2Taw. 32 - BUKO SIPUNENAN

Tai Asyur masiukkat Jerusalem

¹ Lepat aipatoila purereddetnia Rimata Hizkia katubut Tuhan, si Sanherib Rimata Asyur masisaggangi Jehuda. Alounangan laggai-laggai sibara irip samba koiniakenangan saladdunia bule raoppunia.

² Kele aiagainia si Hizkia, isiat Sanherib masisaggangi Jerusalem,

³ patiboakenangan sautet saladdunia si Hizkia samba leu sirimanua simagege bule rapetpet sangamberi bubuakat ka ujat laggai. Sautet saladdu samba sirimanua simagege raoba raropakenia.

⁴ Iageti parururangan sirimanua simigi. Petpetrangan sangamberi bubuakat samba bagat oinan sipuguguruk sibara katalagat laggai siei ujat lagggai nenda. Kuarangan, “Ke moi sia masisaggangi sita, angoian le takakau oinanda simigi tai rimata Asyur?”

⁵ Iageti paronnnangan laggai si rimata, paerunangan iripnia, galainangan kudduat pujagoat simabuak ka udutnia samba galainangan irip bagei ka uja. Ta sarat nenda, paerunangan leu et irip sigalai ka uddut polak sitabbui ka isit sikalaut rubeiat siburu laggai Jerusalem. Koiniakenangan leu ragalai sosoat samba korabbi simigi.

⁶ Pauddetakenangan sautet saladdu masiuteake sangamberi taimanteu kabagat laggai, samba koiniakenangan sia paruru ka polak simabaoi kamatat matatbaliu gugurukat laggai. Lepa kuanangan katubutda,

⁷ “Kau numagege samba matonem bagamui! Bui numaloto kam katubut Rimata Asyur samba ka sangamberi saladdu sipaaleinia, kalulut sipaalei sita peile maigi bele peile igit sipaaleinia.

⁸ Sipaaleinia iate ron sirimanua, tapoi sipaalei sita iate Tuhan Taikamanuanta sipasiroropake sita samba sipasasaggak ka sita.” Masiarep sikuat rimatatda nenda, magegerangan siberikaga.

⁹ Piga pa burunia atusabau kateteret Sanherib pasamba saladdunia ai peile ka Lakhis, kaunangan pakoiniet kai Hizkia samba ka tai Jehuda ka Jerusalem masisegeake patonekat nene,

¹⁰ “Aku Sanherib rimata Asyur. Kuoba kuagainia, aponia lulunia numagegege samba numaririuriu kammukuddu ka Jerusalem sialou nene”

¹¹ Ta pa aipajo le kam si Hizkia, bule numatei kam kalulut laje samba oggou, masikua katubumui: Tuhan, Taikamanuanta, masibebelaake sita geti ka kabei rimata Asyur?

¹² Si Hizkia te amasipakatai sangamberi kudduat pasibuluijiat samba kudduat pasibuluat katubut Tuhan, samba amasikua ka tai Jehuda samba Jerusalem: manindou samba nulabo kam buluakenen ka sara kudduat pasibuluat le.

¹³ Ta pa nuagai aponia sigalaiakenenku samba sigalaiakenenda taikebbukatku ka laggai-laggai bagei? Amoi pa taikamanuan laggai bagei nenda arabelaake laggaira ka kabeiku?

¹⁴ Kasei katalagat sangamberi taikamanuan laggai-lagai simateiakenenda taikebbukatku amoi aibelaake laggainia ka kabeiku? Kipa ioi ibelaake ekeu Taikamanuam ka kabeiku?

¹⁵ Kineneiget, bui' ipabokoiji kam si Hizkia samba ina'na kam kele nene! Bui imatonem bagamui katubunia, kalulut taanai taikamanuan laggai ele purimataat kasei pa sioi masibelaake laggainia ka kabeiku samba ka kabeira taikebbukatku, sarapei Taikamanuamui, tamomoi ibelaake kam ka kabeiku!”

¹⁶ Maigi peile tiboiet bagei sikuatda sapakoiniet Asyur nenda masipaloloi Tuhan Taikamanua samba si Hizkia pagugulet Tuhan.

¹⁷ Rimata Asyur leu masigalai surat masipaloloi Tuhan, Taikamanua panindogietda tai Irsael. Kise ngangan surat nenda, “Sangamberi bulungan laggai bagei tamomoi rabelaake laggainia ka kupkumenku, kisedda leu et bulungan Hizkia, tamomoi leu et ibelaake laggainia kabagat kupkumenku.”

