2Sam. 22 - BUKO SIPUNENAN

Urai kamanangan David

¹ Lepat aibelaake si David si Tuhan ka kabei Saul samba ka sangamberi saggaknia, uraiakenangan urai nene si David katubut Tuhan:

² Ale Tuhan, ekeu le bulakku, Ekeu le karonanku samba puaraugatku.

³ Tuhan kele irip simakope ron kudduat pukunemanku. Taikamanuangku kele leleu bulak, kudduat puaragatku. Kele korabbi isakkeri aku samba ijago aku bule ta matei aku.

⁴ Pusogakungan katubut Tuhan, simateu umunakenen, belaakenangan aku ka sangamberi saggaku.

⁵ Igoilik le aku kalotoakenen kamateiat samba inemnemi aku eba katusubuat.

⁶ Ilailai le aku kalotoakenen kamateiat sesere kamateiat ai kamatakku.

⁷ Kabagat gejat bagaku pusogakungan katubut Tuhan pugereikungan katubut Taikamanuangku kutiddou paroman. Ka umaNia iarepi ngangangku samba ipuletsei sogakku.

⁸ Lepa puuilaknangan samba pugeretnangan polak, maguraknangan samba mageretnangan saisai leleu kalulut golut Tuhan!

⁹ Pukitcitnangan kujuk sibara ka asakNia, obengan samba bo bela ka ngunguNia.

¹⁰ Silanangan manua, lepa gorosotNia, pasamba pugepgeman ka tei rereNia.

¹¹ Tuburutnangan ipakei kerub; pumanyangnangan ka uddut kappot rusa.

¹² Salokinangan tubuNia pugepgeman; tanai rusa simainep simakeppu masibokkoNia.

¹³ Bila' sibara kamataNia bela tanai rusa, urat es samba obengan.

¹⁴ Lepa pulelegunangan si Tuhan sibara ka manua, Sipulubeunan masipaarep ngangaNia.

¹⁵ Panaakenangan sangamberi siloguiNia, samba pasaragainangan saggak, pubilanangan simaole samba galainangan ratuitui.

¹⁶ Tunga'nganangan saisai koat samba tubukanangan apot polak kateteret aigolu saggakNia si Tuhan.

¹⁷ Ainia ka pata totoiakenangan kabeiNia si Tuhan; ukkaakenangan samba tiktiknangan aku sibara ka oinan simakeru.

¹⁸ Belaakenangan aku ka saggak simagege samba ka sirimanua simalaga baga katubukku kalulut bulat makope gegetda katubukku.

¹⁹ Saggangirangan aku kateteret aiaku ka gejat baga tapoi si Tuhan ibailiu sipasirop aku.

²⁰ Belaakenangan aku ka kamateiat samba arauakenangan aku kalulut makiliu bagaNia katubukku.

²¹ Si Tuhan masisiliake sigalaiku simaeru; sukatakenangan aku kalulut ta masele aku.

²² Reddetkungan parentat Tuhan, samba ta amutuitui aku ka Taikamanuangku.

²³ Sangamberi surukatNia lelekakekungannia, samba puukukungan sangamberi parentaNia.

²⁴ Iagai ta akugalai puseleat samba kuareuake le tubuku ka sikatai.

²⁵ Iageti siliakenangan si Tuhan sigalaiku simaeru kalulut iagai ta masele aku.

²⁶ Tuhan, mariuriu le topitNu ka sirimanua simaom baga samba simatopit, samba matopit ekeu katubut sirimanua simatopit.

²⁷ Ka sirimanua simalina Nupatoila tubum simalatsat, tapoi sirimanua sikatai Nusaggangi le.

²⁸ Sirimanua sitaiaddeakenen Nuarauake; tapoi simabuak patuat nusaggangi.

²⁹ Tunamnungan alitoku; Tuhan Taikamanuangku masitoroiji pugepgemanku.

³⁰ Ronakenungan aku kusaggangi saggak; kabagat paroman Taikamanuangku kuragatnake puronanda.

³¹ Sigalai Taikamanua makapplu erunia, palelengan Tuhan momoi tukatonemi! Nia kele korabbi ka sangamberi sirimanua sipukunem katubuNia.

³² Kalulut sarat Tuhan le Taikamanua; Taikamanua le sakkeratku.

³³ Nia te Takamanua sironake aku samba sipariuriu enunganku.

³⁴ Paronnangan rerekku kele reret simatsura, samba jagonangan katuaraugatku ka leleu.

³⁵ Gelaiakenangan aku pasaggak, bailiu oinangan kubetekake rourou simakope ron.

³⁶ Tuhan, jagonungan samba arauakenungan aku, samba palulunungan aku kabagat gegem bailiunangan aku siabeu kalulut sigalaiNu.

³⁷ Pasikelinungan aku bule ta ralaba aku tai saggak samba ta'pei abele aku.

³⁸ Kukrukungan saggaku samba kalaakekungan sia, samba ta kusosoksok ke ta'pei masubu sia.

³⁹ Momoakekungan sia pat taioinangan ratusuru, putagguilurangan ka tei rereku.

⁴⁰ Akenungan ronku kupasaggak, samba kamanangan kukalaake sangamberi saggaku.

⁴¹ Galainungan raputuitui saggaku kamatakku; subuakekungan sirimanua simalaga baga katubukku.

⁴² Pugereirangan, tapoi taanai siparorom, pusogarangan katubut Tuhan, tapoi ta aialegi.

⁴³ Bubuakekungan sia kele abu simasasaragai, samba sabuikungan sia kele loti ka enungan.

⁴⁴ Belaakenungan aku katalagat sirimanua sibaraake pulamaugat; samba bailiuakenungan aku sikupkupake sangamberi sirimanua; sirimanua taiagaietku bailiunangan sia paguguletku.

⁴⁵ Sirimanua siooiake pusumrangan katubukku, samba mareddet sia ke raarep parentaku.

⁴⁶ Atatan gegetda pat pumusinangan pumataatda; muloto le sia samba bela ka kudduat pukunemanda.

⁴⁷ Tuhan sipuririmanua! Tuumunake le siropake aku! Abeuake kam Taikamanua, siarauake aku!

⁴⁸ Siake kamanangan kusaggangi saggaku, sangamberi sirimanua kalaakenangan sia kamatakku,

⁴⁹ arauakenangan aku ka sangamberi saggaku. Tuhan, anuakean kaku kamanangan kusaggangi saggaku, jagonungan aku ka sangamberi sirimanua sikatai.

⁵⁰ Oto kuabeuake le Ekeu katalagat sangamberi sirimanua, samba kuuraiake urai pasiumun katubum.

⁵¹ Taikamanua masikau kamanangan katubut rimata siuddetakenenNia, mariuriu le ipukateki baga sirimanua sipiliNia, iate si David samba muntogatnia teret buruburu.