹⁰ Kisedda leu pagugulet Rimata Hiram samba Rimata Salomo sipasiambit mas sibara ka Ofir kai Salomo, raambit leu bukku simakirisau samba loina pinilok.

¹¹ Loina nenda ipakei si Salomo masigalai orat ka Uman Tuhan samba ka uma purimataatnia, samba leu kecapi samba gambusra sipuurai. Pagalaiat kele nenda tapei abara ka laggai Jehuda.

¹² Rimata Salomo leu masikau katubut rimata sinanalep laggai Syeba sangamberi siobat bagania samba sitiddounia, legei peile siambit rimata sinanalep nenda. Lepa geti rimata sinanalep nenda toilinia ka laggainia sambatda siabeu tiboi tubu ka purimataatnia.

Pukaioat Rimata Salomo

¹³ Senen rura Rimata Salomo masisilo malegre ruapulu telungaribu ngakilo mas,

¹⁴ ta'pei atuadde siambitda ka sipasisasaki, siabeu toboi tubu samba leu sangamberi tai rimata Arab samba leu sangamberi sautet laggai ka Israel masikau mas samba perak katubut Rimata Salomo.

¹⁵ Galainangan si Salomo rua ngotu korabbi sabeu sibara ka mas sipaddai. Ka senen sara korabbi ai mas pitu ngakilo legei.

¹⁶ Galainangan leu et telu ngotu korabbi mas sigoiso samba ka senen korabbi sigoiso nenda ai mas telu ngakilo legei, sangamberinia mas sipaddai. Sangamberi korabbi nenda kaunangannia ka uma sipuoni uma “Leleu Libanon.”

¹⁷ Galainangan leu et sara korosi purimataat sabeu silakkeki sikla samba tupalainge pasamba mas simalina.

¹⁸ Korosi nenda ai kalak kabei, samba karua silat korosi nenda ai tularat singa. Korosi nenda leu et ai enem takat orat samba sara kudduat rere silakkeki mas. Kudduat rere nenda tubailiuake sara pasamba korosi.

¹⁹ Ka tu'tunia kaikatciu samba kaikattoet senen takkat orat nenda ai tularat singa, sangamberinia pulurua ngambua. Taanai korosi purimataat kele nenda ka purimataat bagei.

²⁰ Sangamberi pulokat Salomo tugalai sibara ka mas samba sangamberi bibilet ka uma “Leleu Libanon” tugalai sibara ka mas simalina. Kateteret Salomo, sirimanua masiaddeake perak nenda ta'anai katukaunannia.

²¹ Si Salomo maigi kapania sabeu sipulalajo ka Tarsis sambatda sapagugulet Rimata Hiram. Telu ngarura sangaminca sangamberi kapa nenda itoili masiambit mas, perak, sikla, siteut samba uma' kailaba.

²² Rimata Salomo simakope kayo samba simakope sikut patuat ka bele pei sangamberi rimata ka polak.

²³ Sangamberi rimata ka sangaliot polak masibesiake paaili katubut Salomo addeat masiarep samba masiitso pusisikut patuatnia sikau Taikamanua katubunia.

²⁴ Senen siooi masikau panguruat katubut Salomo. Kaurangan bibilet perak, mas, paleppei-leppei, pamatei, pusinginan, kuro samba kalidei. Kisedda te ka senen rura.

²⁵ Si Salomo ai epat ngaribu gelit kuronia samba keretania. Kuro pasaggaknia ai pulurua ngaribu ngamuneng. Sangarubeiat pagalaknangannia ka Jerusalem samba legeinia ka senen laggai kudduat pasigalangan sangamberi keretania.

²⁶ Muute le nia ka sangamberi rimata barania ka bagat oinan Efrat pat aili ka laggai Filistin samba pasongan Misir.

²⁷ Kateteret pupaneineiat Salomo, perak makere le kele bibilet simatukle ka Jerusalem, kele bukku samba loina pinilok Libanon bulat maigi kele loinat sileu simaturere.

²⁸ Kurot Salomo tuambit sibara ka Misir samba ka sangamberi laggai.

Kamateiat Salomo

²⁹ Pungunguan bagei pagalaiat Salomo, barania ka panandaat pat aili kalepakatnia atusuratakean kabagat buko Pungunguan Pagalaiat Nabi Natan samba bukot Patuptuman Ahia tai Silo samba leu kabagat buko Pamoilianan Nabi Ido sibara leu et pungunguan pagalaiat pupaneineiat Jerobeam, rimata Israel.

³⁰ Epat pulu ngarura burunia aipupaneinei si Salomo ka Jerusalem ka sangaliot Israel.

³¹ Lepa geti tata'nia samba turateiake ka Laggai David. Lepa si Rehabeam togania ibailiu rimata masisailiakenia.