2Taw. 18 - BUKO SIPUNENAN

Rimata Ahab masisaggangi Ramot-Gilead Nabit Tuhan pagolu pasamba nabi sipatataju

¹ Kateteret aimakayo samba aimaron purimataatnia si Josafat, rimata Jehuda, talimouakenangan sara katalagat muntogatnia pasamba sara katalagat muntogat Ahab rimata Israel.

² Piga ngarura pa atusabau ei si Josafat masiailiake si Ahab ka laggai Samaria. Si Ahab masija'ja kambing simigi samba jaui komen Josafat samba sipaaleinia, samba na'nanangan si Josafat bule rasaggangi Ramot di Gilead.

³ Kuanangan si Ahab, rimata Israel, katubut Josafat, rimata Jehuda, “Noba leu taei sambatta ka Ramot-Gilead?” Aleginangannia si Josafat, “Kauan, saladdukku musara le geti pasamba saladdum. Pasaggak sita sambatta.

⁴ Tapoi simaerunia tarere boiki si Tuhan.”

⁵ Iageti ruruakenangan si Ahab epat ngotu tai nabi, lepa rerenangan sia, “Momoi leu kuei masisaggangi Ramot?” Alegirangannia tai nabi, “Momoi! Iaake te geti Taikamanua laggai nenda katubum.”

⁶ Tapoi pererenangan minca si Josafat, “Ta pa anai sene nabi bagei sioi parere kai Tuhan bule taagai enungan sibara ka sia?”

⁷ Aleginangannia si Ahab, “Ai peile sara, si Mikha, togat Jimla. Tapoi malaga bagakku katubunia, kalulut tapei anai aipatuptup simaeru kaku; sarat sikatai le.” Aleginangannia si Josafat, “Ta kisedda.”

⁸ Iageti sogainangan sara utet saladdu si Ahab lepa koiniakenangannia simaola iei masiala si Mikha.

⁹ Kateteret nenda si Ahab samba si Josafat, ai sia muleppei pubebeunan samba mukuddu ka uddenan purimataat ka kudduat pasiperakat gandum kamatat matatbaliu gugurukat Samaria, samba leu tai nabi ai sia kamatatda masisegeake siripot sipatuptupda.

¹⁰ Sara katalagatda tai nabi nenda, sipuoni Zedekia togat Kenaana, masigalai ban laba, lepa kuanangan kai Ahab, “Nene te sikuat Tuhan, “Pasamba ban nene te nusukkaiake Siria pat subuakenungan sia.”

¹¹ Sangamberi tai nabi bagei masikua, “Saggangingan Ramot, mamanang te ekeu. Iake le geti si Tuhan kamanangan katubum.”

¹² Iageti sikoiniakenen sipasiala si Mikha, kuanangan kai Mikha, “Sangamberi nabi sabagei masipatuptup kamanangan rimata. Oto bule ekeu leu masipatuptup simaeru kele ka sia.”

¹³ Tapoi aleginangannia si Mikha, “Ka oni Tuhan sipuririmanua, sarat sikuat Tuhan katubukku le kukukua!”

¹⁴ Kele aisege si Mikha kamatat Rimata Ahab, parerenangan rimata, “Momoi leu kuei kai ruamai Rimata Josafat masisaggangi Ramot?” Aleginangannia si Mikha, “Kauan, kenannan, bulat mamamanang te ekeu. Iake te geti si Tuhan kamanangan katubum.”

¹⁵ Aleginangannia si Ahab, “Ke manibo ekeu katubukku ka onin Tuhan, kua le simakolou. Piga ngaminca kuparepdep ekeu ka pagalaiat nene?”

¹⁶ Aleginangannia si Mikha, “Akuitco saladdut Israel musaragai ka paleleuleleu. Kele tarimeu sitaanai sipasijajago, samba si Tuhan masikua pagalaiat sia, ‘Sirimanua nene taanai siuteake sia. Eddangan ratoili kabagat arau.’ ”

¹⁷ Iageti kuanangan si Ahab kai Josafat, “Aisesengan sikuakku, tapei anai aipatuptup simaeru kaku! Sarat sikatai le!”

