2Taw. 11 - BUKO SIPUNENAN

¹ Kele aisege ka Jerusalem si Rehabeam, ruruakenangan sangotu balu pulu ngaribu saladdunia simaeru sibara ka muntogat Jehuda samba Benjamin, bule rasaggangi tai Israel samba masitoiliake minca pupasikelanannia ka muntogat saigit ka bare Israel.

² Tapoi si Tuhan masikoiniake nabi Semaya

³ masisegeake tiboiet nene katubut Rehabeam samba ka sangamberi sirimanua ka muntogat Jehuda samba Benjamin,

⁴ “Bui nusaggangi sasarainam tai Israel. Toiliake ekeu! Aponia sipuaaili teu bagakKu le. Oto sia sangamberitda, masireddet tiboiet Tuhan samba taipuriuriunangan raei masisaggangi si Jerobeam.

Rimata Rehabeam masiparon purimataatnia

⁵ Pukuddunangan si Rehabeam ka Jerusalem samba koiniakenangan sirimanua masigalai kudduat pujagoat laggai ka kupkumen Jehuda samba Benjamin, iate

⁶ Betlehem, Etam, Tekoa,

⁷ Bet-Zur, Sokho, Adulam,

⁸ Gat, Mares, Zif,

⁹ Adoraim, Lakhis, Azeka,

¹⁰ Zora, Ayalon samba Hebron.

¹¹ Paronnangan leu palaggai-laggai sibara pujagoat nenda samba pagalaknangan sara utet saladdu ka senen laggai. Ka senen laggai nenda patareknangan komen, tulat zaitun, anggur,

¹² korabbbi samba sosoat. Bailiu kupkumen Jehuda samba Benjamin mariuriu kabagat kupkumennia.

¹³ Tai imam samba tai Lewi sibara ka sangamberi kupkumen Israel mei musara kai Rehabeam.

¹⁴ Tai Lewi nenda rakaddiuake su'su samba polakda, iageti ei sia ka Jehuda samba ka Jerusalem kalulut si Jerobeam samba tatogania sibailiu rimata sipasisailiakenia taan raobaake rapugalai sibailiu imam Tuhan.

¹⁵ Uddetakenangan si Jerobeam tai imamnia bule rapasikeli kudduat pasibuluat sabulungan samba pasibuluat sikameinan samba tularat jaui sigalainia.

¹⁶ Sirimanua sibara ka muntogat Israel bulat sioba masibuluiji Tuhan, Taikamanuan Israel, ei sia ka Jerusalem masitut tai Lewi bule ioi rabuluake buluakenen kai Tuhan, Taikamanua buluijiet taikebbukatda.

¹⁷ Bailiu purimataat Jehuda makopenangan imaron. Telu ngarura burunia raropake purimataat Rehabeam togat Salomo nenda samba purimanuarangan kele kateteret pupaneineiat Rimata David samba Rimata Salomo.

¹⁸ Putalimounangan si Rehabeam kai Mahalat; ukkui Mahalat iate Jerimot, togat David, samba inania iate si Abihail, togat Eliab punuteteu Isai.

¹⁹ Togania ai telu taimanteu iate, Jeus, Semarya samba Zaham.

²⁰ Iageti putalimounangan minca si Rehabeam kai Maakha togat Absalom. Bara togatda epat taimanteu, iate Abia, Atai, Ziza samba Selomit.

²¹ Si Rehabeam ai pulu balu sinanalepnia samba enem pulu sinanalepnia ka be'be, rua pulu balu tatogania taimanteu samba enem pulu tatogania tainanalep. Katalagat sangamberi sinanalepnia samba sinanalepnia ka be'be bulat makope nuntut bagania iate si Maakha.

²² Iate lulunia si Abia togat Maakha makope obanania bele peile ka tatogania sabagei, bailiu si Abia le aiteuake masisailiakenia sibailiu rimata.

²³ Kabagat pusikuat patuat kaunangan galajetda tatogania si Rehabeam samba pagalaknangan sia ka laggai-laggai sibara irip ka sangaliot kupkumen Jehuda samba Benjamin. Kaunangan leu komenda simakope igi samba leu patareknangan tainanalep simigi sibailiu sinanalepda.