2Taw. 17 - BUKO SIPUNENAN

Si Josafat ibailiu rimata

¹ Si Josafat ibailiu rimata Jehuda masisailiake si Asa ukkuinia samba iparon tubunia uktuk masisaggangi Israel.

² Pagalaknangan saladdu ka sangamberi laggai sibara pujagoat ka Jehuda samba ka laggai-laggai bagei samba leu ka sangamberi laggai siopput ukkuinia ka Efraim.

³ Si Tuhan masisukatake si Josafat kalulut nia masitutake sigalai ukkuinia ta ibuluiji sabulungan,

⁴ tapoi ipanindogi le Taikamanua. Mareddetnia ka sangamberi surukat Taikamanua samba puririmanuania ta kele tai rimata Israel.

⁵ Si Tuhan masikau kai Josafat pubebeu simaron sibailiu rimata Jehuda. Sangamberi siberikabaga masikau panguruat katubunia bailiu makayonangan samba masuru sirimanua katubunia.

⁶ Kabagat ron patuat reddetnangan surukat Tuhan samba pakatainangan sangamberi kudduat pasibuluat sabulungan samba tularat Asyera sabulungan sinanalep ka Jehuda.

⁷ Ka rura sikatelu pupaneineiatnia koniakenangan sabeu tiboi tubu bule ragelaiake surukat Tuhan ka laggai-laggai Jehuda. Sia nenda iate: Benhail, Obaja, Zakharia, Netaneel samba Mikha.

⁸ Aileu sipaalei sia iate siba tai Lewi samba rua tai imam. Tai Lewi nenda iate: Semaya, Netanya, Zebaja, Asael, Semiramot, Jonatan, Adonia, Tobia samba Tob-Adonia. Karua imam nenda iate: Elisama samba Jehoram.

⁹ Ambitrangan buko Surukat Tuhan samba ei sia ka senen kudduat ka sangamberi laggai Jehuda samba gelaiakerangan siberikabaga sedda.

¹⁰ Si Tuhan masigalai sangamberi purimataat ka bebet Jehuda maloto pasaggak masisaggangi Rimata Josafat.

¹¹ Silonangan sibara ka tai Filistin perak simigi samba panguruat bagei, samba sibara ka tai Arab silonangan leu pitu ngaribu pitungotu biribiri samba pitu ngaribu pitungotu kambing.

¹² Kisedda te si Josafat memei le maburu makokope le pubebeunia. Galainangan pujagoat samba laggai pangoirikat komen samba pamatei.

¹³ Ruruakenangan komen simigi ka laggai nenda,

¹⁴ senen mungkuat siripot muntogatda. Si Adna iate utet saladdu mungkuat sibara ka muntogat Jehuda. Uteakenangan telu ngoturibu saladdu.

¹⁵ Si Johanan masiuteake ruangotu balu pulungaribu saladdu.

¹⁶ Si Amasia togat Zikhri, masiuteake rua ngoturibu saladdu, nia te sara sirimanua sikau tubuna mupagugulet katubut Tuhan.

¹⁷ Utet saladdu sibara ka sangamberi muntogat kabagat suku Benjamin iate Elyada, sara sirimanua simagege pasaggak. Uteakenangan rua ngoturibu saladdu sibara silogui samba korabbi.

¹⁸ Sikarua kabagat mungkuat nene iate si Josabad; uteakenangan sangotu balupulungaribu saladdu sibara pamatei.

¹⁹ Sia te sipugagalai ka Jerusalem. Rimata leu masipagalak mungkuat bagei ka pujagoat ka kupkumen laggai Jehuda.