2Sam. 3 - BUKO SIPUNENAN

¹ Sipasitutut muntogat Saul samba muntogat David mariuriu le rapasaggak pasasambatda. Ka sia si David memei mabuburu maroron le nia, tapoi si Saul geti memei le magugulai ronnia.

Tatogat David taimanteu

² Tatogat David taimanteu siputututu' mata ka Hebron iate, si Amon, inania iate si Ahinoam sibara ka Jizreel;

³ sikarua iate si Kileab, inania iate si Abigail, silumangakenen Nabal sibara ka Karmel. Sikatelu iate si Absalom, inania iate si Maakha togat rimata ka Talmai sibara ka Gesur;

⁴ sikaepat iate si Adonia, inania iate si Hagit. Sikalima iate si Secafa, inania iate si Abital;

⁵ sikaenem iate si Jitram, inania iate si Egla.

Si Abner musara katubut David

⁶ Kateteret aipeile muririuriu rapasaggak sambatda sipasitutut muntogat David samba sipasitutut muntogat Saul, bailiu si Abner tutakerangannia sipasitutut muntogat si Saul.

⁷ Ka sara gogoi si Isyboset, togat Saul, masisuksuk si Abner masipaperepake sara sinanalep Saul kabebe sipuoni Rizpa togat Aya.

⁸ Lepa pugolunangan simakope si Abner samba kuanangan, “Utet jojo sibara ka Jehuda pa aku? Teret kineneiget aipeile kupatotoila riuriunia kutut si Saul ukkuinu, sasarainania samba leu saaleinia. Akuropakean ekeu, bailiu ta amoi aikalaake ekeu si David, tapoi kineneiget nusuksuk aku masigalaiake sikatai ka sara sinanalep!

⁹ Bule Taikamanua masiukum aku, ke ta kugalaiake katubut David kele sipalelekakenen Tuhan kabagat suppa,

¹⁰ iate masiotcaake purimataat sibara ka kabei Saul samba masirioake purimataat David ka Israel samba Jehuda, barania ka Dan pat aili ka Bersyeba.”

¹¹ Samba si Isyboset ta momoi ipanibo ialegi ngangan Abner, kalulut lotonia katubunia.

¹² Lepa koiniakenangan si Abner sara pakoiniennia mei katubut David masisegeake patonekat: “Kasei sibakkat laggai nene? Tubabaraake le palelenganta, bule kuropake ekeu kuambit sangamberi tai Israel raoi musara katubum.”

¹³ Aleginangannia si David, “Kauat, aile kubaraake palelengan pasamba ekeu, tapoi sara tiddogetku katubum, ke moi ekeu masiailiake aku buita nuambit si Mikhal togat Saul sinanalep.”

¹⁴ Lepa nenda koiniakenangan si David pakoiniennia katubut Isyboset masisegeake patonekat, “Toiliake sinanalepku si Mikhal katubukku. Akualania silit sangotu kulit sigetaiat keikeijetda taimanteu tai Filistin.”

¹⁵ Lepa koiniakenangan pakoiniennia si Isyboset masiala si Mikhal ka simanteunia iate si Paltiel togat Lais.

¹⁶ Tapoi si Paltiel mariuriru itut si Mikhal samba ainia musosou pat aili ka laggai Bahurim. Lepa kuanangan si Abner katubunia: “Toiliakean le ekeu!” Lepa toilinia si Paltiel.

¹⁷ Kateteret nenda leu si Abner patiborangan pasambatda sikebbukat laggai tai Israel, samba kuanangan, “Amaburuan nukiddi kam si David ibailliunia rimatamui.

¹⁸ Oto kineneiget te gogoinia, kalulut aikuangan si Tuhan pagalaiat si David, iate ipakei le si David masibelaake paamianNia tai Israel ka kabeira tai Filistin samba ka sangamberi saggakra.”

¹⁹ Si Abner patibo leu ka tai Benjamin; samba ei leu nia ka Hebron masisegeake katubut David pagalaiat sibulatakenenda tai Israel samba leu sangamberi muntogat Benjamin.

²⁰ Kele aisege si Abner sambatda rua pulu sia pasambania katubut David ka Hebron, lepa baraakenangan leu punen si David.

