2Sam. 4 - BUKO SIPUNENAN

Kamateiat Isyboset

¹ Kele aiarepnia togat Saul, amateian si Abner ka Hebron, oto tata gegenia, samba tuge'gerangan leu sangamberitda tai Israel.

² Ai rua tatogat Saul sibailliu ute ka mungkuat iate si Baana samba Rekhab, ruatda togat Rimon, tai Benjamin sibara ka Beerot. – Kalulut Beerot leu addeat kupkumen laggai Benjamin.

³ Tai Beerot amutuituian sia raei ka Gitaim samba ibailiu sia siooiake sedda pat aili kineneiget. –

⁴ Si Jonatan, togat Saul, ai sara togania simanteu sipuoni Mefiboset. Rurania lima ngarura, kateteret aibara katuareman pagalaiat si Saul samba si Jonatan ka Jizreel. Kateteret nenda Ina sipasikeli si Mefiboset beilanangannia samba pabalaunangan, tapoi kalulut maola bagania pabalau, bele toga nenda samba majegeunangan ipuenung.

⁵ Tatogat Rimon, tai Beerot nenda, iate si Rekhab samba si Baana, mei ka lalep Isyboset samba sege sia sedda sinago, kateteret aimemerep si Isyboset sinago.

⁶ Sinanalep sipasijajago lalep nenda malaulaunangan kateteret aipalilina gandum samba perepnangan leuet. Kalulut nenda oinangan ratuguru kabaga si Rekhab samba si Baana.

⁷ Guru' sia bilit pereman Isyboset kateteret aimemerep si Isyboset sedda, lepa punurangannia pat mateinia. Tippurangan utet Isyboset samba ambitrangannia. Sangasoibo arapuenung raenungi barania ka Araba pat aili ka Jordan.

⁸ Iageti kaurangan utet Isyboset nenda katubut David ka Hebron samba kuarangan, “Nene te utet Isyboset togat Saul, saggaknu sibesiake masimateiake ekeu. Gogoi nene ailumunakean si Tuhan sigalaiakenen Saul katubum samba samuntogatnia.”

⁹ Tapoi aleginangannia si David, “Tuhan sipuririmanua, siarauake aku ka sangamberi pugejaat baga!

¹⁰ Kateteret arapaagainia sirimanua katubukku pagalaiat kamateiat Saul, rakua te katuareman simaeru le arasegeake. Tapoi akumateiake le sia. Iate akukau upa katubunia sibailiu silit katuareman sisegeakenia nenda.

¹¹ Sarapei kineneiget, sia sirimanua sikatai lepat aramateiake sirimanua sitasele ka lalepnia, ta pa kululumunake kamateiatnia katubumui kusubuake kam ka polak nene?”

¹² Lepa nenda, kaunangan parenta si David ka sipasitututnia bule ramateiake si Rekhab samba si Baana; kabei samba reretda tutippu, lepa toakngake tubutda simamatei nenda ka bebet pao ka Hebron. Tapoi utet Isyboset nenda alarangannia samba rateiakerangannia ka kabagat puariat Abner ka Hebron.