2Sam. 6 - BUKO SIPUNENAN

Peti Pakerekat Baga tuabbit ka Jerusalem

¹ Iageti ruruakenangan si David sangamberi saladdu simagege ka Israel, igitda telu pulu ribu sia.

² Lepa patareknangan tubunia si David samba tuitui sia sangamberitda tai Israel raei ka laggai Baale ka Jehuda, bule raala sedda Peti Pakerekat Baga, oniakenen iate Tuhan Sipulugege sipuririmata ka uddut kerubim.

³ Iageti alarangan Peti Pakerekat Baga nenda ka lalep Abinadab, sikuddu ka uddut leleu, lepa sakaiakerangannia ka uddut sara pedati sibau. Oto si Uza samba si Ahyo, tatogat Abinadab masitut pedati nenda.

⁴ Oto si Uza muenung kabebet Peti nenda, samba si Ahyo muenung kamatat Peti nenda.

⁵ Si David samba sangamberi bangsa Israel muturu samba muurai ka sut gorat baga raabeuake Taikamanua sialei kecapi, rebana, simbal samba pipiau.

⁶ Kele arasege ka kudduat pasigulunan gandum bakkat Nakhon, tugirisitnangan reret jaui siambit Peti nenda, lepa totoiakenangan kabeinia si Uza iala Peti nenda bule bui ibele.

⁷ Teteret nenda leuet pugolunangan si Tuhan katubut Uza, kalulut sigalainia nenda sibailiu paloloiat katubut Tuhan le. Lepa geti matei si Uza sedda.

⁸ Oto bara golut David, kalulut si Tuhan masimateiake si Uza, bailiu kudduat nenda tuoniake Pere-Uza teret kineneiget.

⁹ Tapoi si David maloto leuetnia ka Taikamanua samba kuanangan, “Kineneiget kipangan le ioi kuambit Peti Pakerekat Baga nenda?”

¹⁰ Kalulut nenda si David ta'an amuriuriu aiabbit Peti Pakerekat Baga nenda ka Jerusalem, tapoi aikoiriake le ka lalep Obed Edom, tai Gat.

¹¹ Oto kuddu sedda Peti nenda telu ngalaggo burunia, samba si Tuhan masipanukani si Obed-Edom samba sangalalepnia.

¹² Iageti paagairangannia katubut David, kise, “Tuhan masisukatake si Obed-Edom sangalalepnia samba leu sangamberi bakkatnia kalulut Peti Pakerekat Baga nenda. Oto ei si David ka lalep Obed-Edom masiala Peti nenda iambitnia ka Jerusalem kabagat punen sabeu.

¹³ Kateteret arapuenung enem ngabakkou sipasiambit Peti nenda, koniakenangan sia si David rapuari. Lepa panguruatakenangan si David buluakenen katubut Tuhan iate jaui simanteu samba togat jaui simamo'mo.

¹⁴ Iageti puturunangan si David ka seget ronnia iabeuake si Tuhan. Kateteret nenda si David masipakei leppei Efod, komak juto simaalit baga.

¹⁵ Kisedda te si David samba sangamberi tai Israel araambit Peti nenda ka Jerusalem, sialei gerei samba nau pipiau.

¹⁶ Kateteret airaguguruake Peti nenda kabagat laggai, paloggounangan ka jandela si Mikhal togat Saul sinanalep, itconangan si David ainia muantat samba mututuru iabeuake si Tuhan. Kalulut nenda maasanangan bagania si Mikhal katubut David.

¹⁷ Guruakerangan Peti nenda, lepa galakrangannia ka kudduatnia, ka sapou sigalai David. Lepa geti panguruatakenangan si David buluakenen samba buluakenen paabanan katubut Tuhan.

¹⁸ Kele ailepa ipanguruatake buluakenen rarangen samba buluakenen paabanan si David, sukatakenangan tai Israel kabagat onin Tuhan Sipulugege.

¹⁹ Lepa parubeinangan komen ka sangamberi tai Israel, taimanteu samba tainanalep, senesenenda sangapaggla akkula sirarak, roti samba roti simamuine. Lepa nenda toili sia ka lalepda.

²⁰ Kateteret aitoili si David ka uma purimataat ikau paroroiat ka sangalalepnia, bela si Mikhal togat Saul masiailiake si David samba kuanangan, “Gogoi nene rimata Israel bulat aikau tubunia abeuakenen! Amubulututnia kele sitaiagai patuat, sitaiagai puailaat ka matatda sapagugulet tainanalep, paguguletda sipugagalai ka uma purimataat!

²¹ Aleginangannia si David, “Kupututuru iate masiabeuake si Tuhan, sikeraake ukkuinu samba sangalalepnia, lepa pilinangan aku sibailiu ute ka Israel, paamianNia. Kalulut nenda, muturu le aku masiabeuake si Tuhan.

²² Samba leu matarek aku kupaloloi tubukku bele pei ka silelepa. Eddangan imaasa bagam katubukku, tapoi sapagugulet tainanalep sikuam nenda raabeuake le geti aku!”

²³ Si Mikhal, togat Saul nenda ta abara togania pat mateinia.