2Taw. 1 - BUKO SIPUNENAN

Rimata Salomo manindou masitiddou sikut patuat

¹ Salomo, togat David, ibailiu sara rimata simaron purimataat ka purimataat Israel. Tuhan Taikamanuania masipanukani samba masibailiuakenia sara rimata bulat sabeu.

² Si Salomo masikoiniake sangamberi tai Israel, sautet saladdu sisangaribu, sangotu saladdu, sipasiukum samba sangamberi saute ka sangalio Israel, iate sautet muntogat.

³ Lepa ei si Salomo pasamba sangamberi paamian Israel ka leleu kudduat panindogat ka Gibeon, kalulut sedda te kudduat Sapou Tuhan sigalai Mose, pagugulet Tuhan, ka kudduat simatangeu.

⁴ Tapoi Peti Pakerekat Bagat Tuhan nenda aiambitan si David sibara ka Kiryat-Jearim ka Jerusalem kudduat sitarekakenennia kudduat Peti nenda, kalulut aigalaian sedda sapou kudduat peti nenda.

⁵ Tapoi kudduat pasibuluat tembaga sigalai Bezaleel togat Uri, teteu Hur, aipeile ka Gibeon ka matat Sapou Tuhan. Oto sedda te ipaninindou si Salomo samba leu sangamberi paamian Israel.

⁶ Ka matat Sapou nenda si Salomo masipanguruatake sangaribu tarimeu ka uddut kuddduat pasibuluat tembaga sibailiu buluakenen rarangen katubut Tuhan.

⁷ Ka soibo nenda Taikamanua masipatoila tubuNia katubut Salomo samba kuanangan, “Salomo, tiddouan aponia siobanu, bulat Kuake te katubum!”

⁸ Aleginangannia si Salomo, “Ale Taikamanua, anupatoilaan nuntut bagam ka ukkuiku, kai David, samba anuuddetakean aku ibailiu rimata masisailiakenia.

⁹ Oto kineneiget, ale Tuhan Taikamanua, sutakean palelenganNu ka ukkuiku kai David. Ekeu poi amasiuddetake aku ibailiu rimatatda siberikabaga sitaioi tuadde iginia.

¹⁰ Kalulut nenda bule nuake kaku sikut patuat samba puaagai kabagat masipasikeli sia. Ke ta kisedda, kipa ioi kupasikeli paamianNu simigi nene?”

¹¹ Kuanangan Taikamanua katubut Salomo, “Bulat maeru te tiddogetnu nenda. Ta anutiddou pukayoat atau, bibilet puaabeu tiboi tubu, kamateiatda tai saggaknu, samba leu burut puririmanuam. Tapoi anutiddou le sikut patuat samba puaagai masipasikeli paamianKu siakeKu katubum.

¹² Kalulut nenda sikut patuat samba puaagai nenda Kuake le geti katubum. Ta sarat nenda Kuaake leu pukayoat, bibilet samba puaabeu tiboi tubu, bele peile kele tai rimata siburu samba sipuririmata ka sibabara.”

¹³ Lepa kaddiuakenangan si Salomo Sapou Tuhan ka leleu kudduat panindogat ka Gibeon, lepa toilinia minca ka Jerusalem. Barania sedda, iageti enungakenangan puparentaatnia si Salomo ka Israel.

Pukayoat Salomo

¹⁴ Ruruakenangan leu si Salomo kereta pasaggak samba saladdu sipukukuro, bailiu bara sangaribu epat ngotu kereta pasaggaknia samba pulurua ngaribu saladdu sipukukuro, sangamberinia nenda pagalaknangannia kabagat laggai Jerusalem samba legeinia ka laggai bagei ka Jerusalem.

¹⁵ Kateteret pupaneineiat Salomo, mas samba perak makere iginia kele bukku samba loina pinilok Libanon bulat simakope igi kele loinat simatukkle.

¹⁶ Si Salomo masisaki kuro ka Misir samba ka Kewe, katubutda sipasisasakiake sipasirorom rimata.

¹⁷ Sara kereta pasaggak sibara ka Misir sakinia enem ngotu bulagat perak, samba sangamuneng kuro sakinia sangotu lima bulagat perak, sangamberi kereta pasaggak samba kuro nenda sakiakenangannia minca katubutda sangamberi rimatatda tai Het samba Aram.