2Taw. 34 - BUKO SIPUNENAN

Si Josia rimata Jehuda

¹ Si Josia balu ngarurania beunannia kateteret aibailiunia rimata Jehuda, samba aipupaneinei ka Jerusalem telu pulu sara ngarura burunia.

² Si Josia masigalaiake simaeru ka matat Tuhan. Nia masitut kele purimanuaiat Rimata David taikebbukatnia, samba mareddet ka sangamberi surukat Taikamanua kabagat muinet patuatnia.

Si Josia masitataake pasibuluijiat bulungan

³ Ka rura sikabalu pupaneinei Josia sibailiu rimata, kateteret bulat sibau tubu peilenia, taddakenangan manindou ka Taikamanua panindogiet Rimata David taikebbukatnia. Epat ngarura sibabara minca taddaakenangan masipakatai sangamberi kudduat pasibuluijiat bulungan, tularat Asyera, bulungan sinanalep, samba leu tularat bulungan bagei.

⁴ Pakatairangan samba bubuakerangan sapagugulet Josia sangamberi kudduat pasibuluijiat bulungan Baal, lepa pasaragairangan abunia ka uddut rateira sipanguruatake buluakenen ka sabulungan nenda. Kudduat pasibuluat ka bulungan Baal samba kudduat kumanyang sibabara sedda bukkatakerangannia.

⁵ Iageti laboakenangan si Josia sangamberi tolatda tai imam sipasibuluiji bulungan nenda ka uddut kudduat pasibuluat. Kisedda te aipalina Jehuda samba Jerusalem si Josia kamatat Tuhan.

⁶ Kisedda leu et aigalaiake ka laggai-laggai Manasye, Efraim samba Simeon pat aili ka Naftali ka bare.

⁷ Sangamberi kudduat pasibuluat samba tularat Asyera, bulungan sinanalep, ka sangaliot Purimataat ka Bare bukkatakenangannia si Josia, lepa pakatainangan leu sangamberi tularat bulungan samba kudduat pasilabokat kumanyang. Iageti toili si Josia ka Jerusalem.

Tusese minca Buko Surukat Tuhan

⁸ Ka rura sikapulu balunia kateteret Rimata Josia, lepat aipalina pasibuluijiat bulungan ka Uman Tuhan samba ka sangaliot laggai, koiniakenangan telu sirimanua masipaeru Uman Tuhan Taikamanua. Si telu sirimanua nenda iate: Safan togat Azalya, Maaseya, siuteake laggai Jerusalem samba lei si Joah togat Joahas, siabeu tiboi tubu.

⁹ Tai Lewi sipasijajago Matatbaliu Uman Tuhan masikau kai Imam sabeu Hilkia, bulagat siruruakenenda. Bulagat nenda sibara ka tai Efraim, Manasye, sibara ka siberikabaga ka Purimataat ka Bare, sibara ka siberikabaga ka Jehuda, Benjamin samba Jerusalem.

¹⁰ Iageti bulagat nenda ikau si Imam Sabeu Hikia katubutda sitelu nenda sipasikeli galajet masipaeru Uman Tuhan, samba leu kaurangan bulagat nenda

¹¹ ka sipugagalai loina samba siagai masigalai lalep, bule sipugagalai nenda masisaki bukku samba loina itupaeru lalep simabubukkat sitaipasikelitda tai rimata Jehuda.

¹² Sipugagalai nenda ragalaiake galajetda simakolou. Siuteake sia iate epat sia tai Lewi: Jahat, Obaja sibara ka Merari, Zakharia samba Mesulam sibara ka muntogat Kehat. Sangamberi tai Lewi siagai masinauake sipaalei ka urai,

¹³ tukau puuketda masipasikeli galajetda sangamberi sipugagalai ka senen galajetda. Katalagatda tai Lewi nenda ai sibailiu sipanunurat, sirubeiake galajet samba sipasijago matatbaliu.

¹⁴ Kateteret aitubelaake bulagat nenda ka Uman Tuhan, sesenangan si Hilkia buko Surukat Tuhan iate surukat sikau Taikamanua katubut Mose.

¹⁵ Kuanangan si Hilkia kai Safan, “Akusese buko Surukat Tuhan ka Uman Tuhan!” Lepa kaunangan buko nenda si Hilkia katubut Safan.

¹⁶ Silonangan buko nenda si Safan, lepa einia kai rimata samba kuanangan, “Sangamberi sikuam akugalaiakean kai.

