2Taw. 14 - BUKO SIPUNENAN

¹ Kele aitata Rimata Abia samba aiturateiakenia ka puariatda tai rimata ka laggai David, si Asa togania ibailiu rimata masisailiakenia. Kabagat pupaneineiat Asa, Laggai Jehuda taanai sipasisaila ka sanganantat pulu ngarura.

² Si Asa masigalaiake katuroipoat samba simaeru kamatat Tuhan Taikamanuania.

³ Areuakenangan sangambei kudduat pasibuluat laggai bagei samba sangamberi kudduat pasibuluat bulungan. Pakatainangan bukku toggaiat bulungan, samba bukkatakenangan sangamberi arigit tularat Asyera bulungan sinanalep.

⁴ Koiniakenangan tai Jehuda murimanua siripot obaket Tuhan, Taikamanuan taikebbukatda, samba masireddet sangamberi surukatNia.

⁵ Sangamberi kudduat pasibuluat sabulungan samba kudduat pasilabokat kumanyang areuakenangannia ka laggai Jehuda. Oto mariuriunangan ipuenung purimataat nenda ka pupaneineiatnia,

⁶ bailiu oinangan igalai pujagoat laggai Jehuda. Piga ngarura pa burunia taanai pasaggangan kalulut si Tuhan masikau aban katubunia.

⁷ Kuanangan si Asa ka tai Israel, “Kau taparon kam sangamberi laggai tagalai kam irip laggai ka sangalionia samba kudduat pujagoat samba leu matatbaliu sibara lelekkre. Atakupkupakean laggai kalulut atareddetnan obaket bagat Tuhan Taikamanuanta. Nia masipasikeli sita samba masijago puaragat ka sangaliot laggaita.” Iageti taddaakerangan mugalai samba lepaakerangan galajet nenda simakolou.

⁸ Saladdut Rimata Asa ai telu ngaribu sia tai Jehuda sibara pamatei korabbi samba sosoat, samba rua ngotu balupulu ngaribu sia tai Benjamin sibara pamatei korabbi, rourou samba silogui. Sangamberitda saladdu simagege.

⁹ Ka sara gogoi oi sara tai Etiopia sipuoni Zerah masisaggangi Jehuda pasamba sangajuta saladdunia samba telu ngotu kereta pasaggak. Pat ailinangannia ka Maresa.

¹⁰ Iageti bela si Asa masisaggangi si Zerah samba karuatda masipagalak senen saladdutda ka Susut Zefata ka bebet Maresa.

¹¹ Iageti panindounangan si Asa katubut Tuhan Taikamanuania, “Tuhan, sarat Ekeu le sioi masiropake sitaioi tubu ka simaron tubu. Ropake kai kineneiget, ale Tuhan Taikamanuamai! Katubum le kupukaronan kai samba kabagat onim kuei kai pasaggak masisaggangi saladdu simakope igi nene. Tuhan, Ekeu le Taikamanuamai. Bui nuobaake rakalaake Ekeu sara sirimanua.”

¹² Iageti si Asa samba saladdut Jehuda sanggangirangan saladdut Etiopia. Si Tuhan masikalaake saladdut Etiopia bailiu putuituirangan,

¹³ kukrunangan sia si Asa samba saladdunia pat aili ka Gerar. Sirimanua sibara ka Etiopia nenda bulat maigi sia amatei, bailiu taanai sipulelegei amurimanua, kalulut masubu le sia kamatat Tuhan. Sangamberi tai Jehuda parauraugirangan simigi bibiletda.

¹⁴ Kalaakerangan sangamberi laggai ka sangaliot Gerar, kalulut si Tuhan masigalai ramaloto ka sipulalaggai. Parauraugirangan sangamberi laggai nenda, kalulut raurauget simigi ai ka laggai nenda.

¹⁵ Saggangirangan leu pusapougatda siputatarimeu samba ambitrangan leu biribiri simigi samba unta. Lepa nenda toili sia ka Jerusalem.