2Taw. 26 - BUKO SIPUNENAN

Si Uzia rimata Jehuda

¹ Sangamberi tai Jehuda masiala si Uzia, kateteret nenda pulu enem ngarurania samba uddetakerangannia sibailiu rimata masisailiake ukkuinia si Amazia.

² Oppunangan laggai Elot samba paerunangannia minca, kalepat aimatei rimata Amazia.

³ Si Uzia pulu enem ngarurania kateteret aibailiunia rimata samba lima pulurua ngarura burunia aipupaneinei ka Jerusalem. Onin inania iate Jekholya, sibara ka Jerusalem.

⁴ Si Uzia masigalaiake simaeru ka matat Tuhan kele sigalaiakenen Amazia, ukkuinia.

⁵ Si Zakharia iate sipangantomannia ka simaeru. Ka burunia aipurimanua si Zakharia, si Uzia mariuriu topitnia katubut Tuhan bailiu sukatakenangannia si Tuhan.

⁶ Si Uzia pasaggak masisaggangi tai Filistin. Bukkatakenangan sangamberi irip laggai Gat, Jabne samba Asdod. Lepa rioakenangan laggai sipuirip ka bebet Asdod samba ka laggai bagei ka Filistin.

⁷ Ropakenangannia Taikamanua masikalaake tai Filistin samba tai Arab sikuddu ka Gur-Baal samba leu tai Meunim.

⁸ Tai Amon masilului juran katubut Uzia. Memei le maburu makope le maroron purimataatnia bailiu maagainangan oninia pat aili ka Misir.

⁹ Bule imaron laggai Jerusalem, si Uzia masigalai kudduat pujagoat simabuak ka Matatbaliu Taiming, ka matatbaliu Susu samba ka senen taiming irip.

¹⁰ Galainangan leu kudduat pujagoat simabuak sibara irip ka kudduat simatangeu, samba masigaigai uggungan simigi kalulut bulat maigi tarimeunia, sikuddu ka simagaktuk simabuak samba leu ka simagaktuk ka simaepe ka isit ka sikalaut. Kalulut ioba bagania munone, oto kaunangan sirimanua simigi mugalai masigalai monen anggur ka kudduat paleleuleleu, samba bule itugalai polak ka kudduat simaeru polak.

¹¹ Si Uzia ai saladdunia simigi simariuriu tarek pasaggak. Sia iate mungkuat sisurat le igitda sinuratakenen ka rua sipanunurat ka purimataat, iate si Jeiel samba Maaseya ka pasiutekat Hananya, sara utet saladdut rimata.

¹² Sangamberi utet mungkuat saladdu simagege nenda igitda iate rua ngaribu enem ngotu sia.

¹³ Sia te masiuteake saladdu igitda telu ngotu pituribu limangotu sia, simagege pasaggak samba sipasirorop rimata kabagat masisaggangi saggak.

¹⁴ Si Uzia masikau ka saladdunia nenda korabbi, sosoat, tubu laba, leppei laba, rourou samba silogui samba leu bukkut pipingping.

¹⁵ Galainangan leu ka Jerusalem pakeiet pasaggaknia, sigalaira siagai mugalai pamatei, sioi masibetuake silogui samba bukku sabeu sibara ka kudduat pujagoat simabuak samba ka sangamberi taiming irip laggai. Maagainangan oninia si Uzia ka senen kudduat, samba makopenangan ron purimataatnia kalulut Taikamanua masiropakenia.

Si Uzia tuukum kalulut buak patuat

¹⁶ Kele aimaron purimataatnia si Uzia, mabuaknangan patuatnia bailiu galaiakenangan sikatai. Pasabaunangan surukat Tuhan Taikamanuania kalulut aiguruki Uman Tuhan masilabo kumanyang ka uddut kudduat pasilabokat pumanyang.

¹⁷ Tapoi si Imam Azarya pasamba balu pulu tai imam bagei simaron tubu samba simagege;

¹⁸ puriorangan ka matat Rimata Uzia samba kuarangan katubunia, “Ale Rimata Uzia taanai puteukatnu masilabo kumanyang kai Tuhan, sarat tai imam le sibara ka muntogat Aron silepa tukokoiake sipasilabo kumanyang! Belaake ekeu ka kudduat sipunenan nene, kalulut taan amatopit ekeu! Taan nusisilo panukanan sibara kai Tuhan Taikamanua kalulut pagalaiat nene.”

¹⁹ Kateteret nenda Rimata Uzia ainia muririo ka bebet kudduat pumanyang ka Uman Tuhan samba ai kakabeinia pasilabokat kumanyang. Pugolunangan ka tai imam nenda, samba sinulut bara lubbe simasappo ka bukkut utenia.

²⁰ Si Azarya samba tai imam bagei masiitco si Uzia samba tugegerangan, lepa olaakerangan ratuituiakenia bule ikaddiuake Uman Tuhan. Lepa olaakenangan ibela si Uzia kalulut aiukumannia si Tuhan.

²¹ Pat tata Rimata Uzia, besinia nenda ta amale samba kalulut nia sibara lubbe simasappo saraakerangannia ka sara lalep samba ta raobaake minca iguruki Uman Tuhan si Jotam togania mupaneinei ka siberikabaga sibailiu punutubut Uzia.

²² Pungunguan bagei pagalaiat Rimata Uzia, aisuratakean nabi Jesaya togat Amos.

²³ Kateteret aitata si Uzia, rateiakerangannia ka polak ka bebet puariatda tai rimata, tapoi ta ka puariat nenda, kalulut ai lubbenia simasappo. Si Jotam togania ibailiu rimata masisailiakenia.