2Sam. 5 - BUKO SIPUNENAN

Si David ibailiu rimata ka Israel samba ka Jehuda

¹ Lepa nenda sangamberi siuteake suku Israel moi katubut David ka Hebron samba kuarangan, “Kai nene saepput Tuanku.

² Baranangan siboiki samba kateteret aipei leu si Saul masipaparenta katubumai, ekeu le siuteake saladdut Israel ka senen raei pasaggak. Samba leu aikuangan si Tuhan Taikamanuam, ekeu te masiuteake paamianNia samba ibabailiu rimatatda.”

³ Iageti galainangan palelengan si David pasamba sangamberi siuteake suku Israel nenda ka Hebron. Lepa uddetakerangannia sibailliu rimata Israel.

⁴ Si David ainia telu pulu ngarura kateteret aibailiunia rimata, samba puparentanangan epat pulu ngarura burunia.

⁵ Ka Hebron parentaakenangan Jehuda pitu ngarura enem ngalaggo burunia, samba ka Jerusalem ka sangaliot Israel samba Jehuda telu pulu telu ngarura burunia aipuparenta.

Si David masioppu laggai Jerusalem samba mukuddunia sedda

⁶ Ka sara gogoi Rimata David pasamba sangamberi saladdut Israel mei ka laggai Jerusalem masisaggangi tai Jebus, sikudduiji laggai nenda. Tai Jebus nene masipaatu bulat tamomoi le ikalaake Jerusalem si David. Oto iate lulunia rakua katubut David, kise, “Tamomoi nuoi sene; beringan sirimanua simapeset samba sirimanua simajegeu muenung momoi ratuituiake ekeu.”

⁷ Tapoi si David masioppu irip Sion simaron, iate laggai David.

⁸ Kateteret nenda aikuangan si David, “Kasei masikalaake tai Jebus, buita tugurunia ienungi enungan oinan nenda; bulat malaga bagania si David katubutda sirimanua simajegeu muenung samba simapeset.” Kalulut nenda kuarangan sirimanua, “Sirimanua simapeset samba simajegeu muenung tamomoi tuguru ka Uman Tuhan.”

⁹ Samba kuddu si David ka irip simaron nenda samba oniakenangannia, “Laggai David”. Paerunangan ka sangaliot bebet irip nenda si David, barania ka Milo ka rubeiat ka baga.

¹⁰ Lepa memei mabuburu maronnangan purimataatnia si David, kalulut si Tuhan, Taikamanua ka sangaliot polak, masipaaleinia.

Uma purimataat samba sangalalep David

¹¹ Iageti koiniakenangan pakoinietnia si Hiram, rimata Tirus iei katubut David samba kaunangan leu loina pinilok Libanon samba siagai mugalai bukku bule ragalai uma purimataat David.

¹² Lepa geti matonemnangan bagania si David, bulat aironnakeannia si Tuhan sibailiu rimata ka Israel, samba aiparonnan si Tuhan purimataatnia kalulut paamianNia Israel.

¹³ Kele aituitui si David barania ka Hebron iei ka Jerusalem, alanangan piga pa sia tainanalep sibailiu sinanalepnia samba sinanalepnia kabebe; oto tuppainangan leu tatogania tainanalep samba leu taimanteu.

¹⁴ Nene oninda tatogat David sipututu mata ka Jerusalem: Syamua, Sobab, Natan, Salomo,

¹⁵ Jibhar, Elisua, Nefeg, Jafia,

¹⁶ Elisama, Elyada samba Elifelet.

Si David masikalaake tai Filistin

¹⁷ Kele araarepnia tai Filistin, si David nene aibailiuannia rimata ka Israel, iageti ei sangamberi tai Filistin masilaba si David. Tapoi arepnangan pagalaiat nenda si David, lepa einia ka irip simaron.

¹⁸ Kele arasege tai Filistin ka Su'sut Refaim,

¹⁹ Parerenangan si David katubut Tuhan, “Kusasaggangi pa tai Filistin nenda? Nuaake leu kamanangan katubukku?” Aleginangannia si Tuhan, “Kenan nusaggangi sia, aile Kuake kamanangan katubum.”

²⁰ Iageti ei si David ka laggai Baal ka Perasim samba kalaakenangan sedda tai Filistin. Lepa kuanangan, “Aitukkluakean saggakku si Tuhan kamatakku, kele eba itukkluake sangamberinia. Kalulut nenda kudduat nenda tuoniake Baal-Perasim.

²¹ Putuituirangan saladdutda tai Filistin samba ta amoi araambit sangamberi tularat sabulunganda. Sangamberi tularat sabulungan nenda alanangannia si David samba sipasitututnia.

²² Lepa ta amaburu oi minca tai Filistin masikudduiji Su'sut Refaim.

²³ Iageti parerenangan minca si David katubut Tuhan, samba aleginangannia si Tuhan, “Bui nusaggangi sia baram ka kudduat nene, tapoi puenung le nualou sia samba sagganginungan sia baram kateiteira, kabebet loina murbei.

²⁴ Ke nuarep kele nau bakkou rere ka buttet loina murbei nenda, sagganginungan sia, kalulut muenung te Aku kamatamui Kukalaake saladdutda tai Filistin.

²⁵ Galaiakenangan si David kele siparentaakenen Tuhan, samba kalaakenangan tai Filistin barania ka Geba pat aili ka Gezer.