2Taw. 21 - BUKO SIPUNENAN

¹ Iageti tata si Josafat samba turateiake ka puariatda tai rimata ka Laggai David. Si Jehoram togania ibailiu rimata masisailiakenia.

Jehoram rimata Jehuda

² Si Jehoram togat Josafat, rimata Israel, ai enem sasarainania taimanteu iate: Azarya, Jehiel, Zakharia, Azariahu, Mikhail samba Sefaca.

³ Ukkuira masikau katubutda maigi mas, perak samba bibilet simakeppu saki, kisedda leu sangamberi laggai simaron sibara irip ka Jehuda. Tapoi kalulut si Jehoram iate toga sikebbukat, nia te aiteuake si Josafat ibailiu rimata.

⁴ Kateteret aiagainia si Jehoram amaronnan pukukuddunia sibailiu rimata, koiniakenangan tumateiake sangamberi sasarainania samba leu piga pa siabeu tiboi tubu ka Israel.

⁵ Kateteret aibailiu si Jehoram rimata telu pulungan rurania samba aipupaneinei ka Jerusalem balu ngarura burunia.

⁶ Paraboatnia makere paraboatda tai rimata Israel kele sigalaiakenen Ahab, kalulut sinanalepnia iate togat Ahab. Galaiakenangan sikatai ka matat Tuhan.

⁷ Tapoi si Tuhan ta ioba isubuake muntogat David kalulut ai palelenganNia ka David, paguguletNia, iate muntogatnia buita mariuriu ibailiu rimata.

⁸ Kabagat pupaneineiat Jehoram, Edom mukela patuat ka Jehuda samba galainangan purimataatnia sarania.

⁹ Kalulut nenda Jehoram samba sautet saladdunia bela sia pasamba kereta pasaggaknia masisaggangi si Edom. Alourangannia saladdut Edom, tapoi ka sinoibonia belaakerangan tubutda kabagat pasialougat saggak samba putuituirangan.

¹⁰ Teteret nenda te Edom taan amareddet sia ka Jehuda. Kateteret nenda leu laggai Libna leu mukela patuat. Aipuaili sangamberinia nenda kalulut si Jehoram aikaddiuakean si Tuhan, Taikamanua panindogietda taikebbukatnia.

¹¹ Samba leu galainangan kudduat pasibuluijiet sabulungan ka leleu Jehuda. Bailiuakenangan tai Isarel samba Jerusalem majo ka matat Tuhan.

¹² Iageti silonangan sangaelau surat si Jehoram sisurat nabi Elia kateteret aipeilenia muririmanua. Kise ngangan surat nenda, “Tuhan Taikamanua panindogiet David, taikebbukatnu, masiukum ekeu kalulut ta anuului kele puririmanuan Josafat, ukkuinu samba si Asa sibuainu Jehuda,

¹³ tapoi murimanua le ekeu masitutake paraboatda tai rimata Israel samba masibailiuake tai Jehuda samba sipulaggai ka Jerusalem ta ramasuru ka Taikamanua, samba leu kalulut anumateiake sasarainam, siripokatnia sia peile maeru katubum.

¹⁴ Ibabaraake te si Tuhan ukuman sabeu ka siberikabaga, ka tatogam, tainanalepnu samba ka sangamberi bibiletnu.

¹⁵ Ekeu leu et masiorik besit tinanai, ka senen gogoi ituppai le besinia!”

¹⁶ Iageti si Tuhan masitubbui patuatda tai Filistin samba tai Arab sipukuddu sipalelegre ka tai Etiopia bule rasaggangi si Jehoram.

¹⁷ Saggangirangan Jehuda, parauraugirangan uma purimataat, lepa ambitrangan sangamberi tatoga samba tainanalep Jehoram sibailiu patpatakenen, tapoi si Ahazia togat Jehoram sisule ta arambitnia.

¹⁸ Lepa aipuaili sangaberinia nenda, si Tuhan masiukum si Jehoram iorakake besit tinanai sitaimamale.

¹⁹ Siaili rua ngarura burunia besi nenda makokope le, kalepakatnia kabagat pangoringan simakope tatania. Ta araobekake obengan sabeu siberikabaga toggaiat reureu bagatda kele sigalaikenenda ka taikebbukatnia.

²⁰ Taanai beri sara sipureureu baga kalulut kamamateinia. Rateiakerangannia ka Laggai David, tapoi ta ka puariatda tai rimata. Kateteret aibailiunia rimata, si Jehoram telu pulurua ngarurania samba aipupaneinei ka Jerusalem balu ngarura burunia.