2Sam. 23 - BUKO SIPUNENAN

Tiboiet David sikateitei

¹ Si David togat Isai tupili ibailiu rimata samba Taikamanuan Jakob masibailiuakenia siabeu tiboi tubu. Si David leuet masigalai urai ka tai Israel. Nene te tiboiet David sikateitei:

² Ketsat Tuhan amanibongan katubukku; patonekat samba parentaNia ai ka ngungungku.

³ Taikamanuan Jakob masikua; sijago tai Israel masikua katubukku: Rimata siparentaake siberikabaga kabagat katuroipoat sipasiuteake kabagat purereddet katubut Tuhan,

⁴ mutoro le nia kele ibela sulu simansep kateteret malainge manua. Nia kele matatsulu imalegeu urat igalai turuturu sibau imakirisau.

⁵ Kisedda leuet muntogatku isukatake Taikamanua? PalelenganNia katubukku, ta isisili, palelenganNia nenda teret buruburu samba makapplu, makolou kabagat sangamberinia. Taikamanua masiparon kamananganku samba iake le sangamberi kiddiet bagaku.

⁶ Tapoi sirimanua sitaioba mureddet katubut Tuhan kele rui siribbaiakenen le. Tamomoi rarapenia sirimanua;

⁷ berisara sirimanua sioba masibekbeknia ke ta tupakei loina ele laba' pasibekbeknia. Sangamberi sirimanua nenda masubu le ilabo sia obengan.

Saladdut David simagege

⁸ Nene te sangamberi oninda saladdut David simagege: siboiki iate si Isybaal, tai Hakhmoni, siuteake mungkuat sikatelu. Amuaili leu ka sara pasaggangan isaggangi balu ngotu sirimanua samba mateiakenangan sia sangamberitda pasamba simuinebakkatnia.

⁹ Sikarua kabagat Triwira nenda iate si Eleazar togat Dodo sibara ka muntogat Ahohi. Nia masitut si David kateteret arasaggangi tai Filistin kateteret aisia parururu sedda rapasaggak. Lepa kateteret araputuitui saladdut Israel,

¹⁰ riuriuakenangan pasaggak si Eleazar mateiakenangan tai Filistin pat saggonia. Pukelanangan kabeinia pat taioinangan iobaake lanjaunia. Ka gogoi nenda si Tuhan masikau kamanangan sabeu ka tai Israel. Saladdut Israel situtuitui nenda toili sia minca ka kudduat Eleazar rapasaggak, lepa rauraurangan bibilet pasaggak katubutda simamatei ka kudduat nenda.

¹¹ Sikatelu kabagat Triwira nenda iate si Sama togat Age tai Harari. Kateteret araparuru tai Filistin ka Lehi, ka sara mone simigi kacang simabonan, putuituirangan saladdut Israel kamatatda tai Filistin.

¹² Tapoi si Sama riuriuakenangan pasaggak, mateiakenangan samba kalaakenangan tai Filistin, pat oinangan ikudduiji mone nenda. Kisedda te aikau si Tuhan kamanangan sabeu.

¹³ Sangaminca kepei iaili tetere pasimoneiat oi telu sia sibara ka talagat telu pulu saute saladdu masiailiake si David, ka ngaliu Adulam. Kateteret nenda tai Filistin ai sia musasapou ka Su'sut Refaim.

¹⁴ Kateteret nenda si David ainia kabagat ngaliu nenda samba saladdutda tai Filistin arakupkupakean Betlehem.

¹⁵ Lepa repdepnangan laggai pututukat matania si David samba kuanangan, “Bule koi babara sirimanua siake lo'ku oinan sibara ka uggungan ka Betlehem sikuddu kabebet matatbaliu gugurukat!”

¹⁶ Masiarep nenda telu utet saladdu masiguruki pusapougatda tai Filistin, lepa aisurangan oinan sibara ka uggungan ka Betlehem sikuddu kabebet matatbaliu gugurukat, lepa geti abbitrangannia katubut David. Tapoi si David ta ioba ilonia, tapoi aiuruake le sibailiu panguruat katubut Tuhan.

¹⁷ Kuanangannia, “Ale Tuhan, tamomoi kulo oinan nene! Ta pa oinan nene makere le kele logaura siei sibuluake engania?” Oto si David bulat ta ioba le masilo oinan nenda. Nenda te sigalaikenenda sitelu saladdu simagege nenda.

¹⁸ Si Abisai bagit Joab, togat Zeruya, nia te ute ka telu pulu sirimanua nenda. Samba nia te amasimateiake telu ngotu sirimanua pasamba simuinebakkatnia. Kalulut nenda maabeunangan oninia katalagatda sitelu pulu sirimanua nenda.

¹⁹ Ta pa nia le bulat raabeuake katalagat sitelu pulu sirimanua nenda? Kirenangan nia ibailiu ute'ra, tapoi ta kele gegetda tai triwira nenda.

²⁰ Sara utet saladdu simakope gege iate si Benaya togat Joyada, tai Kabzeel. Rua saladdu simagege sibara ka Moab aimateiake. Atuguru leuetnia kabagat ngaliu samba mateiakenangan sangamuneng singa, kateteteret nenda tetere simaleppet.

²¹ Ai leuet aimateiake sara tai Misir sabeu tubu samba mananta tubunia. Ka kabeinia ai simuinebakkat, tapoi sagganginangannia si Benaya pasamba tutura, samba oppatnangan simuinebakkat nenda si Benaya samba pakeinangannia imateiake tai Misir nenda.

²² Nenda te sangamberi sigalai Benaya togat Joyada, maabeunangan oninia katalagat sitelu pulu saladdu simagege nenda.

²³ Kabagat sitelu pulu sirimanua nenda si Benaya le bulat raabeuake, tapoi ta'pei iaili gegetda tai Triwira. Samba uddetakenangannia si David sibailiu ute ka sipasijajagonia.

²⁴ Si Asael, sarainan Joab, ainia katalagat sitelu pulu sirimanua; kisedda leuet si Elhanan togat Dodo, sibara ka Betlehem;

²⁵ Sama tai Harod; Elika tai Harod;

²⁶ Heles tai Palti; Ira togat Ikesh tai Tekoa;

²⁷ Abiezer tai Anatot; Mebunai tai Husa;

²⁸ Zalmon tai Ahohi; Maharai tai Netofa;

²⁹ Heleb togat Baana tai Netofa; Itai togat Ribai, sibara ka Gibea tai Benjamin;

³⁰ Benaya tai Piraton; Hidai sibara ka su'sut Gaas;

³¹ Abialbon, tai Bet ka laggai Araba; Azmawet tai Beharum;

³² Elyahba tai Saalbon; Jasyen tai Guni; Jonatan

³³ togat Sama tai Harari; Ahiam togat Sarar tai Harari;

³⁴ Elifelet togat Ahasbai tai Maakha; Eliam togat Ahitofel tai Gilo;

³⁵ Hezrai tai Karmel; Paerai tai Arbi;

³⁶ Jigal togat Natan sibara ka Zoba; Bani tai Gad;

³⁷ Zelek tai Amon; Naharai tai Beerot sipasiambit pamatei Joab togat Zeruya;

³⁸ Ira tai Jetri; Gareb tai Jetri;

³⁹ Uria tai Het, sangamberitda telu pulu pitu sia igitda.