2Taw. 4 - BUKO SIPUNENAN

¹ Rimata Salomo masikoniake maisigalai kudduat pasibuluat tembaga nanta samba lionia rua pulu eto, samba buaknia pulu eto.

² Si Salomo leu et masigalai sara simuko bulat sabeu simamuine, kirekatnia iate: gorot talagania lima eto, kerut bagania lima eto, bokkat bagania telu pulu eto.

³ Ka sangaliot tei bebet simuko nenda ai tularat jaui, kabagat saeto ai pulu tularat jaui, tularat jaui nenda ai rua sipatutut. Tularat nenda tugalai simakere pasamba simuko nenda.

⁴ Simuko nenda tugalakake ka uddut teitei pulurua jaui tembaga, telu jaui simatai ka bare, telu simatai ka sikaleleu, telu simatai ka kaiaman samba telu simatai ka sikalaut. Senen leilei jaui nenda paruru isit kabaga.

⁵ Kepput simuko nenda kele kepput takep, bebenia makere bebet pulokat, kele ogo kainau sipubotco. Simuko nenda metnangan tukau kabagania enem pulu ngaribu liter oinan.

⁶ Rimata Salomo igalai leu pulu ngambua simuko sabeu kudduat pasibuijat, lima simuko ka isit kai katciu samba lima isit kai kattoet Uman Tuhan. Sangamberi simuko nenda katukaunannia iate masibui te'tet tarimeu rarangen sibailiu buluakenen. Oinan kabagat simuko sabeu nenda tutarekake pasibui tubutda tai imam.

⁷ Igalai leu pulu reret alito sibara ka mas siripot siteuakenen samba kaunangannia kabagat Uman Tuhan, lima reret alito saigit kaikattoet samba lima saigit kaikatciu.

⁸ Igalai leu et pulu meja samba kaunangannia kabagat Uman Tuhan, lima saigit kaikattoet samba lima kaikatciu; samba galainangan leu et sangotu seseilu sibara ka mas.

⁹ Rimata Salomo leu masigalai pulaibokatda tai imam samba sara laibokat ka uja. Matatbaliu gugurukat ka paoggangan rua laibokat nenda talakkeki pasamba tembaga.

¹⁰ Simuko bulat sabeu nenda kaunangannia ka isit kaikattoet, ka saigit sikalaut kaiaman Uman Tuhan.

¹¹ Si Huram iate utera siagai kabei, masigalai koali, susukkai samba seseilu. Kisedda te Si Huram ailepaake galaiakenennia ka Uman Tuhan, sangamberinia nene igalaiake sibailiu uktuk Salomo.

¹² Galainangan leu rua arigi sabeu, rua utet arigi simamuine ka utet arigi nenda, ka rua letcu sitikai sitabbo ka rua utet arigi simamuine nenda;

¹³ siepatngotu ngambua delima ka rua letcu sitikai nenda. Ai rara rua buat delima ka sara letcu sitabbo ka rua utet arigi simamuine nenda.

¹⁴ Galainangan leu et kereta simigi pasisopo samba simuko simigi pasibuijat ka uddut kereta nenda;

¹⁵ simuko bulat sabeu sara nenda samba ka pulu rua jaui ka teinia.

¹⁶ Koali simigi, susukkai, pasikakkak samba senengamata bibilet sigalai Huram-Abi sibailiu uktuk Salomo ka Uman Tuhan iate sigalai ka tembaga simakirisau.

¹⁷ Rimata Salomo masikoiniake ragalai sangamberi bibilet nenda ka paoggangan Sukot samba Zereda ka su'sut Jordan.

¹⁸ Bibilet nenda bulat maigi, bailiu berisara sia siagainia piga pa atupakei tembaga nenda.

¹⁹ Si Salomo leu masikoniake masigalai bibilet sibara Uman Tuhan, iate kudduat pasibuluat samba kudduat roti panguruatakenen,

²⁰ samba reret alito sibara ka mas simaeru samba alitonia, tunamen ka saigit ka mata Bilik Bulat Sipunenan, siripot siteuakenen;

²¹ pulaingean kele ogo, alito samba lalaplap sibara ka mas, sangamberinia sigalai sibara ka mas simaeru;

²² balatu, seseilu, pulokat samba kudduat bot obengan sigalai sibara ka mas simaeru; kisedda leu et matatbaliu gugurukat ka Uman Tuhan, samba matatbaliu ka isit kabaga ka Bilik Bulat Sipunenan, samba matatbaliu ka bilik sabeu Uman Tuhan sangamberinia sigalai sibara ka mas.