2Taw. 29 - BUKO SIPUNENAN

Si Hizkia rimata Jehuda

¹ Si Hizkia ibailiu rimata Jehuda kateteret ruapulu lima ngarurania, samba aipupaneinei ka Jerusalem rua pulusiba ngarura burunia. Inania sipuoni Abia togat Zakharia.

² Si Hizkia masigalaike siangkaake bagat Tuhan kele Rimata David taikebbukatnia.

Si Hizkia masipuneni Uman Tuhan

³ Ka laggo sikasara, kabagat rura siboiki pupaneineiatnia, nga'ngaakenangan sangamberi matatbaliu Uman Tuhan samba koiniakenangan sirimanua rapaerunia.

⁴ Koiniakenangan tai imam samba tai Lewi raparuru ka laibokat rubeiat isit sikalaut Uman Tuhan,

⁵ Kuanangan katubutda, “Kam tai Lewi! Kineneiget puneni kam tubumui samba puneni kam Uman Tuhan, Taikamanuan taikebbukatmui! Belaake kasitsitakenen ka uma nenda.

⁶ Kalulut taimareddettda taikebbukatta ragalaiake sikatai ka matat Tuhan, Taikamanuanta. Ta arapuletseiNia samba ta arapuuku kudduatNia.

⁷ Patpatakerangan leu sangamberi matatbaliu Uman Tuhan samba peakerangan sangamberi alito. Ta arararak kumanyang ka Uman Tuhan samba ta arapanguruatake buluakenen rarangen katubut Taikamanua panindogietda tai Israel.

⁸ Iageti si Tuhan kabagat goluNia ukumnangan tai Jehuda samba tai Jerusalem. Samba anuagaian kam sangamberimui sigalaiakenen Tuhan nenda masibaraake katugegekat samba loto ka sangamberi sirimanua.

⁹ Saukkuita, amateian sia kabagat pasaggangan samba tatoga, tainanalepta arambit sia sibailiu tangsiakenen.

¹⁰ Kineneiget kuoba masigalai palelengan pasamba si Tuhan, Taikamanuan Israel bule buian ipugolu katubutta.

¹¹ Kam tatogakku, buian tapaburunia, aipoi kam te aikokoiake si Tuhan bule manindou samba mupagugulet katubuNia samba masilabo kumanyang samba masiuteake siberikabaga kabagat panindogat.

¹² Iageti suru sia tai Lewi nenda, sibara ka muntogat Kehat iate: Mahat togat Amasai samba Jo'el togat Azaria. Sibara ka muntogat Merari iate: Kish togat Abdi samba Azaria togat Jehaleleel. Sibara ka tai Gerson iate: Joah togat Zima samba Eden togat Joah.

¹³ Sibara ka muntogat Elisafan iate: Simri samba Jeiel. Sibara ka muntogat Asaf iate: Zakharia samba Matanya.

¹⁴ Sibara ka muntogat Heman iate: Jehiel samba Simei. Sibara ka muntogat Jedutun iate: Semaya samba Uziel.

¹⁵ Ruruakerangan sasarainanda samba punenirangan tubutda. Iageti oi sia siripot pasogaiat rimata, kele sikuat Tuhan, lepa punenirangan Uman Tuhan.

¹⁶ Lepa nenda tugururangan tai imam ka rubeiat kabaga ka Uman Tuhan rapuneninia. Sangamberi kasitsitakenen, sisesetda kabagat Uman Tuhan, ambitrangannia ka laibokat Uman Tuhan; silorangannia tai Lewi bule raambitnia ka uja, ka Su'sut Kidron.

¹⁷ Arataddaake galajet nenda iate ka gogoi sikasara laggo sara. Ka gogoi sikabalu ka laggo nenda tukapplunangan arapuneni sangaliot pulaibokat Uman Tuhan pat aili ka bilik isit kamata. Iageti kaburut balu ngagogoi minca punenirangan uma nenda sangalionia pat lepa ka gogoi sikapulu enem ka laggo nenda.

Uman Tuhan tusegeake minca katubut Taikamanua

¹⁸ Iageti tai Lewi nenda ei sia masisegeake katubut Rimata Hizkia, kuarangan, “Alepaan akupuneni kai Uman Tuhan sangamberinia, kisedda leu et kudduat buluakenen rarangen, kudduat roti panguruat samba sangamberi pugalainia.

¹⁹ Kisedda leu et sangamberi pugalai, siribbaiakenen Rimata Ahas kateteret ta aimareddet katubut Tuhan, kateteret pupaneineiatnia, akualaan kai minca samba akupuneningan kai. Kineneiget sangamberinia nenda ai ka matat kudduat pasibuluat.”