²¹ Lepa nenda kuanangan si Abner katubut David, “Obaake kuei masiruruake sangamberi tai Israel bule raoi musara katubum, bule ragalai palelenganda katubum samba bailiunangan ekeu rimatatda kele siripot sipinatum.” Iageti obaakenangannia si David itoili si Abner samba tuituinia kabagat angkat baga.

Kamateiat Abner

²² Kele aiobaakenia si David itoili si Abner ka bagat angkat baga, ta amauju toili si Joab sambatda saladdu baratda pasaggak samba leu maigi arambit bibilet sirauraura.

²³ Iageti segeakerangan katubut Joab pagalaiat kaooi Abner paaili katubut David samba aiobaakenia itoili ka angkat baga.

²⁴ Iageti ei si Joab katubut rimata samba kuanangan, “Aponia anugalai? Si Abner amoiannia katubum; angoi nuobaake ituitui ka angkat baga?

²⁵ Anuagaian kaooi Abner nenda iate masipataju ekeu le, samba masiagai kipa puririmanuam samba aponia galaiakenennu.”

²⁶ Lepa nenda bela si Joab ikaddiuake si David, samba koiniakenangan pakoinien si Joab bule rasogai si Abner. Lepa ailiakerangan si Abner sapakoinien nenda pat aili ka bebet uggungan Sira, lepa ambitrangannia itoili. Sangamberinia nene taiagaiet David.

²⁷ Kele aisege si Abner ka Hebron, na'nanangannia si Joab raei ka bebet matatbaliu gugurukat, kele ai pakeleat kabagat patiboatda. Tapoi sige'ge pununangan balugut Abner si Joab pat matei si Abner. Kisedda ailumunake si Joab kamateiat baginia si Asael.

²⁸ Kele aiarep pagalaiat nenda si David, kuanangan, “Iagai si Tuhan, aku samba purimataatku ta masele kabagat kamamatei Abner togat Ner nenda.

²⁹ Si Joab samba samuntogatnia le masisisilo ukum kalulut sigalai Joab nenda. Bule kabagat muntogat samba reddenannia mariuriu raorik besi simasappo, sipututura, simamatei ka lanjau samba leu simagulai komen!”

³⁰ Kisedda te si Joab samba si Abisai, baginia, aramateiake si Abner, bagitda, kalulut si Abner masimateiake bagitda si Asael kabagat pasaggangan ka Gibeon.

Turateiake si Abner

³¹ Iageti kuanangan si David katubut Joab samba ka sangamberi siberikabaga sipasitutut si Joab, “Biritake kam leppeimui samba bolitnake kam katubumui komak toggaiat reureu baga samba leu soibi kam si Abner. Samba kateteret arataroake si Abner ka puariat, Rimata David ainia muenung kateitei masitut petit Abner simamatei nenda.

³² Kele ararateiake si Abner ka Hebron, pusounangan sabeu rimata samba leu siberikabaga ka puariat Abner.

³³ Lepa nenda pusounangan si David isoibi si Abner samba kuanangan, “Bulatnia leu pa imatei si Abner kele sirimanua sitaiagai patuat?

³⁴ Kabeinia ta siappra, samba rerenia ta kabe'. Matei le nia sipunu kakabeira sirimanua sikatai.” Lepa makopenangan leu rapusou siberikabaga rasoibi si Abner.

³⁵ Ka sanganantat gogoi nenda sangamberi siberikabaga masina'na si David bule ipukom goiso, tapoi pusuppanangan si David, “Bule si Tuhan masimateiake aku, ke mukom aku ke ta'pei bele sulu!”

³⁶ Kele araarep nene siberikabaga, kalulut rapaatu poi maeru le nenda. Kele sangamberi sigalaiakenen rimata rakau lenia simaeru.

³⁷ Ka gogoi nenda agairangannia siberikabaga samba ka sangaliot Israel, kamateiat Abner togat Ner ta sisiakenen rimata.

³⁸ Iageti kuanangan rimata ka sapaguguletnia, “Ta pa nuagai kam, amateian sara ute siabeu tiboi tubu ka Israel?

³⁹ Kenanen aku nene iate rimata sipilit Taikamanua, tapoi kineneiget tamomoi tubuku. Bulat makope le kataira tatogat Zeruya bele peile kataiku. Tamomoi kukupkupake sia. Bule si Tuhan masiukum sirimanua sikatai nenda, siripot katai sigalaira.”