2Taw. 24 - BUKO SIPUNENAN

Si Joas Rimata Jehuda

¹ Si Joas pitu ngarurania kateteret aibailiunia rimata Jehuda samba aipuneinei ka Jerusalem epat pulu ngarura burunia. Onin inania iate si Zibya sibara ka laggai Bersyeba.

² Ka sanganantat aipeile muririmanua imam Joyada, si Joas masigalai simaeru siangkaake bagat Tuhan.

³ Si Joyada masiala rua sinanalep sibailiu sinanalep Joas samba bara tatogat Joas taimanteu samba tainanalep.

⁴ Kele aipupaneinei piga pa burunia, teuakenangan si Joas masipaeru Uman Tuhan.

⁵ Koiniakenangan tai imam samba tai Lewi mei ka sipulagggai ka Jehuda samba ruruakerangan bulagat sibara ka sangamberi siberikabaga bule itupaeru Uman Tuhan senen rura. Koiniakenangan sia simaruei ragalaiake galajet nenda, tapoi tai Lewi maburu ragalaiake galajet nenda.

⁶ Kalulut nenda si Joas masisogai imam Joyada, utera, lepa kuanangannia, “Ta pa aikoiniakean siberikabaga si Mose pagugulet Tuhan masilului juran bule itupaeru Sapou Tuhan” Kineneiget, angoi ta nutubbui tai Lewi nenda ratiddou juran ka tai Jehuda samba ka tai Jerusalem?”

⁷ “Kalulut sipasitutut Atalya sinanalep sikatai nenda, arapakataian Uman Tuhan, samba maigi bibilet sikokoiakenen ka Taikamanua arapakei masibuluiji Baal.”

⁸ Oto rimata koiniakenangan tai Lewi ragalai sara peti kudduat bulagat samba galakakerangannia ka ipot matatbaliu gugurukat Uman Tuhan.

⁹ Ka sangaliot Jehuda samba Jerusalem tusegeake bule sangamberi sirimanua buita rambit juran kai Tuhan, kele galaiakenen kateteret si Mose.

¹⁰ Pangasegekat nenda masiangkaake bagat siberikabaga samba siuteake sia. Kabagat angkat baga kaurangan juranda ka kudduatnia nenda.

¹¹ Senen gogoi petit bulagat nenda raambit tai Lewi samba kaurangannia ka pagugulet rimata raitconia. Ke amasutan petit bulagat nenda sipanunurat ka uma purimataat samba punu tubut Imam Sabeu masibelaake bulagat nenda. Lepa toiliakerangan kudduat bulagat nenda kakudduatnia siboiki. Kisedda te ragalaiake ka senen gogoi, samba bulat maigi bulagat siruruakenenda.

¹² Iageti rimata samba Joyada masikau bulagat nenda katubutda siuteake galajet masipaeru Uman Tuhan. Iageti saute nenda upaijirangan siagai mugalai bukku, siagai mugalai loina samba siagai mugalai laba samba tembaga bule itugalai galajet nenda.

¹³ Iageti taddaakerangan mugalai masipaeru Uman Tuhan nenda. Pugalairangan sangamberitda samba lepaakerangan galajet nenda, bailiu maronnangan samba maerunangan Uman Tuhan nenda kele siboiki.

¹⁴ Kele ailepa galajet nenda, bulagat sipulelegei toiliakerangannia kai rimata samba kai Joyada. Iageti bulagat nenda pakeirangannia masigalai bibilet ka Uman Tuhan, kele: pugalai pakeiet ka punen panindogat, pugalai ka buluakenen rarangen, pulokat simigi samba pugalai mas samba perak. Ka sanganantat purimanuaiat Joyada, buluakenen rarangen mariuriu rabuluakenia ka Uman Tuhan.

Taimasurura ka sigalai Joyada

¹⁵ Si Joyada bulat amabajaannia samba tatania kateteret sangotu telu pulu ngarurania.

¹⁶ Rateiakerangannia ka puariatda tai rimata ka laggai David, kalulut rarepdep simaeru sigalainia ka Taikamanua samba ka Uman Tuhan samba leu ka paamian Israel.

¹⁷ Kele aitata si Joyada, na'narangan si Joas saute ka Jehuda, bailiu taipuletseinangan nganturat Joyada.

¹⁸ Oto taipanindourangan siberikabaga ka Uman Tuhan Taikamanuan taikebbukatda, tapoi rabuluiji le sabulungan samba tularat Asyera sabulungan sinanalep. Jo sigalaira nenda masibaraake golut Taikamanua ka tai Jehuda samba Jerusalem.

¹⁹ Koiniakenangan tai nabi si Tuhan masipangantoman sia bule ratoili mupagugulet kai Tuhan, tapoi ta raoba masiarepi siberikabaga.

²⁰ Iageti sopsopnangan Ketsat Taikamanua si Zakharia togat Imam Joyada. Ei si Zakharia ka matatda siberikabaga samba panibonangan, “Tuhan Taikamanua masikua: Angoi ta anureddet kam surukatKu samba bailiu baraakemuian pangoringanmui. Kalulut ta anupletsei kam Aku, oto Aku leu taan Kupuleletsei kam!”

²¹ Tapoi arabaraake le pukerekat baga pasamba Rimata Joas, samba kabagat pakoinian Rimata Joas baijukrangan si Zakharia bukku ka pugeranan Uman Tuhan.

²² Rimata Joas ta airepdep topit Joyada, ukkui Zakharia katubunia. Mateiaakenangan togat Joyada nenda. Kateteret kepei matei si Zakharia, pusoganangan, “Bule si Tuhan masiitco sigalainu nene samba ilumunakenia!”

Pangampulat pupaneineiat Joas

²³ Kabagat rura nenda ka pasisailiat tetere, saladdut Siria masisaggangi Jehuda samba Jerusalem. Mateiakerangan sangamberi saute samba ambitrangan maigi bibilet siraurau ka Damsyik.

²⁴ Saladdut Siria ta maigi sia, tapoi si Tuhan masiobaake sia rakalaake saladdut Jehuda simakope igi, kalulut taimasurura tai Jehuda kai Tuhan Taikamanuan taikebbukatda. Kisedda enungan Tuhan masiukum Rimata Joas.

²⁵ Si Joas bara maujunia simakope. Kele arakaddiuakenia tai saggak, rua paguguletnia mukere baga masimateiake si Joas ka peremannia sibailiu lumun aimatei togat imam Joyada. Rateiakerangan Rimata Joas ka laggai David, tapoi ta karateira tai rimata. (

²⁶ Sipukekere baga nenda simateiake si Joas iate: Zabad togat Simeat sinanalep sibara ka Amon samba si Jozabad togat Simrit sinanalep sibara ka Moab.)

²⁷ Pungunguan pagalaiat tatogat Joas samba patuptupman sitaimaeru katubunia, samba leu kipa aigalai aipaeru Uman Tuhan, sangamberinia nenda atusuratnan kabagat buko Katukoloubat Bukotda tai rimata. Si Amazia, togat Joas, ibailiu rimata masisailiake ukkuinia.