2Sam. 9 - BUKO SIPUNENAN

Si David samba Mefiboset

¹ Ka sara gogoi parerenangan si David, “Taleu ai peile sipuririmanua ka muntogat Saul? Ke ai peile sia, bule kugalaiake simaeru katubunia kalulut si Jonatan.”

² Kabagat muntogat Saul ai sara pagugulet sipuoni Ziba, sogainangannia Rimata David. Lepa rerenangannia rimata, “Ekeu leu si Ziba?” Aleginangannia si Ziba, “Oo.”

³ Iageti rerenangannia minca rimata, “Taleu ai peile sipuririmanua ka muntogat Saul? Bule kugalaiake simaeru katubunia, kele sipaleleku ka Taikamanua.” Aleginangannia si Ziba, “Ai peile sara togat Jonatan, simajegeu muenung.”

⁴ Rerenangannia rimata, “Kaipania?” Aleginangannia si Ziba, “Ainia ka lalep Makhir togat Amiel, ka Lodebar.”

⁵ Lepa koiniakenangan sia si David rasogai togat Jonatan nenda.

⁶ Onin togat Jonatan nenda iate Mefiboset. Kele aisege ka matat David, purekkunangan. Kuanangan si David, “Mefiboset,” samba aleginangannia, “Oi, Tuan.”

⁷ Kuanangan si David, “Bui numaloto, makate le bagaku katubum kalulut ukkuinu si Jonatan. Sangamberi polak Saul kutoiliake katubum samba teret buruburu momoi nupukom ka purimataat pasamba aku.”

⁸ Lepa purekkuknangan si Mefiboset samba kuanangan, “Kasei paguguletnu nene! Angoi bulat makope topitnu katubukku sirimanua sitapaluluat nene?”

⁹ Iageti pasogainangan rimata kai Ziba pagugulet Saul, samba kuanangan, “Sangamberi bakkat Saul samba sangamberi bakkat muntogatnia kukau katubut teteu tuannu nene.

¹⁰ Buita nugalai polaknia sambamui tatogam, sapaguguletnu samba leu buita nukau kam buat mone nenda katubutda bule ibara komenda. Tapoi si Mefiboset momoi ipukom ka purimataat teret buruburu.” (Si Ziba ai pulu lima sia tatogania taimanteu samba rua pulu sia sapaguguletnia.)

¹¹ Aleginangannia si Ziba, “Sangamberinia kugalaiake siripot sikuam.” Oto si Mefiboset mukom le nia pasamba rimata, kele bulat togat Rimata David.

¹² Si Mefiboset ai togania sigoiso simanteu sipuoni Mikha. Sangamberi muntogat Ziba ibailiu pagugulet Mefiboset.

¹³ Kisedda te si Mefiboset simajegeu muenung nenda aikuddu ka Jerusalem samba mariuiriu rapukom sambatda rimata.