2Taw. 12 - BUKO SIPUNENAN

Rimata Misir masisaggangi Jehuda

¹ Kele aimaron pupaneineiat Rehabeam sibailiu rimata, taipuletseirangan surukat Tuhan

² samba taimareddetrangan sangamberitda. Kalulut nenda ukumnangan sia si Tuhan. Ka rura sikalima pupaneineiat Rehabeam, si Sisak rimata Misir masisaggangi Jerusalem

³ pasamba sangaribu rua ngotu kereta pasaggak, enem pulu ngaribu saladdu sipukukuro, samba maigi saladdu sitaioi tuadde iginia, samba leu saladdu Libia, Suki samba Etiopia.

⁴ Oppunangan leu palaggai-laggai sibara pujagoat ka Jehuda pat aili ka bebet Jerusalem.

⁵ Kateteret nenda Rimata Rehabeam samba sia siuteake Jehuda aparuruan sia ka Jerusalem kalulut arapuloto kai Sisak. Iageti oi nabi Semaya katubutda samba kuanangan katubutda, “Kise te ngangan Tuhan, ‘Anukaddiuakean kam Aku, oto kineiget Aku leu masikaddiuake kam bailiu kupkupakenangan kam si Sisak.’ ”

⁶ Rimata samba sia saute sabagei masiseseake jo sigalaira, kuarangan, “Sigalaiakenen Tuhan nenda sineseat le.”

⁷ Kele aiitconia si Tuhan babauakera patuatda, panibonangan minca kai Semaya, kuanangan, “Kalulut arabauakean poi patuatda, oto taan Kususubuake sia. Kubebelaakean le sia; Jerusalem taan mararagat. Kenanen kisedda, si Sisak

⁸ mariuriu le ikupkupake sia, bule raagai baggeinia mupagugulet katubukKu samba mupagugulet ka siabeu tiboi tubu ka polak.”

⁹ Iageti oi si Sisak masisaggangi Jerusalem samba rauraunangan bibilet simakeppu saki ka Uman Tuhan samba ka uma purimataat, samba leu korabbi mas sigalai Rimata Salomo.

¹⁰ Sibailiu silinia galainangan korabbi tembaga si Rehabeam, samba kaunangannia ka sautet saladdu sipasijago matatbaliu gugurukat uma purimataat bule rajago korabbi nenda.

¹¹ Senen iei rimata ka Uman Tuhan, ambitrangan sangamberi korabbi nenda sipasijago, lepa nenda toiliakerangannia ka bilik pujagoatda saladdu.

¹² Kalulut aiepeakean patuatnia si rimata kai Tuhan samba aipeile simaeru ka Jehuda, bailiu malebaknangan golut Tuhan kai Rehabeam samba taan aisubuakenia.

¹³ Si Rehabeam mupaneinei ka Jerusalem samba pubebeunannia memei le mabebeu. Epat pulu sara ngarurania kateteret aibailiunia rimata samba pulu pitu ngarura burunia aipupaneinei ka Jerusalem laggai sikokoiakenen Tuhan sibailiu kudduat panindogat katubuNia. Inan Rehabeam iate Naama sibara ka laggai Amon.

¹⁴ Si Rehabeam masigalaiake sikatai kalulut ta aibesiake masigalai siobat bagat tuhan.

¹⁵ Pungunguan pagalaiat Rehabeam barania ka panandaat pat aili kalepakat samba paninikatnia tusuratake ka buko Pungunguan Nabi Semaya samba kabagat buko Pungunguan Nabi Ido. Si Rehabeam samba si Jerobeam mariuriu ibara pasaggangan.

¹⁶ Iageti tata si Rehabeam samba turateake ka puariat tai rimata ka laggai David. Si Abia, togania, ibailiu rimata masisailiakenia.