2Taw. 30 - BUKO SIPUNENAN

Panarengan punen Paskah

¹ Iageti kaunangan patonekat si Hizkia ka sangaliot Israel samba Jehuda, samba leu galainangan surat katubut Efraim samba Manasye bule moi sia mupunen Paskah kai Tuhan, Taikamanuanda tai Israel, ka Uman Tuhan ka Jerusalem.

² Rimata pasamba sikebbukat laggai samba sangamberi paamian ka Jerusalem masiisiake punen Paskah ka laggo sikarua,

³ kalulut tapei momoi ragalaiake punen nene ka gogoi siteuakenen, kalulut tai imam sipuneni tubu ta maigi sia samba tapei maigi sirimanua siparururu ka Jerusalem.

⁴ Rimata samba paamian mangka baga masisilo isiat nenda.

⁵ Teuakerangannia masipaagaiake ka sangaliot Israel, barania ka Bersyeba pat aili ka Dan, bule senesenenda moi ka Jerusalem mupunen Paskah kai Tuhan, Taikamanuan Israel, kalulut tapei arapunenake paskah simakere siripot sitususurat.

⁶ Iageti tuitui sia simaola sikoiniakenen nenda ka sangaliot Israel samba Jehuda masiambit surat sibara kai rimata samba ka sikebbukat laggai, samba segeakerangannia kele sikuat rimata, “Ale tai Israel, toiliake kam kai Tuhan, Taikamanuan Abraham, Ishak samba Israel, bule itoili minca si Tuhan iropake kam.

⁷ Bui nupuparaboat kam kele taikebbukatmui samba sasarainamui sitaimareddet katubut Tuhan, Taikamanuan taikebbukatda, bailiu ukumnangan sia simakope kele siitcomui.

⁸ Kineneiget, bui'' makela patuatmui kele taikebbukatmui. Segeake kam tubumui kai Tuhan samba konan kam ka Jerusalem, ka Uman Tuhan ka kudduat sikokoiakenen Tuhan Taikamanuamui kudduatNia teret buruburu. Panindou kam katubut Tuhan, Taikamanuamui, bule imaleppet goluNia katubumui.

⁹ Ke toili kam mupagugulet katubut Tuhan, oto sangamberi sirimanua siambit sasarainamui sibailiu tangsiakenen, manuntunangan bagatda samba obaakerangan ratoili. Tuhan Taikamanuamui iate Taikamanua simatopit samba simanuntu baga; isilo le kam ke toili kam katubuNia.”

¹⁰ Kele araei sikoiniakenen nenda ka laggai-laggai, ka kupkumen laggai Efraim samba Manasye pat aili ka Zebulon, gagatirangan samba paloloirangan sia.

¹¹ Tapoi aileu sirimanua sibara ka muntogat Asyer, Manasye samba Zebulon sioba moi ka Jerusalem.

¹² Ka Jehuda leu Taikamanua masimuineake patuatda musara mureddet ka obaket Taikamanua kabagat masitut pakoiniat rimata samba sikebbukat laggai.

Punen Paskah

¹³ Ka laggo sikarua parururangan siberikabaga ka Jerusalem masipuneni Punen Sabeu Roti Sitasioman.

¹⁴ Sangamberi kudduat pasibuluat ka Jerusalem pakeiet masipanguruatake buluakenen samba pasilabokat kumanyang ka sabulungan, sangamberinia tuala samba turibbaiake ka Su'sut Kidron.

¹⁵ Ka laggo sikapuluepat ka laggo nenda, jajarangan biribiri panguruatakenen sibailiu buluakenen Paskah. Tai imam samba tai Lewi kasitsitakenen bulat mailarangan. Iageti punenirangan tubutda, bailiu oinangan rapanguruatake buluakenen rarangen ka Uman Tuhan.

¹⁶ Puriorangan ka kudduat siripot siteuakenen ka sia senesenenda, siripot Surukat Mose, pagugulet Taikamanua nenda. Tai imam masisubuiake logau sisilora ka tai Lewi ka uddut kudduat pasibuluat.

¹⁷ Kalulut maigi peile katalagat paamian sitaipuneni tubutda, oto tamomoi rajaja biribiri buluakenen Paskah. Kalulut nenda tai Lewi le masigagalaiake nenda ka sia samba masipangunguruatake katubut Tuhan.

¹⁸ Ta sarat nenda, katalagatda tai Efraim, Manasye, Isakhar samba Zebulon, maigi sioi sitaipuneni tubu boiki. Oto, punenakerangan Paskah nenda ta siripot enungan punen. Kalulut nenda tiddouakenangan sia Rimata Hizkia, kise,

¹⁹ “Tuhan, Taikamanua, umunakenen taikebbukatmai, bule sibara ka erut bagam Nuappeake sia sipaninindou katubum ka muinet patuat, kenanen tapei arapuneni tubutda.”

²⁰ Arepinangan panindogat Rimata Hizkia si Tuhan. Appeakenangan sangamberi sirimanua nenda, samba ta aiukum sia.

²¹ Pitu ngagogoi burunia, kabagat angkat baga sabeu sangamberi siparururu ka Jerusalem nenda baraakerangan punen Roti Sitasioman. Senen gogoi sangamberi tai Lewi samba tai imam masiumun si Tuhan sipulelelek.

²² Tai Lewi nenda bulat raagai masiuteake panindogat katubut Tuhan, bailiu umunnangan sia si Hizkia. Lepat pitu ngagogoi burunia rananam komen ka punen nenda samba leu masipanguruatake buluakenen rakua sura katubut Tuhan, Taikamanuan taikebbukatda,

Punen sikarua

²³ teuakerangannia sangamberitda rariuriuake minca punen nenda pitu ngagogoi. Lepa pupunenrangan minca kabagat gorat baga.

²⁴ Rimata Hizkia masipanguruatake sangaribu ngamuneng jaui simanteu samba pitu ngaribu biribiri. Saute masipanguruatake sangaribu jaui simanteu samba pulu ngaribu biribiri. Sangamberi tarimeu nenda tukau ka siberikabaga bule ituja'ja samba itukom. Bulat maigi tai imam masipuneni tubutda.

²⁵ Tai Jehuda, tai imam, tai Lewi samba sia siooi sibara ka bare, samba leu sia siooiake siturerere ka Israel samba Jehuda, sangamberitda mangka baga.

²⁶ Laggai Jerusalem muangka baga simakope kalulut barania kateteret si Salomo togat David, tapei amuaili kele nene.

²⁷ Lepa nenda tai imam samba tai Lewi puriorangan samba sukatakerangan siberikabaga. Arepinangan panindogat samba tiddogetda si Tuhan ka kudduatNia sipunenan ka manua.