2Sam. 8 - BUKO SIPUNENAN

Kamanangan David ka bagat pasaggangan

¹ Lepa nenda sagganginangan minca tai Filistin si David. Kalaakenangan sia samba alanangan laggaira.

² Kalaakenangan leuet tai Moab, koiniakenangan sia murappo ka polak, lepa mateiakenangan rua sia katalagat senen telu sirimanua. Oto, tai Moab, mareddetrangan katubut David samba luluirangan leu juran katubunia.

³ Lepa nenda si David masikalaake Hadadezer, togat Rehob, rimata ka Zoba, iate sara purimataat kabebet laggai Damsyik. Kateteret nenda si Hadadezer ainia kabagat puenunganan iei masipaeru purimataatnia ka kupkumen tirit Oinan Efrat.

⁴ Tangsiakenangan saladdut Hadadezer si David sangaribu pitu ngotu sia saladdu sipukukuro samba rua pulu ribu sia saladdu sipueenung. Lepa koiniakenangan sia si David raja'ja ungat reret sangamberi kuro sipasigigirit kereta pasaggak, tapoi ralegeiake le sangotu ngamuneng kuro sipasigigirit kereta pasaggak.

⁵ Lepa geti tai Aram sibara ka Damsyik masikau saladdutda masiropake Rimata Hadadezer, tapoi si David masikalaake sia samba mateiakenangan rua pulu rua ribu sia katalagatda.

⁶ Iageti rioakenangan sapou si David ka kupkumen laggaira, samba mareddetrangan katubut David samba luluirangan juran katubunia. Si Tuhan masisukatake si David ka senen pasaggangannia.

⁷ Iageti sangamberi korabbi mas sipakeira saladdu Hadadezer, rauraunanganniaa si David samba ambitnangannia ka Jerusalem.

⁸ Si David leuet masiala simakope igi perunggu sibara ka Betah samba Berotai samba sangamberi laggai sibailiu kupkumen Hadadezer siburu.

⁹ Kele aiarepnia Rimata Tou sibara ka Hamat, si David aikalaakean sangamberi saladdut Hadadezer,

¹⁰ oto koiniakenangan si Joram, togania, katubut Rimata David bule isegeake paroroiat katubut David, kalulut aisaggangi samba aikalaake si Hadadezer, aipoi si Hadadeze mareirei isaggangi si Tou. Samba leu si Joram masiambit mas, perak, samba perunggu simigi.

¹¹ Iageti sangamberi bibilet nenda panguruatakenangannia Rimata David katubut Tuhan, samba leu mas, perak sibara ka laggai bagei sikalaakenennia,

¹² iate mas samba perak sibara ka Edom, Moab, Amon, Filistin, Amalek, samba siraurau sibara katubut Hadadezer togat Rehob, rimata Zoba.

¹³ Kisedda te aimaagai samba aiabeu oninia si David, samba kateteret aitoili, mateiakenangan pulu balu ribu sia tai Edom ka Lembah Asin.

¹⁴ Lepa rioakenangan sapoura saladdu si David ka sangaliot Edom, bailiu sangaliot Edom bailiunangan sia pagugulet David. Si Tuhan masikau kamanangan katubut David ka senen pasaggangannia.

Sipugagalai ka uma purimataat David

¹⁵ Kisedda te si David aiparentaake sangaliot Israel samba masijago bule tugalaiake katubutda puroipoat samba katubulanan.

¹⁶ Si Joab, togat Zeruya, ibailiu utet saladdu, Josafat togat Ahilud ibailiu sipuuku pubulaganan ka uma purimataat;

¹⁷ si Zadok togat Ahitub samba si Ahimelekh togat Abyatar sibailiu imam, Seraya ibailiu sipanunurat ka uma purimataat,

¹⁸ si Benaya togat Joyada ibailiu ute saladdu tai Kreti samba tai Pleti, samba tatogat David ibailiu imam.