2Taw. 16 - BUKO SIPUNENAN

Palelengan Asa pasamba Aram

¹ Ka rura sikatelu pulu enem pupaneineiat Rimata Asa ka Jehuda, si Baesa Rimata Israel masisaggangi Jehuda samba masiparon laggai Rama bule ikekre enungan kabelaiat samba katugurukat ka laggai Jehuda.

² Iageti Rimata Asa masiala mas samba perak ka pasikoirikat bibilet Uman Tuhan samba uma purimataat, lepa kauanangannia ka Damsyik katubut Benhadad rimata Siria pasamba patonekat nene,

³ “Kauan tagalai pasuruangan kele sigalaiakenenda saukkuita. Kabagat nene akuake mas samba perak sibailiu panguruat, samba kuna'na ekeu nutakkiake paaleiatmui si Baesa rimata Israel, bule itoiliake minca saladdunia ka laggai kupkumenku.”

⁴ Si Benhadad ioba ka pana'nakat nenda, lepa koiniakenangan utet saladdunia pasamba saladdunia masisagganngi Israel. Kalaakerangan laggai Iyon, Dan, Abel-Bet-Maakha samba sangamberi laggai pangoirikat komen samba pamatei ka Naftali.

⁵ Kele aiarepnia Rimata Baesa pagalaiat nenda, ariakenangan masiparon Rama samba kaddiuakenangan leu laggai nenda.

⁶ Iageti Rimata Asa masikau sangamberi sirimanua sibara ka sangaliot Jehuda bule rambit bukku samba loina sipakei Baesa ka Rama bule raparon laggai nenda. Bukku samba loina nenda pakeinangannia si Asa masiparon laggai Geba samba Mizpa.

⁷ Kateteret nenda Nabi Hanani moi katubut Rimata Asa samba kuanangan, “Kalulut mukaronan poi ekeu ka rimata Aram, samba ta katubut Tuhan Taikamanuam, oto taan momoi nukalaake saladdut rimata Israel.

⁸ Ta pa Etiopia samba Libia ai saladdutda simigi pasamba simigi kereta pasaggak samba saladdu sipukukuro? Kenanen kisedda si Tuhan masiake kamanangan kekeu nusaggangi sia, kalulut mukaronan ekeu katubuNia.

⁹ Kalulut matat Tuhan masilelekake sangaliot polak masikau puroronNia ka sangamberi sirimanua simariuriu topit katubuNia. Anugalaiakean sitaimakolou, kalulut nenda barania kineneiget mariuriu le geti iorak ekeu pasaggangan.

¹⁰ Mabesinangan patuat Asa kalulut tiboiet Nabi Hanani nenda, bailiu kaunangannia kabagat papatpat, kalulut bulat magolunia ka pagalaiat nenda. Kateteret nenda leu si Asa masipaoreiji piga pa taikaumania.

¹¹ Sangamberi sipuaaili kabagat pupaneineiat Asa barania kapanandaat pat aili kalepakat aitusuratake kabagat buko pungunguan tai Rimata Jehuda samba Israel.

¹² Ka rura sikatelu pulusiba pupaneineiatnia si Asa ioraknia besi simakope ka rua ngasilat rerenia. Kenanen kisedda ta aigaba paroman katubut Tuhan, tapoi ka siagai laggek le aitiddou paroman.

¹³ Iageti tata si Asa samba rateiakerangannia ka puariatda taikebbukatnia. Aitata iate ka sika epat pulu sara ngarura pupaneineiatnia,

¹⁴ samba turateiake ka puariat silepa gaigai ka sia ka laggai David. Perepakerangannia ka uddut pereman simasun senengamata pusinginan simagalu siripot enungan masigaluake pusinginan, lepa obekakerangan obengan sabeu sibailiu toggaiat surura katubut Asa.