¹⁸ Sangamberi sikoiniakenen Asyur nenda masigereiake sangamberinia nenda ka ngangan Heber masiloto samba masiteteake patuatda tai Jerusalem sikuddu ka uddut irip laggai, bule imalabbei raoppu laggai nenda.

¹⁹ Ratiboi le pagalaiat Taikamanua panindogiet ka Jerusalem makere kele sabulungan laggai bagei, iate tularat sigalai sirimanua.

²⁰ Iageti panindounangan Rimata Hizkia samba nabi Jesaya togat Amos. Pusogarangan masitiddou paroman katubut Taikamanua.

²¹ Iageti koiniakenangan sara malaika si Tuhan masimateiake sangamberi saladdu samba sautet saladdu Asyur nenda. Kabagat aila sabeu toili rimata Asyur ka laggainia. Ka sara gogoi kateteret ainia kabagat uma bulungannia, piga pa katalagat tatogania mei masimateiakenia pasamba lanjau.

²² Kisedda te enungannia si Tuhan aibelaake Rimata Hizkia samba sipulaggai ka Jerusalem ka kabei Sanherib rimata Asyur samba ka sangamberi saggakra bagei. Si Tuhan masikau katubutda purimanuaiat simaaban taanai sigeugeu sia sibara ka laggai pabebeakenenda.

²³ Maigi sirimanua sioi ka Jerusalem masiambit panguruat kai Tuhan samba bibilet simakeppu saki kaunenda kai Hizkia, rimata Jehuda. Barania kateteret nenda abeuakerangannia sangamberi laggai.

Besit Hizkia samba pubuangan patuatnia

²⁴ Kateteret nenda bara besinia Rimata Hizkia. Besinia nenda bulat makope, bailiu malegre imatei, Panindounangan katubut Tuhan samba si Tuhan masikau toggaiat katubunia pagalaiat kaaletnia.

²⁵ Tapoi kalulut mabuak patuatnia, ta amusurania kalulut kaalenia sikau Tuhan katubunia. Kalulut nenda pugolunangan si Tuhan katubut Jehuda samba Jerusalem.

²⁶ Tapoi kalepakatnia si Hizkia samba sangamberi tai Jerusalem bauakeragan patuatda, bailiu ka burunia purimanuaiat Hizkia ukuman nenda ta atuenungake.

Pukayoat samba pubebeunan Hizkia

²⁷ Makayonangan simakope Rimata Hizkia samba abeuakerangannia sirimanua. Galainangan leu pabilik-bilik pangoirikat pukayoatnia iate: mas, perak, bukku simakirisau, pusinginan, korabbi samba bibilet bagei simakeppu saki.

²⁸ Ai leu et kudduat pangoirikat komennia iate gandum, anggur, tulat zaitun; kisedda leu et gelit jaui samba biribiri simakope igi.

²⁹ Ta sarat nenda, igalai leu maigi laggai. Pukayoat sikau Taikamanua bulat amusukkrangan.

³⁰ Rimata Hizkia te amasikekre pugurungan bubuakat oinan Gihon ka tiri, samba amasiguruakenia ka taggurat ka isit sikaleleu, laggai David. Si Hizkia mariuriu ka sangamberi galaiakenennia.

³¹ Kisedda leu et kateteret araoi pakoiniet sibara ka Babel masiparereake katubunia pagalaiat kiseiet kaalenia, kateteret nenda Taikamanua masikaddiuake si Hizkia isibonia, bule tuagai sangamberi sibabara kapatuatnia.

Kalepakat pupaneineiat Hizkia

³² Pungunguan bagei pagalaiat si Hizkia, samba pagalaiat nuntut bagania katubut Tuhan tusuratake kabagat buko Pamoilianan sibara ka Taikamanua Katubut nabi Jesaya Togat Amos, samba kabagat buko Pungunguan Pagalaiat Tai rimata Jehuda samba Israel.

³³ Iageti tata si Hizkia, lepa rateiakerangannia ka rubeiat simatatra ka puariatda tai rimata. Sangamberi tai Jehuda samba Jerusalem masiabeuakenia kateteret aitata. Si Manasye, togania, ibailiu rimata masisailiakenia.