2Taw. 23 - BUKO SIPUNENAN

Pukelakat patuat masisaggangi si Atalya

¹ Ka rura sikapitu imam Joyada masigegeake tubunia ibaraake keret baga pasamba lima utet saladdut iate: Azarya togat Jeroham, Ismael togat Johanan, Azarya togat Obed, Maaseya togat Adaya samba si Elisafat togat Zikhri.

² Ei sia ka sangamberi laggai ka Jehuda, samba ruruakerangan tai Lewi samba sangamberi utet muntogat, lepa ei sia ka Jerusalem.

³ Parururangan ka Uman Tuhan, samba galairangan palelengan pasamba si Joas, togat rimata nenda. Kuanangan si Joyada katubutda, “Nia te togat sakalimeu Rimata Ahazia! Kineneiget buita muuddetnia ka uddenan purimataat, kalulut ai palelengan Tuhan, muntogat David buita mariuriu mupaneinei.

⁴ Nene te bulat galaiakenenta: Ke alepaan rapugalai tai imam samba tai Lewi ka gogoi Sabat, tamomoi ratoili. Sepertelu katalagatda buita mujago ka sangamberi matatbaliu gugurukat Uman Tuhan,

⁵ sepertelu minca buita ai sia ka uma purimataat, samba legeinia buita ai sia ka Matatbaliu Bongen. Sangamberi siberikabaga buita paruru ka pugeranan Uman Tuhan.

⁶ Tamomoi beri sara sirimanua masiguruki Uman Tuhan ke ta tai imam samba tai Lewi sipugagalai. Momoi ratuguru kalulut atukokoiakean sia kai Tuhan. Sirimanua sabagei buita ratuatke surukat Tuhan samba mukuddu ka uja.

⁷ Sangamberi tai Lewi buita murio masibokko rimata sialei masioppat lanjau, masijagonia kaipa-kaipa iei. Kasei masibesiake tuguru ka Uman Tuhan, buita tumateiake.”

⁸ Tiboiet Joyada nenda ragalaiake sangamberitda tai Lewi samba tai Jehuda. Tai Lewi samba tai Jehuda sipugagalai ka gogoi Sabat tamomoi ratoili. Oto sautet saladdu momoi rapagalak galajetda silepa mugalai ele simaruei moi mugalai.

⁹ Ka sautet saladdu si Joyada masiparubei sosoat samba korabbit Rimata David sikoiriakenen ka Uman Tuhan.

¹⁰ Si Joyada leu masipagalak sangamberi sirimanua ka sangaliot rubeiat matat Uman Tuhan sialei masioppat lanjau bule rajago rimata.

¹¹ Lepa nenda si Joyada samba tatogania ambitrangan togat rimata nenda ka uja, samba kaurangan kirit purimataat ka utenia samba leu kaurangan katubunia buko Surukat Taikamanua. Kisedda te aituuddetake si Joas sibailiu rimata. Lepa geti Imam Joyada samba tatogania uruakerangan tula ratulaiji si Joas, lepa pusogarangan siberikabaga, “Murimaua le rimata!”

¹² Kateteret aiarep si Atalya gereira siberikabaga raroroi rimata, olaakenangan iei ka Uman Tuhan ka kudduat sirimanua paruru.

¹³ Itconangan rimata sibau nenda ainia muririo ka matatbaliu gugurukat ka Uman Tuhan, ka kudduat aitusukatakenia. Airagogiliknia sautet saladdu samba sinauake pipiau. Sangamberi siberikabaga mugora baga aileu munanau pipiau. Sinauake nauakenen sialei urai ka Uman Tuhan masipuangkaki baga punen nenda pasamba nauakenenda sipaalei ka urai. Kabagat loto biritakenangan leppeinia si Atalya samba pugereinangan, “Patajuat! Patajuat!”

¹⁴ Tapoi si Joyada ta aiobaake ramateiake si Atalya ka bebet Uman Tuhan, oto kuanangan ka sautet saladdu, “Belaake kamnia sedda, samba mateiake kam kasei pa sibesiake siarauakenia.”

¹⁵ Iageti labarangan si Atalya, lepa ambitrangannia ka uma purimataat. Seddangan le mateiakerangannia ka Matatbaliu Kuro.

Si Joyada masibaraake pasibaugat

¹⁶ Iageti imam Joyada masina'na Rimata Joas samba siberikabaga bule ragalai palelengan ibailiu sia paamian Tuhan.

¹⁷ Lepa nenda tugururangan ka uma pasibuluat samba bukkatakerangannia. Pakatairangan sangamberi kudduat pasibuluat, sangamberi tularat sabulungan samba mateiakerangan si Matan, imam Baal ka matat sangamberi kudduat pasibuluijiet sabulungan nenda.

¹⁸ Iageti pagalaknangan galajetda si Joyada tai imam samba tai Lewi, masipasikeli galajet ka Uman Tuhan siripot parubeiat galajet siteuakenen Rimata David. Buita rabuluake buluakenen rarangen kai Tuhan siripot surukat Mose – sialei punen samba urai kele siteuakenen David.

¹⁹ Pagalaknangan si Joyada sipujajago ka matatbaliu gugurukat ka Uman Tuhan, masijago bule ta tuguru sirimanua sitaimateu masipanindogi si Tuhan.

²⁰ Lepa nenda si Joyada masina'na sautet saladdu, sikebbukat laggai, siabeu tiboi tubu samba sangamberi siberikabaga, lepa ambitrangan rimata barania ka Uman Tuhan; tugururangan ka Matatbaliu ka Pata, lepa tugururangan ka uma purimataat, iageti uddetakerangan rimata ka uddenan purimataat.

²¹ Sangamberi siberikabaga muangka baga, laggai leu maaban samba si Atalya atumateiakean.