2Taw. 25 - BUKO SIPUNENAN

Si Amazia rimata Jehuda

¹ Si Amazia ibailiu rimata kateteret rua pululima ngarurania, samba aipupaneinei ka Jerusalem rua pulusiba ngarura burunia. Inania iate Joadan sibara ka Jerusalem.

² Si Amazia masigalaiake obaket bagat Tuhan, tapoi ta sibara ka muinet patuatnia.

³ Kele aimaron kukuddunia sibailiu rimata, mateiakenangan sirimanua simateiake ukkuinia.

⁴ Tapoi togat sirimanua simateiakenennia nenda ta aimateiake sia, kalulut ireddet surukat Tuhan sitususurat ka Bukot Mose sipasikua kise, “Bui' nugalaiake kam ukum simateiakenen ka saepput sara toga sigalaiake sikatai, samba bui'' leu nugalaiake kam ukum simateiakenen ka sara toga kalulut pukakatai sigalaiakenen ukkuinia. Sarat sirimanua sigalai sikatai nenda le momoi tuorakngake ukum simateiakenen kalulut katai sigalaiakenennia.”

Pasaggangan masisaggangi Edom

⁵ Iageti ruruakenangan si Amazia sangamberi sirimanua ka muntogat Jehuda samba Benjamin samba koiniakenangan sia murio siripot muntogatda, iuteake sia iate utet saladdu sangaribu samba utet saladdu sangotu. Iageti kokoiakenangan sia sipururura ruapulu kapata sioi pasaggak samba momoi rasoatake sosoat samba rapakei korabbi. Igitda iate telu ngoturibu sia.

⁶ Ta sarat nenda, tapoi iupaiji leu sangoturibu saladdu sibara ka Israel, igit upatda iate telungaribu epatngotu ngakilo perak.

⁷ Tapoi sara nabi moi kai rimata samba kuanangan, “Bui nuambit saladdut Israel, aipoi ta iroropake si Tuhan paamian Israel sibara ka purimataat ka bare nenda.

⁸ Tapoi ke nuoba nupakei sia, obaakenangan Taikamanua rakalaake ekeu tai saggaknu kenanen maron samba magege saladdum, kalulut sarat si Tuhan le masikakau kamanangan ele katukalaat.

⁹ Iageti kuanangan si Amazia katubut nabi nenda, “Oto kipangan le sangamberi perak sikauku katubutda?” Aleginangannia nabi nenda, “Momoi itoiliakenia si Tuhan katubum bele peile igit nenda!”

¹⁰ Kalulut nenda si Amazia masibelaake sangamberi saladdu siupaiji nenda samba koiniakenangan sia ratoili ka laggaira. Lepa toili sia ka laggaira kabagat golu sabeu.

¹¹ Iageti bara gegenia si Amazia samba ambitnangan saladdunia ka Susut Simakalo. Pasaggakrangan sedda samba leu mateiakerangan pulu ngaribu saladdut Edom.

¹² Pulungaribu sabagei tutangsiake sia. Ambitrangan sia ka uddut leleu bukku ka laggai Sela, lepa ribbaiakerangan sia ka gilak pat matei sia.

¹³ Iageti saladdut Israel sikoniakenen Amazia bule ratoili, samba sitaiobaakenennia rapasaggak, arasaggangingan laggai Jehuda paoggangan Samaria samba Bet-Heron. Mateiakerangan telu ngaribu sirimanua samba leu rauraurangan simigi bibilet.

¹⁴ Lepat aikalaake saladdut Edom, toili si Amazia masiambit tularat bulunganda tai Edom samba galakakenangannia ka Jehuda. Lepa labonangan buluakenen uktuk tularat nenda samba buluijinangannia.

¹⁵ Sigalaiakenennia nenda masibaraake golut Tuhan. Koiniakenangan sara nabi katubut Amazia. Kuanangan nabi nenda, “Angoi nupanindogi taikamanua laggai bagei sitaioi masibelaake bangsania kabagat kupkumennu?”

¹⁶ Kateteret aimaninibo nabi nenda, kuanangan si Amazia katubunia, “Akuudetake pa kai ekeu sibailiu sipangantru rimata” Tangeuake ekeu! Taleu nuoba le tumateiake ekeu?” Lepa putangeunangan nabi nenda, tapoi kepei mutangeunia panibonangan, “Kineneiget akuagaian, aiteuakean Taikamanua isubuake ekeu, kalulut anugalaiake kele nene, samba ta anuarepi nganturat!”

Jehuda pasaggak masisaggangi Israel

¹⁷ Iageti si Amazia rimata Jehuda, masibaraake pukerekat baga pasamba sipangantrunia, lepa koiniakenangan sirimanua kai Joas togat Joahas punuteteu Jehu, rimata Israel, masiukkatnia pasaggak.

¹⁸ Tapoi si Joas, rimata Israel, masikoiniake sirimanua katubut Amazia, rimata Jehuda, masikua, “Ka sara tetere turuturu simarui ka leleu Libanon masiake patonekat katubut loina pinilok, “Ale loina pinilok, kau togam siokko katubut togakku simanteu ibailiunia sinanalepnia.” Tapoi iageti tusabaunangan sedda sara tarimeu leleu masipaperaki turuturu simarui nenda.

¹⁹ Ekeu, Amazia, rimata Jehuda, nukua pa anukalaakean tai Edom, tapoi maeru peile nupukuddu ka lalep. Apangan le lulunia nugagaba pugejaat baga sibaraake kamateiatnu samba kamateiat taikaumam?”

²⁰ Tapoi si Amazia, rimata Jehuda, ta aipuletsei sikuat Joas rimata Israel. Samba kirenangan aiteuakean Taikamanua bule itukaake si Amazia kalulut aibuluijingan tularat sabulunganda tai Edom.

²¹ Kalulut nenda si Joas mei pasamba saladdunia ka Bet-Semes samba pasaggakrangan si Amazia sedda.

²² Kalaakerangan saladdut Jehuda, bailiu sangamberi saladdut Jehuda toili sia ka lalepda senesenenda.

²³ Si Joas masilaba si Amazia samba ambitnangannia ka Jerusalem, lepa bukkatakenangan irip laggai nenda epat ngotu eto nantania, barania ka Matatbaliu Gugurukat Efraim pat aili ka Matatbaliu Gugurukat Taiming.

²⁴ Sangamberi mas samba perak samba leu sangamberi pugalai sisesenia ka Uman Tuhan samba pugalai sibabara ka puukuket Obed-Edom, kisedda leu et sangamberi pukayoat uma purimataat, pasamba sirimanua tangsiakenen iambit si Joas ka Samaria.

²⁵ Lepat aitata si Joas rimata Israel, si Amazia rimata Jehuda aipeilenia murimanua pulu lima ngarura burunia.

²⁶ Tippunia pungunguan pagalaiat si Amazia, barania ka panandaat pat aili kalepakat, tusuratake kabagat buko Pungunguan pagalaiat tai Rimata Jehuda samba Israel.

²⁷ Barania aituareu si Amazia katubut Tuhan, sirimanua masibaraake pukerekat baga masisagganginia ka Jerusalem, kalulut nenda putuituinangan iei ka Lakhis. Tapoi koiniakerangan rakukrunia ka Lakhis, lepa mateiakerangannia sedda.

²⁸ Ambitrangannia pasamba kuro, lepa rateiakerangannia ka bebera taikebbukatnia ka Laggai David.