2Taw. 15 - BUKO SIPUNENAN

Si Asa masibaraake pasibaugat

¹ Iageti sopsopnangan Nabi Azarya togat Oded ketsat sipunenan,

² bailiu einia masiailiake Rimata Asa, samba kuanangan, “Ale Rimata Asa, samba sipulaggai ka Jehuda samba Benjamin! Arepake kam! Si Tuhan malegre katubumui ke malegre kam katubuNia. Ke nutiddou kam enungan kai Tuhan, akenangannia. Tapoi ke ta nupuletsei kamNia, taipuletseinangan leu kam.

³ Bulat maburu ta arapaguguletake tubutda tai Israel ka Taikamanua sibulatnia, taanai surukat sibailiu reddenenda samba taanai tai imam sigelaiake sia.

⁴ Tapoi kateteret ai sia kabagat pangoringan, tiddourangan paroman katubut Tuhan, Taikamanuan Israel. Tiddourangan enungan samba kaunangan leu Nia.

⁵ Kateteret nenda tamomoi rapatuitui tubutda kabagat arau, kalulut ka senen laggai ai pulamaugat sabeu.

⁶ Laggai sara masipaorei laggai bagei, samba sara sirimanua masipaorei sirimanua sabagei, kalulut Taikamanua masibaraake pulamaugat sabeu katubutda.

⁷ Tapoi kau imaom bagamui samba numagege kam. Mariuriu le geti galaiakenenmui

⁸ Kele aiarep si Asa tiboiet Azarya togat Oded nenda, bara ron patuatnia. Areuakenangan sangamberi bulungan ka laggai Jehuda samba Benjamin, samba ka laggai sikalaakenennia ka leleu Efraim, lepa nenda paerunangan kudduat panindogat kai Tuhan sikuddu ka laibokat matat Uman Tuhan.

⁹ Ruruakenangan sangamberi tai Jehuda samba tai Benjamin samba leu tai Efraim, Manasye samba Simeon sikuddu katalagatda sibailiu siooiake. Kalulut sibara ka tai Israel maigi siei katubunia kateteret araitco roropakenania si Tuhan Taikamanuania.

¹⁰ Parururangan ka Jerusalem ka laggo sikatelu rura sikapulu lima kabagat pupaneineiat Asa.

¹¹ Kateteret nenda panguruatakerangan katubut Tuhan pitu ngotu jaui samba pitu ngaribu kambing biribiri sirauraura ka pasaggangan.

¹² Galairangan palelengan kai Tuhan ka muinet patuat samba tubutda rapurimanua siripot obaket bagat Tuhan, Taikamanuan taikebbukatda.

¹³ Senen sirimanua, simabaja' ele sibau tubu, taimanteu ele tainanalep, sipuririmanua ta siripot obaket bagat Tuhan bulat tuukumake le simateiakenen.

¹⁴ Ka nganga sabeu pusupparangan katubut Tuhan raukkaake palelengan nenda. Iageti pugereirangan samba nauakerangan pipiau.

¹⁵ Sangamberi tai Jehuda muangka baga kalulut aragalaiake suppa nenda ka muinet patuatda. Mangka bagatda manindou katubut Tuhan, samba Tuhan leu ioba masisilo sia. Kaunangan katubutda puaraugat ka kupkumen laggaira.

¹⁶ Iageti Rimata Asa ariakenangan si Maakha inabajania, ka galajetnia sibailiu Inan rimata kalulut aigalai tularat Asyera kasitsitakenen bulungan sinanalep. Bukkatakenangan tularat nenda si Asa, tuddunangannia pat ailit samba labonangannia ka susut Kidron.

¹⁷ Kenanen ta sangamberi kudduat bulungan aipakatai si Asa ka laggai nenda, tapoi patuat Asa mariuriu katubut Tuhan ka sanganantat purimanuaiatnia.

¹⁸ Sangamberi mas samba perak samba leu sangamberi bibilet bagei siraurau ka pasaggangan bakkat ukkuinia samba bakkatnia galakakenangannia ka Uman Tuhan sibailiu bakkat Tuhan.

¹⁹ Pat aili ka rura sikatelu pululima pupaneineiat Asa ta abara pasaggangan ka laggai nenda.