2Taw. 8 - BUKO SIPUNENAN

Sigalaiakenen Rimata Salomo

¹ Kele aisabau rua pulungarura tukapplunangan aigalai Uman Tuhan si Salomo samba uma purimataatnia.

² Sangamberi laggai sikau Rimata Hiram katubunia galainangannia minca, lepa koiniakenangan tai Israel mukuddu sedda.

³ Iageti oppunangan laggai Hamat samba Zoba.

⁴ Paronnangan leu laggai Tadmor ka kudduat simatangeu, lepa galainangan minca sangamberi kudduat pasikoirikat ka Hamat.

⁵ Paronnangan leu minca laggai Bet-Horon ka tiri samba laggai Bet-Horon ka taggurat ibailiu laggai sibara irip bukku samba matatbaliu gugurukat sibara lekkerat.

⁶ Galainangan leu et minca laggai Baalat, samba sangamberi laggai kudduat pangoirikat samba sangamberi laggai kudduat pasigalangan kereta pasaggak samba kuronia. Sangamberi pinaatunia masigalai laggai Jerusalem, Libanon samba ka sangaliot kupkumennia aigalaiakean.

⁷ Sangamberi sirimanua sipulelegei tai Het, Amori, Feris, Hewi samba tai Jebus, sitaiadddeakenen tai Israel,

⁸ iate muntogat sipukukuddu peile ka laggai nenda sitaimamateiakenenda tai Israel, sia te aikau si Salomo sibailiu sipugagalai simasane, kiseddda te sia teret kineneiget.

⁹ Tapoi tai Israel ta aibailiuake sia si Salomo sibailiu sipugagalai simasane, tapoi ibailiuake sia saladdu, saladdu sipukukuro, ele ute saladdu sipukekereta samba sipukukuro.

¹⁰ Rua ngotu lima puluh sia igitda ikau galajetda Rimata Salomo masipasikeli sangamberi sirimanua sipugagalai simasane.

¹¹ Si Salomo masikau sinanalepnia, togat Parao, sibara ka Laggai David mukuddu ka lalep sigalainia ka sia. Kalulut aipaatu poi si Salomo, “Tamomoi ipukuddu sinanalepku ka uma purimataat David, Rimata Israel, kalulut sangamberi kudduat aituguruake Peti Pakerekat Baga iate sipunenan.”

¹² Iageti panguruatakenen buluakenen rarangen si Salomo kai Tuhan ka kudduat pasibuluat sigalainia ka matat Uman Tuhan.

¹³ Buluakenen nenda ipanguruatake siripot Surukat Mose ka senen punen sabeu: gogoi Sabat, gogoi punen Laggo Sibau, samba ka telu punen senen rura, iate punen Roti Sitasioman, punen Pasimoneiat samba punen Sapou Buluk.

¹⁴ Siripot surukat David, ukkuinia, si Salomo masipagalak galajetda tai imam ka senen gogoi samba ka tai Lewi masiuraiake urai pasiumun kai Tuhan samba masiropake tai imam kabagat masigalaiake punen panindogat. Kisedda leu et sipasijajago Uman Tuhan rubeinangannia kabagat mungkuat ka senen matatbaliu gugurukat, siripot siteuakenen David pagugulet Taikamanua.

¹⁵ Sangamberi siteuakenen David ka tai imam samba ka tai Lewi pagalaiat kudduat pangoirikat samba pabageibagei, galaiakerangannia simakolou.

¹⁶ Iageti tukapplunangan sangamberi galajet siripot sipinatut Salomo. Sangamberi galajet, barania ka pasigalangan bukku bongen pat lepa Uman Tuhan, atugalaian simakolou.

¹⁷ Lepa nenda si Salomo mei ka laggai Ezion-Geber samba ka Elot, laggai sosoroat ka bebet koat Tunang Akaba ka laggai Edom.

¹⁸ Rimata Hiram masikau katubut Rimata Salomo kinapat samba sirimanua siagai pagalaiat koat. Pulajorangan ka laggai Ofir sambatda sipugagalai katubut Salomo samba alarangan sedda pulu lima ngaribu ngakilo mas, lepa ambitrangannia kai Salomo.