2Sam. 24 - BUKO SIPUNENAN

Si David masibaraake pasisuranan oni

¹ Iageti bara minca golut Tuhan katubutda tai Israel; na'nangan si David bule igalaiake sibaraake golura tai Israel, kuananganNia, “Kenan nuadde tai Israel samba tai Jehuda.”

² Iageti kuanangan si David katubut Joab samba ka sautet saladdunia, “Gejengi sangamberi suku Israel barania ka Dan pat aili ka Betsyeba; baraake kam pasisuranan ka siberikabaga, bule kuagai igitda.”

³ Lepa aleginangannia si Joab, “Bule si Tuhan, Taikamanuam masituppaiake igitda tai Israel iaili sangotu ngaminca sibara ka taddera kineneiget nene, samba bule nuitco sangamberinia. Tapoi angoi noba tugalaiake nene?”

⁴ Tapoi rimata riuriu iometnake parentania nenda. Oto kalulut parentat rimata, si Joab sambatda sautet saladdu masigalaiake pasisuranan oni ka sangaliot Israel.

⁵ Talipokirangan bagat oinan Jordan, lepa barania ka Aroër samba ka laggai sikuddu ka tengan su'su ka ipot Gad samba Jaser.

⁶ Iageti sege sia ka Gilead samba ka Kadesh laggaira tai Het. Lepa sege sia ka Dan samba baratda ka Dan puenungrangan siei ka Sidon.

⁷ Iageti sege sia ka Tirus laggai simaron, samba ka sangamberi laggaira tai Hewi samba tai Kanaan, kalepakatnia sege sia ka Bersyeba, ka rubeiat ka kaiaman Jehuda.

⁸ Burunia aragejengi sangaliot laggai iate siba ngalaggo rua pulu ngagogoi. Lepa nenda toili sia ka Jerusalem.

⁹ Lepa segeakenangan si Joab katubut rimata pagalaiat pasisuranan sigalaiakenenda. Oto igitda tai Israel iate balu ngotu ribu sia siagai pasaggak samba tai Jehuda lima ngotu ribu sia.

¹⁰ Tapoi kele ailepa aiadde sia sangamberitda si David, againangan bagania selenia, lepa kuanangan katubut Tuhan, “Ale Tuhan, bulat amajongan aku! Appeake aku, kalulut sigalaiku nene bulat sitapululut.”

¹¹ Kele aitusuru si David simanseman, kuanangan si Tuhan katubut nabi Gad, sibailiu sipatalagat David pasamba si Tuhan, kise,

¹² “Kenan, nukua katubut David, kise aikua si Tuhan: Ai telu piliet Kuake katubum; pili sara kasitelu pilietnu nene, iageti galaiakekungan leuetnia.”

¹³ Iageti ei si Gad masiailiake si David isegeake sikuat Tuhan, kuanangannia, “Laggai nene iorak le geti pulajeat telu ngarura burunia, ele rakukru ekeu tai saggaknu telu ngalaggo burunia, ele laggai nene iorak besi' kabagat telu ngagogoi. Oto kineneiget paatu samba teuake pilietnu bule kusegeakenia katubut Tuhan.”

¹⁴ Lepa aleginangannia si David, “Bulat mabesi kukua sara pilietku, eddangannia iukum sita si Tuhan, kalulut siabeu katet baga le Nia, tapoi bui raukum aku sirimanua.

¹⁵ Iageti baraakenangan besi simasappo si Tuhan ka tai Israel barania simansep pat aili gogoi siteuakenen. Matei sia, barania ka Dan pat aili ka Bersyeba pitu pulu ribu sia ka talagatda amatei.

¹⁶ Kateteret aitotoiake kabeinia malaika ka Jerusalem isubuakenia, iageti oleinangan bagaNia si Tuhan kalulut ukuman nenda, lepa kuanangan katubut malaika sigalaiake katusubuat nenda, “Paat ariakean! Gorosotake kabeinu.” Kateteret nenda malaikat Tuhan ainia kabebet pasigulutat gandum Arauna, tai Jebus.

¹⁷ Si David masiitco malaika nenda ainia masimamateiake sirimanua nenda, lepa kuanangan si David katubut Tuhan, “Aku le majo, kalulut aku le aigalaiake jo. Tapoi aponia jotda sirimanua nenda” Ukum le aku samba sangalalepku!”

¹⁸ Ka gogoi nenda si Gad masiailiake si David samba kuanangannia, “Kenan, nugalai kudduat pasibuluat katubut Tuhan ka kudduat pasigulunan gandum Arauna, tai Jebus nenda.”

¹⁹ Iageti ei si David siripot siparentaakenen Tuhan sisegeakenenNia katubut Gad.

²⁰ Kateteret ailoggouake ka repe si Arauna, itconangan rimata samba leu sipasijajagonia airaailiakenia. Lepa purekkuknangan si Arauna kamatat rimata.

²¹ Parerenangan si Arauna, “Angoian le anuoi ka kudduatku nene? Aleginangannia si David, “Masisaki kudduat pasigulunan gandum nene katubum, bule kugalai kudduat pasibuluat katubut Tuhan, bule ipuari besi' simasappo nene.”

²² Iageti kuanangan si Arauna katubut David, “Kauan, alaan samba panguruatakean katubut Tuhan siripot sipaatum simaeru. Ai sene jaui sibailiu buluakenen rarangen samba momoi nupakei loina samba lapprit pasikuilu nene sibaliu pasirarak buluakenen nenda.”.

²³ Kaunangan sangamberinia nenda si Arauna katubut rimata, samba kuanangan, “Bule Tuhan, Taikamanuam, masipukateiki ekeu baga.”

²⁴ Tapoi aleginangannia rimata, “Ta kisedda! Kusasaki le katubum kulului sakinia, kalulut ta koba kupanguruatake katubut Tuhan buluakenen rarangen sitaisasakiet.” Lepa nenda sakinangannia si David kudduat pasigulunan samba jaui nenda lima pulu bulagat perak.

²⁵ Lepa galainangan kudduat pasibuluat katubut Tuhan ka kudduat nenda si David samba panguruatakenangan buluakenen rarangen samba leu buluakenen paabanan. Iageti arepininangan panindogat David si Tuhan, lepa puarinangan iorak sia besi simasappo nenda tai Israel.