2Taw. 2 - BUKO SIPUNENAN

Panarenangan masigalai Uman Tuhan

¹ Rimata Salomo masiteuake bule tugalai Uman Tuhan samba le sara uma purimataatnia.

² Kalulut nenda gugluakenangan pitu pulu ngaribu sia igitda sipasibairat galajet uma, balu pulu ngaribu sia igitda sipasipae bukku ka leleu samba leu telu ngaribu enem ngotu sia siuteake pugagalai uma bule rajago pugagalai nenda.

³ Lepa si Salomo masikoiniake pakoinien katubut Hiram, rimata laggai Tirus, kise patonekatnia, “Galaiake le katubukku kele sigalaiakenennu ka ukkuiku si David, anukau loina pinilok Libanon katubunia bule igalai sara uma purimataatnia.

⁴ Kineneiget kuoba masigalai Uman Tuhan Taikamanuangku, bule ioi kupanindou sedda, kulabo kumanyang simasingin, samba leu masipanguruatake roti kai Tuhan sibailiu galaiakenenmai simariuriu. Ka uma nenda kupanguruatake leu kai buluakenen rarangen senen simansep samba kasoibokat, senen gogoi Sabat, punen Laggo Sibauu samba punen sabeu bagei sikokoiakenen bule kuabeuake kai Tuhan Taikamanuamai. Kalulut sangamberinia nenda iate katukelatda tai Israel teret buruburu.

⁵ Samba uma rioakenenenku nenda bui' ta mabeu, kalulut Taikamanuamai bulat simalatsat bele peile taikamanua bagei.

⁶ Tapoi kasei momoi masigalai umaNia, beringan manua, sisaliu sangaliot manua leu ta memet sibailiu kudduatNia? Kasei aku nene, bailiu kuoba kugalai umaNia? Oto Uman Tuhan sioi kugalai geti sarat kudduat pasilabokat buluakenen kamataNia le.

⁷ Oto kineneiget, ake kaku sara sirimanua siagai masigalai mas, perak, tembaga, laba, komak simasuat laiket, komak simabonan. Mugalai le nia geti sambatda siagai kabei ka Jehuda samba ka Jerusalem sipilit ukkuiku si David.

⁸ Kuagai sipananande loina ka laggainu raagai manande loina, oto nuake le kaku senengamata loina aras, senobar samba cendana sibara ka Libanon. Aile kukau sapaguguletku raropake sapaguguletnu,

⁹ bule ratarekake loina bulat simigi. Kalulut Uman Tuhan rioakenenku nenda buita bulat sabeu samba bulat simalainge.

¹⁰ Oto aile kuake katubum balutda sapaguguletnu gandum rua ngaribu ton, jelai rua ngaribu ton, anggur epat ngotu ngaribu ngaliter samba tulat zaitun epat ngotu ngaribu liter.

¹¹ Sibailiu alegiat, Rimata Hiram masikau surat, kise ngangan surat nenda, “Kalulut si Tuhan manuntu bagaNia ka paamianNia, uddetakenangan ekeu sibailiu rimatatda.

¹² Tuumun le Tuhan Taikamanuan Israel, sibaraake manua samba polak! Nia masikau katubut David sara toga bulat simasiku patuat samba simaagai, sipasigagalai sara uma katubut Tuhan samba sara kudduat purimataatnia.

¹³ Kabagat nene kuake katubum sara simaagai sipuoni Huram Abi.

¹⁴ Inania sibara ka muntogat Dan, ukkuinia sibara ka Tirus. Iagai masikabei mas, perak, tembaga, laba, bukku samba loina. Iagai masigalai komak semalimun, simasurou, simabonan samba leu komak juto. Senengamata galajet tularat sipae momoi igalainia siripot siteuakenennu galaiakenennia samba leu aile raropakenia sapaguguletnu simaagai sabagei samba leu sapagugulet ukkuinu Rimata David.

¹⁵ Oto akean kineneiget gandum, jelai, tula samba anggur kele sikuat tuanku.

¹⁶ Aile kutadde kai loina ka leleu Libanon kele igit pakeietnu, samba aile kuappra kainia samba raggaiakenia ka koat pat aili ka Jope. Oto barania sedda ambitnungannia ka Jerusalem.”

¹⁷ Iageti addenangan si Salomo sangamberi taimanteu siooiake sikuddu ka laggai Israel kele sigalaiakenen David, ukkuinia. Oto igidra sangamberitda iate sangotu lima pulu telu ngaribu enem ngotu sia.

¹⁸ Samba pitu pulu ribu katalagatda tubailiuake sia sipasibabairat galajet uma, balu pulu ngaribu sia sipasipapae bukku ka leleu samba telu ngaribu enem ngotu sia iate siuteake pasigagalai uma.