2Taw. 13 - BUKO SIPUNENAN

Rimata Abia

¹ Ka rura sikapulubalu pupaneineiat Rimata Jerobeam ka Israel, si Abia ibailiu rimata Jehuda,

² samba telu ngarura burunia aipupaneinei ka Jerusalem. Inania iate Mikhaya togat Uriel sibara ka laggai Gibea. Iageti pasaggakrangan si Abia samba si Jerobeam.

³ Si Abia masikau epat ngotu ngaribu saladdu simagege, kisedda leu et si Jerobeam masikau balu ngotu ngaribu saladdu simagege masisaggangi si Abia.

⁴ Ka rua mungkuat saladdu nenda ai sia pamamatai ka kupkumen leleu Efraim. Panatranangan si Abia ka leleu Zemaraim samba pusoganangan kai Jerobeam samba ka tai Israel, “Arepake kam!

⁵ Anuagaian kam, Tuhan Taikamanuan Israel aiapprangan palelengan kai David iate, si David samba reddenannia mupaneinei le geti ka Israel teret buruburu. Palelengan nenda tamomoi tusakla.

⁶ Kenanen kisedda, si Jerobeam togat Nebat nenda mukela patuat katubut Salomo, rimatania.

⁷ Ruruakenangan sangamungkuat sirimanua sitaiagai arat samba ubbuakerangan kiddiet bagatda katubut Rehabeam togat Salomo, kateteret nenda bulat sibau tubu peilenia samba ta iagai masisakla.

⁸ Kineneiget nupaatu kam momoi nusaggangi kam pubebeunan sikau Tuhan ka muntogat David, kalulut maigi saladdum samba ai jauinu mas sibailiu bulungannu sigalai Jerobeam.

⁹ Ta pa anukeklengan kam sangamberi tai imam muntogat Aron samba tai Lewi? Sibailiu silitda kasei le sioba muimam, iambit le sangamuneng jaui ele pitu ngamuneng biribiri, bailiuakemuian sia imam ta Taikamanua, kalulut kisedda te katukelat sirimanua sabagei rauddetake imamra. Tapoi kakai ta akugalaiake kai kisedda.

¹⁰ Tuhan le Taikamanuamai samba ta akukaddiuake kai Nia. Tai imammai sarat muntogat Aron samba tai Lewi mariuriu raropake sia.

¹¹ Senen simansep samba kasoibokat laborangan kumanyang samba masipanguruatake buluakenen rarangen katubut Tuhan, samba masitarekake roti panguruat. Senen sinoibo tunamrangan sangamberi alito ka reret alito mas. Mariuriu le kureddet kai sangamberi surukat Tuhan, tapoi kam geti anukaddiuakean kam Nia.

¹² Siuteake kai iate Taikamanua le samba tai imamNia sibabara sene. Amatarekngan sia masinauake pipiau sibailiu toggaiat kakai kusaggangi kai kam. Ale tai Israel, bui' nusaggangi kam si Tuhan, Taikamanuanda taikebbukatmui! Ta mamamanang kam!”

¹³ Tapoi si Jerobeam masikoiniake sangarubeiat saladdunia masisaggangi saladdut Jehuda sibara ka teitei, oto sangarubeiat minca masisaggangi sia sibara kamata.

¹⁴ Kele araitconia saladdut Jehuda araalouan sia, pugereirangan masitiddou paroman katubut Tuhan. Nauakerangan leu pipiau tai imam,

¹⁵ iageti saladdut Jehuda gereiakerangan gerei pasaggangan samba taddaakerangan pasaggak, siuteake sia iate si Abia. Talagat pasaggangan sialei gerei, Taikamanua masikalaake si Jerobeam samba saladdut Israel

¹⁶ bailiu putuituirangan. Kaunangan kamanangan Taikamanua ka tai Jehuda.

¹⁷ Si Abia samba saladdunia masigalai katukalaat sabeu ka tai Israel. Ka tai Israel lima ngotu ngaribu saladdutda simaeru amatei.

¹⁸ Aramamanang tai Jehuda kalulut arakaroni si Tuhan, Taikamanuan taikebbukatda.

¹⁹ Kateteret si Abia masikukru si Jerobeam, oppunangan piga pa laggai pasamba laggai sigoiso ka bebenia. Laggai nenda iate Betel, Jesana samba Efron.

²⁰ Ka sanganantat pupaneineiat Abia, ta amoi aipasikeli purimataatnia si Jerobeam. Kalepakatnia mateiakenangannia si Tuhan.

²¹ Tapoi si Abia geti aituppai le pubebeunia. Ai pulu epat sia sinanalepnia, rua pulurua tatogania taimanteu samba pulu enem sia tatogania tainanalep.

²² Pungunguan bagei pagalaiat si Abia, samba sangamberi sikuania samba sigalaiakenennia atusuratakean kabagat buko Pungunguan Nabi Ido.