¹⁸ Kuanangan minca si Mikha, “Kineneiget arepi aponia sikuat Tuhan! Akuitco si Tuhan mukuddu ka uddenan purimataatNia ka manua, samba sangamberi malaika murio ka bebeNia.

¹⁹ Parerenangan si Tuhan, “Kasei masinana'na si Ahab bule ioba mei pasaggak samba matei ka Ramot ka Gilead” Alegiatda samalaika nenda ta makere.

²⁰ Iageti oi sara ketsat, legreakenangan tubunia kai Tuhan samba kuanangan, ‘Aku te masinana'nania.’ Rerenangannia si Tuhan, ‘Kipa enungannia?’

²¹ Aleginangannia ketsat nenda, ‘Mei le aku samba kubailiuake sangamberi nabi Ahab rapaboko.’ Kuanangan si Tuhan, ‘Kauan, galaiakean nenda, momoi te geti nuna'nania.’ ”

²² Kuanangan minca si Mikha, “Nenda te muaaili! Aikauan si Tuhan ketsat pabokoat ka ngungunda tai nabim, kalulut aiteuakean si Tuhan iorak ekeu pugejaat baga!”

²³ Iageti legreakenangan tubunia nabi Zedekia katubut Mikha, lepa lippatnangan bailat Mikha samba kuanangan, “Kipa ioi ikaddiuake aku Ketsat Tuhan ioi ipanibo katubum?”

²⁴ Aleginangannia si Mikha, “Itco boiki toggaiatnia kateteret nutuguru ka sara bilik nupulipput!”

²⁵ Kuanangan si Ahab, “Laba kamnia, samba ambit kamnia kai Amon, sipasikupkup laggai, samba katubut Joas, togat rimata.

²⁶ Koiniake sia raguruakenia ka papatpanan, samba kau kam lo samba kannia goiso pat toili aku kabagat arau.”

²⁷ Kuanangan si Mikha, “Ke toili ekeu kabagat arau, katukolobatnia ta amanibo si Tuhan katubukku. Sangamberi sirimanua sibabara sene ibailiu sipasimuneng.”

²⁸ Iageti si Ahab, rimata Israel, samba si Josafat, rimata Jehuda, ei sia masisaggangi laggai Ramot ka Gilead.

²⁹ Kuanangan si Ahab kai Josafat, “Kupakau le tubukku samba moi aku pasaggak, tapoi ekeu buita nupakei leppei pubebeunan.” Kisedda rimata Israel ipakau tubunia kateteret aiei pasaggak.

³⁰ Kateteret nenda Rimata Aram aiparentaakean sautet saladdu, bule sarat rimata Israel le rasasaggangi.

³¹ Oto, kateteret araitco Rimata Josafat, sangamberi masipaatu nia te rimata Israel. Kalulut nenda saggangirangannia. Tapoi pugereinangan si Josafat, lepa ropakenangannia si Tuhan, samba bilukakenangan si Tuhan pasaggangan ka ipot bagei.

³² Kele araagainia sautet saladdut Aram sipukekereta, ta rimata israrel nenda, ariakerangan rasagganginia.

³³ Tapoi sitaiagaiet baga sara saladdut Aram masipanaake siloguinia sitapaluluat. Tapoi silogui nenda oraknangan si Ahab ka patupppaijat leppei pasaggaknia. Pusoganangan si Ahab ka simuriake keretania, “Aiorakngan aku! Bilukake samba ambit aku tubela ka pasaggangan!”

³⁴ Tapoi kalulut maoloi peile pasaggangan, Rimata Ahab mariuriu le ipurio aitututukkenia kabagat keretania aimamatai saladdut Aram. Kateteret aitusone sulu tatania.