²⁰ Iageti simanseman Rimata Hizkia masiruruake sikebbukat laggai samba ei sia simakere ka Uman Tuhan.

²¹ Ambitrangan pitu ngamuneng jaui simanteu, pitu ngamuneng biribiri simanteu, pitu ngamuneng togat biribiri samba pitu ngamuneng kambing simanteu sibailiu buluakenen pasiappet jot sangalalep rimata, Uman Tuhan samba tai Jehuda, rapanguruatakenia ka uddut kudduat pasibuluat.

²² Iageti jajarangan sangamberi jaui nenda, lepa subuiakerangan logau nenda tai imam ka kudduat pasibuluat. Kisedda leu et aragalaiake ka sangamberi biribiri simanteu samba ka sangamberi togat biribiri.

²³ Kalepakatnia alarangan sangamberi kambing nenda samba ambitrangannia kai rimata samba ka seberikabaga sipaninindou sedda, lepa geti sangamberitda galakakerangan kabeira ka uddut sangamberi kambing nenda.

²⁴ Iageti jajarangan sangamberi kambing nenda tai imam samba logaunia tusubuiake ka kudduat pasibuluat sibailiu buluakenen pasiappet jot sangamberi siberikabaga. Aragalaiake nene kalulut aikoiniake sia rimata bule tubaraake buluakenen rarangen samba buluakenen pasiappet jot sangamberi tai Israel.

²⁵ Rimata masipagalak tai Lewi ka Uman Tuhan ranauake kecapi samba gambus. Nene siripot enungan galaiakenen sikau Tuhan katubut David sisegeakenen nabi Gad samba nabi Natan.

²⁶ Tai Lewi masinauake nauakenen sipaalei ka urai bakkat David, kisedda leu et tai imam sipugagalai sedda sinauake pipiau.

²⁷ Iageti kaunangan toggaiat si Hizkia bule tutaddaake masipanguruatake buluakenen rarangen. Airapangunguruatake buluakenen rarangen nenda, taddaakeranngan masiuraiake urai pasiumun katubut Tuhan, samba tai imam masinauake pipiau samba leu nauakenen bagei sipaalei ka urai.

²⁸ Sangamberi paamian murekkuk kateteret aituuraiake urai samba aitunanauake pipiau. Puriuriunangan sangamberinia nenda pat tata ilabo buluakenen nenda.

²⁹ Kele ailepa aitupanguruatake buluakenen nenda, rimata samba sangamberi sirimanua sibabara sedda purekkukrangan manindou.

³⁰ Iageti Rimata Hizkia samba sikebbukat laggai masikoiniake tai Lewi masiuraiake urai pasiumun katubut Tuhan sigalai David samba nabi Asaf. Iageti Uraiakerangan urai pasiumun kabagat gorat baga, lepa purekkukrangan manindou.

³¹ Lepa nenda kuanangan si Hizkia, “Kineneiget atukokoiakean kam kai Tuhan, oto sibailiu panguruatmui katubut Tuhan, buita nuambit kam buluakenen ka Uman Tuhan.” Lepa geti sangamberi sirimanua sibabara sedda masiambit panguruat, samba leu ai sipasiambit maigi tarimeu sibara ka teu bagania itupanguruatake sibailiu buluakenen rarangen.

³² Igit buluakenen rarangen siambitda sapamian nenda iate: pitupulu ngamuneng jaui, sangotu ngamuneng biribiri simanteu samba rua ngotu ngamuneng togat biribiri. Sangamberinia nenda sibailiu buluakenen rarangen katubut Tuhan.

³³ Panguruat sipunenan iate: Enem ngotu ngamuneng jaui samba telu ngaribu ngamuneng biribiri.

³⁴ Tapoi tai imam ta maigi sia, bailiu tamomoi rakikkik sangamberi buluakenen rarangen nenda. Kalulut nenda sasarainanda, tai Lewi, ropakerangan sia pat lepa galajet nenda samba tai imam punenirangan tubutda. Kalulut tai Lewi nenda bulat mauku sia masipuneni tubutda bele peile tai imam.

³⁵ Ta sarat buluakenen rarangen, tai imam leu masipanguruatake tabet buluakenen pusurakat sikomra siberikabaga. Panguruatakerangan leu anggur siuruakenen pasamba buluakenen rarangen nenda. Kisedda te aitugalaiake minca panindogat ka Uman Tuhan.

³⁶ Oto mangkanangan bagat Rimata Hizkia samba seberikaba, kalulut kabagat oggak sitete airopakean sia Taikamanua masigalaiake sangamberinia nenda.