¹⁷ Akualaan bulagat sikoiriakenen ka Uman Tuhan, samba akukauan kai katubutda sipugagalai samba sipasijajago galajet nenda.”

¹⁸ Iageti kuanangan minca si Safan, “Aiake buko nene si Hilkia katubukku.” Lepa basaakenangan buko nenda si Safan ka matat rimata.

¹⁹ Kele aiarep ngangan bagat buko nenda rimata, biritakenangan leppeinia kalulut reureu bagania.

²⁰ Lepa geti kuanangan kai Hilkia, Ahikam togat Safan, Abdon togat Mikha, Safan sipanunurat ka uma purimataat, samba Asaya pagugulet rimata,

²¹ “Kenan kam parere katubut Tuhan pagalaiat aku samba sangamberi siberikabaga sibabara peile ka Israel samba Jehuda pagalaiat ngangan bagat buko nene. Mugolu le Tuhan katubutta kalulut ta aragalaiake taikebbukatta sangamberi surukat sitususurat kabagania.”

²² Iageti ei si Hilkia, Ahikam, Abdon, Safan samba Asaya masitiddou enungan katubut sara nabi sinanalep sipuoni Hulda. Laggainia ka pulaggaiat sibau ka Jerusalem. Simanteunia sipuoni Salum togat Tikwa, punuteteu Harhas. Si Salum iate sipuuku leppei panindou ka Uman Tuhan. Kele aiarep sikuatda si Hulda,

²³ koiniakenangan sia ratoili katubut rimata samba segeakerangan patonekat nene, “Tuhan, Taikamanua panindogietda tai Israel masikua,

²⁴ ‘Kuukum te Jerusalem samba sangamberi silaggaijinia pasamba telei sitususurat kabagat buko nenda sibasaakenenda katubut rimata.

²⁵ Arakaddiuakean Aku samba arapanguruatakean buluakenen ka taikamanua bagei. Sangamberi sigalaiakenenda sibaraake goluKu samba golukKu katubut Jerusalem sitaioi tupeake.

²⁶ Tapoi pagalaiat Rimata Josia, nene patonekatKu, Tuhan Taikamanuan Israel: Lepat anuarep sitususurat kabagat buko nenda,

²⁷ oleinangan bagam samba bauakenungan patuatnu katubukKu. Akuteuakean masiukum Jerusalem samba silaggaijinia, tapoi kateteret anuarep pagalaiat siteuakenenKu nenda pusounungan samba biritakenungan leppeinu toggaiat reureu bagam. Akuarepan panindogatnu,

²⁸ kalulut nenda, ukuman ka Jerusalem taan Kugagalaiake ka burut puririmanuam. Kuobaake le numatei kabagat aban.’ ” Iageti toili sapakoiniet nenda katubut rimata samba segeakerangan patonekat nenda.

Si Josia masigalai palelengan mureddet katubut Tuhan

²⁹ Lepa nenda Rimata Josia masisogai sangamberi sikebbukat laggai ka Jehuda samba ka Jerusalem.

³⁰ Iageti ei rimata ka Uman Tuhan sambatda sangamberi tai Jehuda samba sangamberi sipulalaggai ka Jerusalem, tai imam, tai nabi samba sangamberi sirimanua, sigoiso samba sabeu. Arepirangan ibasaakenia rimata sangamberi tiboiet ka buko palelengan sinesetda ka Uman Tuhan.

³¹ Lepa nenda purionangan rimata ka kudduatnia samba galainangan palelengan ka matat Tuhan, ipurimanua masitut si Tuhan samba mariuriu igalaiake sangamberi surukatNia, siteuakenenNia samba sitakkiakenenNia kabagat muinet patuat samba sangaliot tubunia igalaiake palelengan sitususurat kabaga buko nenda.

³² Sangamberi tai Benjamin samba sangamberi sikuddu ka Jerusalem koiniakenangan sia masigalai palelengan masiredet surukat nenda. Iageti galaiakerangan leu surukat sitususurat nenda tai Jerusalem, iate palelenganda pasamba Taikamanuan taikebbukatda.

³³ Iageti areuakenangan si Josia sangamberi bulungan kasitsitakenen ka sangamberi laggaira tai Israel samba koiniakenangan sangamberi sikuddu ka Israel manindou katubut Tuhan, Taikamanuanda. Oto ka sanganantat purimanuaiat Josia, mariuriu topitda katubut Tuhan.